Najlepšyja šmatsieryjnyja stužki, jakija možna ŭbačyć u pieršy miesiac hoda. U našym śpisie buduć jak premjery, tak i sieryjały, jakija viartajucca ŭ efir paśla pierapynku.

«Novy papa» (The New Pope)

Drama. Italija, Ispanija, Francyja, 2-i siezon

Sieryjał Paoła Sarencina «Małady papa» staŭ sapraŭdnaj bombaj u 2016 hodzie. Kankłaŭ kardynałaŭ niečakana abiraje papam rymskim maładoha amierykanskaha kardynała Leni Biełarda (Džud Łou). Jaho razhladajuć jak alternatyvu miž libierałami i kansiervatarami. Ale Pij XIII pierastaje hulać pa praviłach inšych, jon pačynaje svaju hulniu, jakaja moža pryvieści ci da poŭnaha krachu Katalickaj carkvy, ci da jaje absalutnaha ŭzvyšeńnia.

Papa kuryć u Vatykanie, pryručaje kienhuru, pje «Koka-kołu», šantažuje italjanskaha premjer-ministra, nie viedaje, pra što razmaŭlać z pravasłaŭnym mitrapalitam, adšturchoŭvaje ad siabie viernikaŭ, jaho dajmajuć demany dziacinstva. Ale čym bolš pra jaho daviedvajucca ludzi, tym bolš jany razumiejuć, što Papa — śviaty. Voś tolki pytańnie, ci vieryć Pij XIII u Boha? U kancy pieršaha siezona Leni traplaje ŭ komu.

Kankłavu nie zastajecca ničoha inšaha, jak abrać novaha papu. Im stanovicca brytanski kardynał, jaki abiraje imia Jana Paŭła III. «Ja biezadkazny, ja lanivy, ja pampiezny, ja słavalubivy», — kaža Jan Pavieł III u adnym ź cizieraŭ sieryjała. Jon užo hatovy stać pantyfikam, jak z komy vychodzić Biełarda. Pamiž papami razhortvajecca baraćba za ŭładu.

«Doktar Chto» (Doctor Who)

Navukovaja fantastyka. Vialikabrytanija, 12-y siezon

Heta samy praciahły ŭ śviecie navukova-fantastyčny telesieryjał. Jaho pačatak biarecca až u 1963 hodzie. Dzivosny prykład hladackaha pośpiechu i pryznańnia. I choć sieryjał zakryli naprykancy 80-ch, jon znoŭ viarnuŭsia na ekrany ŭ 2005-m.

U centry sieryjała jarki inšapłaniecianin, jaki nazyvaje siabie «Doktaram». Jon padarožničaje ŭ prastory i časie. Hetyja vandroŭki adbyvajucca ŭ mašynie času pad nazvaj TARDIS, kaliści jana mahła mimikravać pad što zaŭhodna, ale paśla adnoj pałomki ciapier jana vyhladaje zaŭsiody, jak anhlijskaja palicejskaja budka ŭzoru 1963 hoda.

Doktar maje mahčymaść mianiać svajo abličča, što pryviało da taho, što hałoŭnuju rolu vykonvała ŭžo trynaccać čałaviek. Vandrujučy pa hałaktycy, Doktar traplaje ŭ samyja roznyja pryhody, ale vybłytvajecca dziakujučy svaim unikalnym umieńniem i viedam. Razam z hetym jon paśpiavaje zmahacca ź niespraviadlivaściu, što adbyvajecca ŭ samych roznych kropkach śvietu i času.

«Drakuła» (Dracula)

Žachi. Vialikabrytanija, 1-y siezon

Mabyć, dla najlepšaha pačatku varta skazać, što aŭtarami «Drakuły» ad Bi-bi-si stali stvaralniki kultavaha brytanskaha sieryjału «Šerłak» Mark Hecis i Styvien Mofat. Scenarysty ŭžo nieadnarazova pryznavalisia, što majuć słabaść da kłasičnych knih žachaŭ. U vyniku atrymajem słavutyja try sieryi pa paŭtary hadziny kožnaja.

Sučasny «Drakuła» — heta tvorčaje pieraasensavańnie viadomaj knihi Brema Stokiera, paśla jakoj rumynski vampir i staŭ zvyšpapularnym u śviecie.

1897 hod, anhlijski juryst Džonatan Charkier pryjazdžaje ŭ Transilvaniju, kab sustrecca z novym klijentam. Zrazumieła, što klijentam akazvajecca charyzmatyčny hraf-vampir. Drakuła stavić za metu zachapić stary-dobry Łondan viktaryjanskaj epochi. Ci atrymajecca? Pieršyja sieryi ŭžo dastupnyja dla prahladu.

«Piataja avieniu» (Avenue 5)

Navukovaja fantastyka. ZŠA, 1-y siezon

Pamiatajecie film «Śmierć Stalina»? Jaho jašče zabaranili ŭ Rasii, a Łukašenka paśla prahladu stužki nie staŭ rabić hetaha ŭ Biełarusi. Režysioram filma byŭ šatłandski satyryk Armanda Iannučy. Ciapier jon pradstaŭlaje svoj novy sieryjał. Dadatkovaha vartaści «Piataj avieniu» dadaje toj fakt, što hałoŭnuju rolu ŭ sieryjale syhraje słavuty Chju Łory (toj samy Doktar Chaŭz).

Pra što «Piataja avieniu»? Dziejańnie adbyvajecca ŭ budučyni, kali kaśmičnyja karabli ŭžo ŭpeŭniena baroźniać prastory Hałaktyki. Turystam užo niecikava padarožničać u Italiju ci Francyju, im padavaj prastory biaskoncaha kosmasu. Adnym z takich turystyčnych karabloŭ kiruje kapitan Rajan Kłark (Chju Łory), adnak, kali karabiel niečakana łamajecca, to stanovicca zrazumiełym, što da hetaha nie hatovyja ni piersanał, ni pasažyry.

«Čužyniec» (The Outsider)

Detektyŭ, tryler. ZŠA, 1-y siezon

U adnym z papiarednich ahladaŭ my ŭžo raili dla prahladu sieryjał pavodle knihi Styviena Kinha («Mister Miersiedes»). Ciapier majem novuju ekranizacyju. Na hety raz znoŭ pierad nami nie kłasičny film žachaŭ, a detektyŭ, choć i z elemientami mistyki.

U maleńkim haradku ŭ štacie Akłachoma adbyvajecca źvierskaje zabojstva padletka. Za spravu biarecca detektyŭ Ralf Andersan. Jon chutka vychodzić na śled treniera biejsbolnaj kamandy, usieahulnaha lubimca Tery Mejtłenda. Ludzi nie vierać, što heta jon, ale ŭliki biaźlitasnyja. Zrešty, praź niejki čas stanovicca zrazumieła, što ŭ hety momant Tery byŭ za 90 kiłamietraŭ ad miesca złačynstva, ale što tam robiać jahonyja adbitki palcaŭ? Chto ž adkazny za zabojstva?

Hladzi taksama: 

Piać sieryjałaŭ, jakija varta pahladzieć u śniežni

Piać sieryjałaŭ, jakija varta pahladzieć u listapadzie

Piać sieryjałaŭ, jakija varta pahladzieć u kastryčniku

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?