«Kali tolki źjaviłasia heta hulnia, maje siabry pytalisia: «Jak, čamu ty jašče nie tam?» Dośvied hulniaŭ u mianie jość. Hadoŭ ź dziesiać tamu ŭ niejkaj radyjohulni vyjhraŭ dla žonki palito. Paśla čatyry razy ŭdzielničaŭ u televiktarynie «Razmaŭlajem pa-biełarusku», tam nie vyjhryš byŭ važny, a mahčymaść pahutaryć pa-biełarusku», — pryznajecca Viačasłaŭ Cechanovič.

Hulnia «Na vylet» składajecca ź piaci raŭndaŭ. Pieršy — adboračny, u jakim treba adkazać na adno pytańnie viadučaha.

Pytańni hetyja absalutna z roznych halin viedaŭ. Naprykład, mohuć spytacca, jakim ansamblem kiruje Anatol Jarmolenka ci ŭ jakim horadzie žyvie Karłsan. Kali vy adkazvajecie pravilna, vy traplajecie ŭ asnoŭnuju častku hulni, dzie vam daviadziecca zmahacca z kamandaj sapiernikaŭ. Chto pieršy naciskaje knopku, u taho prava adkazu. Kali adkaz pravilny, vy majecie prava kahości z kamandy sapiernikaŭ adpravić «na vylet». Voś tut i źjaŭlajecca hałoŭnaja ciažkaść i niespraviadlivaść hulni.

«Ad tvaich viedaŭ nie zaležyć ničoha. Kali kamanda sapiernikaŭ vyrašyć, što ty lišni, tut užo ničoha nie papišaš», — kaža Cechanovič.

Tamu, u tym liku pra heta i raskazvaje Viačasłaŭ Cechanovič, mnohija spačatku nie śpiašajucca pakazvać svaje viedy. I da mikrafona imknucca padychodzić radziej, kab nie złavać sapiernikaŭ svaim intelektam. Ale zdarajecca, što ŭvaha sapiernikaŭ padaje na takoha čałavieka, jaki navat tabličku sa svaim numaram chavaje, i vyhaniajuć jaho. Tamu jakoj stratehii prytrymlivacca, vybiraje kožny dla siabie. Kali ty staŭ pieramožcam i vyjšaŭ u supierhulniu, to možna z amal z upeŭnienaściu skazać, što ty pieramožca.

U supierfinale ŭ hulca try sproby i try pytańni. Adkažaš na adno — ty pieramožca. Pytańni absalutna roznaj składanaści, ale jość šaniec, što ciabie spytajuć pra niešta zusim vidavočnaje.

U hulni «Na vylet» Viačasłaŭ niekalki razoŭ stanaviŭsia «słabym źvianom».

«Jak tut padhadaješ, jak siabie pavodzić? Adkazvaješ na pytańni — razumny, treba vyhnać. Nie adkazvaješ — taksama padazrona. U adnoj sa svaich hulniaŭ ja, sapraŭdy, zataiŭsia spačatku. A kali dajšoŭ da siaredziny hulni, zrazumieŭ, što treba ŭsio brać u svaje ruki. Dajšoŭ da supierfinału, ale ŭ vyniku nie adkazaŭ tam ni na adno pytańnie. Tolki siertyfikaty HUMa atrymaŭ», — raskazvaje Viačasłaŭ.

Pytańnie, jakoje pryniesła pieramohu Viačasłavu, jon, viadoma, pamiataje.

«U supierfinale mianie spytali, čym vyjava na 100-dołaravaj kupiury adroźnivajecca ad vyjaŭ na inšych kupiurach», — raskazvaje Viačasłaŭ.

I da siońnia pieražyvaje, što nie zmoh adkazać na prostaje pytańnie ŭ inšym svaim finale:

«Było pytańnie pra toje, čamu turystam, jakija źbirajucca na voziera Bajkał uzimku, rekamiendavana brać z saboj dva nažy. Ja adkazaŭ niejkuju łuchtu, chacia čytaŭ, što dva nažy patrebnyja dla taho, kab uhryzacca imi ŭ lod, kab nie źniesła vietram», — kaža Viačasłaŭ Cechanovič.

Viačasłaŭ raskazvaje, što vyjhryš pryvieźli jamu dadomu prykładna praz tydzień paśla zdymak pieradačy.

«Usio chutka. Raśpisaŭsia ŭ nakładnoj, zabraŭ najaŭnyja hrošy i siertyfikaty z mahazina. Na siertyfikaty nabyŭ padarunki dočkam i ŭnučcy. Heta akazałasia tak pryjemna, što ŭ nastupny raz vyrašyli padavać zajaŭku ŭsioj siamjoj», — kaža Viačasłaŭ.

Dačka Viačasłava zdoleła pieramahčy ź pieršaha razu.

«Chacia mnie kazała: «Ja ni razu nie hladzieła hetuju pieradaču, ja nie viedaju, što tam treba adkazvać. Pajdu chiba tolki dziela taho, kab sełfi zrabić». U vyniku zabrała 2000 rubloŭ, a sełfi tak i nie zrabiła», — uśmichajecca Viačasłaŭ.

Viačasłavu Cechanoviču 49 hadoŭ. Jon kiraŭnik nievialikaj handlovaj kampanii. Viačasłava možna pabačyć na roznych minskich pab-kvizach, jon addany słuchač kursaŭ «Mova Nanova».

Na zapis hulni Viačasłaŭ pryjšoŭ u vyšyvancy.

«Ja biełarus i hanarusia hetym. Adnojčy ŭ Turcyi sa mnoj zdaryŭsia taki vypadak. Paśla konkursu «Mistar hatel», jaki ja vyjhraŭ, da mianie padyšła žančyna i skazała: «Dziakuj vam vialiki. Vy maju śviadomaść biełaruski ŭźniali na vyšyniu».

A što było? Pierad pačatkam mierapryjemstva animatar u hateli pytajecca ŭ prysutnych, chto ź jakoj krainy. I voś kali nazyvaŭ Rasiju, usie biełarusy padymali ruki. A ja aburyŭsia. Kažu: «Ja ź Biełarusi». A viadučy: «Ja tolki što nazyvaŭ Rasiju, treba być bolš uvažlivym». A ja kažu, što ja nie z Rasii. A ź Biełarusi. Heta dźvie absalutna roznyja krainy. Paśla hetaha, čałaviek z 10 ustali ź miescaŭ i skazali: «My taksama ź Biełarusi, my nie rasijanie, nie ruskija», — raskazvaje Viačasłaŭ Cechanovič.

I chacia apošni vyjhryš siamja Cechanovič pakul nie atrymała, ale ŭžo zarehistravalisia na nastupnyja pieradačy.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?