Eks-karol Bielhii Albiert II na padstavie testu DNK pryznaŭ 51-hadovuju bielhijku Delfinu Boel svajoj pazašlubnaj dačkoj, piša bbc.com.
Delfina — mastačka i skulptar. Pa słovach jaje advakataŭ, zychod ciažby — vialikaja palohka dla jaje. Jana aficyjna pryznanaja čaćviortym, najmałodšym dziciem Albierta II.
«[Jamu] stali viadomyja vyniki DNK-testu, i navukovaje zaklučeńnie pakazvaje na toje, što jon — bijałahičny baćka spadaryni Delfiny Boel», — havorycca ŭ aficyjnaj zajavie jurystaŭ 85-hadovaha eks-karala.
Čutki pra toje, što ŭ karala jość pazašlubnaje dzicia, chadzili ŭ Bielhii ad 1999 hoda, kali ŭ śviet vyjšła bijahrafija jaho žonki, karalevy Paoły.
Aŭtaram bijahrafičnaj pracy staŭ 18-hadovy vučań škoły Maryjo Daniłs, jaki nazyvaŭ siabie historykam. Niahledziačy na iaho maładość i nieprafiesijanalizm, haziety ŭchapilisia za jaho zdahadku ab pazašlubnych pryhodach karala.
U 2005 hodzie ŭ intervju presie Delfina Boel zajaviła, što jana i jość toje samaje pazašlubnaje dzicia. Ale zrabić dalejšaja kroki jana nie mahła, bo karol mieŭ imunitet ad sudovych razhladaŭ.
Baraćba za aficyjnaje pryznańnie baćkoŭstva stała mahčymaj tolki ŭ 2013-m, kali paśla 20-hadovaha kiravańnia Albiert II vyroksia tronu pa stanie zdaroŭja i, adpaviedna, pazbaviŭsia imunitetu.
Maci Delfiny, baranesa Sibiła de Selis Łanšan raspaviała, što jaje raman z tady jašče pryncam Albiertam doŭžyŭsia pamiž 1966 i 1984 hadami.
U 2018 hodzie sud pryznačyŭ Albiertu II termin u try miesiacy, na praciahu jakich jon pavinien byŭ dać uzor dla hienietyčnaj ekśpiertyzy. Adnak były manarch admaŭlaŭsia prachodzić DNK-test, pakul sud nie pastanaviŭ spahaniać ź jaho pa 5 tysiač jeŭra za kožny dzień praterminoŭki.
«Usio jaje žyćcio było načnym kašmaram z-za taho, što jana sprabavała vyśvietlić svaju identyčnaść. […] U jaje byŭ bijałahičny baćka, jaki žorstka adprečyŭ jaje, kali historyja pra jaho baćkoŭstva stała zdabytkam hramadskaści», — patłumačyŭ advakat Boel.
Pavodle jaho słoŭ, jaho klijentka navažyłasia na sudovuju ciažbu, kab pazbavić svaich dziaciej ad ciažaru niapeŭnaj situacyi, ź jakoj doŭha žyła sama.
Pavodle niekatorych źviestak, štohadovy dachod Albierta II składaje kala miljona jeŭra.
Eks-manarch maje namier uklučyć Boel u zaviaščańnie na roŭnych pravach z astatnimi tryma dziećmi.
