Pavieł Šaramiet, fota Radyjo Svaboda
U spravie zabojstva ŭ Kijevie biełaruskaha žurnalista Paŭła Šaramieta śledčyja majuć namier prasić Ofis hienprakurora ab praciahu terminaŭ dasudovaha śledstva, piša RBK — Ukraina.
Jak adznačyŭ prakuror pa spravie Siarhiej Zuzak, termin dasudovaha rasśledavańnia zaviaršajecca 12 lutaha. Adnak jaho mohuć padoŭžyć da červienia 2020 hoda. U pryvatnaści, pa słovach prakurora, heta nieabchodna «dla ŭstalavańnia iściny ŭ spravie».
«Jašče treba pravieści dadatkovyja śledčyja dziejańni, ekśpiertnyja daśledavańni, u tym liku — ekśpierymienty, dopyty i h.d.», - skazaŭ Zuzak.
Jak viadoma, 12 śniežnia zatrymali padazravanych u zabojstvie Paŭła Šaramieta, jaho mašynu ŭzarvali ŭ Kijevie 16 lipienia 2016 hoda.
Zatrymanymi apynulisia troje vieteranaŭ vajny na Danbasie. Pavodle śledstva, arhanizataram hrupy byŭ rok-muzyka Andrej Antonienka, da jakoha paźniej dałučylisia doktar-vałancior Julija Kuźmienka i Jana Duhar. Apošniuju adpravili pad kruhłasutačny chatni aryšt da 8 lutaha.
