Pavodle śledztva, kiraŭnica dziciačaj ustanovy ŭciahnuła ŭ złačynnuju schiemu paboraŭ 16 supracoŭnic. Ich pryznali paciarpiełymi. Byłaja zahadčyca viny nie pryznała, paviedamlaje Radyjo Svaboda.
Byłuju zahadčycu dziciačaha sadka № 19 z Kryčava Ału Pastuchovu Čerykaŭski sud pryznaŭ vinavataj u złoŭžyvańni ŭładaju, pieravyšeńni słužbovych paŭnamoctvaŭ z karyślivych intaresaŭ, a taksama sprobie kradziažu dziaržaŭnaj majomaści.
Sudździa Alaksandar Kraŭčanka pakaraŭ Pastuchovu źniavoleńniem u kalonii ahulnaha režymu na 2,6 hoda i štrafam 1350 rubloŭ (50 bazavych vieličyniaŭ). Joj taksama na 3 hady zabaranili zajmać kiroŭnyja i administracyjna-haspadarčyja pasady. Paśla prysudu Pastuchovu ŭziali pad vartu. Jana maje 10 dzion, kab abskardzić vyrak.
28 studzienia paciarpiełyja padtrymali zvarot prakurora Mikałaja Rozancava da sudu, kab Pastuchovu pakarali 4 hadami źniavoleńnia ŭ kalonii ahulnaha režymu.
Pavodle vyraku, dziejańni abvinavačanaj nanieśli škodu pravam hramadzian dy dziaržaŭnym intaresam u bujnym pamiery: bolš za 10 tysiač rubloŭ. Pavodle prakurora Rozancava, Pastuchova sprobaŭ kampensavać škodu za čas śledztva i sudovaha razboru nie rabiła.
Što vyśvietliŭ sud
- Pastuchova arhanizavała na «pastajannaj systemnaj asnovie» źbirańnie hrošaj ad padnačalenych. Im vypłačvałasia materyjalnaja dapamoha, bolšuju častku jakoj jany addavali joj. Suma vahałasia ad 25 da 120 rubloŭ.
- Źbirała hrošy, nia viedajučy, što heta niezakonna, spravavod dziciačaj ustanovy. Jana ž i paviedamlała supracoŭnikam sadka, jakuju sumu jany pavinny pieradać praź jaje Pastuchovaj. Takaja schiema paboraŭ dziejničała z 2015-ha pa 2018 hod.
- Pastuchova davała ŭkazańni padnačalenym, kab tyja dapamahali ŭ pracoŭny čas pa haspadarcy jaje sastarełamu baćku, ramantavali jejnuju kvateru dy daču. Akramia taho, prybiralnica vaziła ŭ Mahiloŭ hrošy i charčy «niavyśvietlenamu rodziču» Pastuchovaj. Pavodle paciarpiełaj, heta była dačka abvinavačanaj.
- U tabeli ŭliku pracoŭnaha času tym, chto vykonvaŭ daručeńni Pastuchovaj, paznačałasia, što jany byli ŭ sadku i atrymlivali zarobak, jak za vykanańnie słužbovych abaviazkaŭ.
- Pastuchova prysabiečvała budaŭničyja materyjały, jakija vydzialalisia na ramont dziciačaj ustanovy. Śledčyja vyjavili kradzienaje ŭ na jaje dačy dy ŭ padvale sadka. Hetyja dziejańni abvinavačanaj kvalifikavali jak zamach na złačynstva.
Ała Pastuchova ŭ apošnim słovie skazała, što padčas śledztva na jaje psychalahična cisnuli, kab pryznała vinu. Raili źviarnucca pa pamiłavańnie da Alaksandra Łukašenki.
«Ja budu adstojvać svaju pazycyju, čaho mnie b heta nie kaštavała, — kazała jana. — Heta rysa luboha adukavanaha čałavieka i stałaj asoby».
Jak vynikała ź jejnaha vystupu, hrošy, jakija jana źbirała z padnačalenych, išli na «padtrymku pieradavoha statusu» dziciačaj ustanovy. Biudžetnych srodkaŭ na heta nie chapała. Pavodle abvinavačanaj, dla siabie jana «prymała stolki hrašovych srodkaŭ», kolki ŭkładała ŭ sadok ułasnych. Mety nažycca ŭ jaje nie było.
Advakat Pastuchovaj zajaviŭ, što dokazy viny padabaronnaj sumnieŭnyja. Pavodle jaho, dokaznaja baza «złačynnaj dziejnaści» Pastuchovaj abapirajecca tolki na pakazańni paciarpiełych i śviedak, jakija śledztva dapasoŭvała da patrebnaha jamu vyniku. Advakat prasiŭ sud vynieści apraŭdalny prysud abvinavačanaj praz adsutnaść składu złačynstva.
Pastuchovu zatrymali 27 sakavika 2019 hodu. 7 miesiacaŭ jana adsiedzieła ŭ Mahiloŭskim śledčym izalatary. Potym jaje pieraviali pad chatni aryšt.
Ała Pastuchova stała zahadčycaj dziciačaha sadku ŭ 2002 hodzie. Za čas pracy ŭ sfery adukacyi jaje 35 razoŭ adznačali hramatami i dyplomami. Maje taksama padziaku ad Alaksandra Łukašenki. U 2014 hodzie joj prysudzili zvańnie «Čałaviek hodu» i ŭšanavali partretam na rajonnaj došcy honaru. Niaźmienna staršyniavała va ŭčastkovych kamisijach padčas vybarčych kampanij.
Padnačalenyja charaktaryzujuć Pastuchovu jak uładnuju, žorstkuju i patrabavalnuju kiraŭnicu. Nia vykanać jaje patrabavańni aznačała sustrecca ź ciskam, pieraduziatym staŭleńniem dy pahrozaj, što nie praciahnuć pracoŭny kantrakt, kazali jany.
Nieŭzabavie paśla zatrymańnia Pastuchovaj 8 krasavika patanuła jaje 41-hadovaja padnačalenaja Natalla Jalcova. U sadku jana pracavała defektolaham. Pavodle niekatorych krynic, niabožčyca pakinuła pieradśmiarotnuju zapisku. Na bierazie raki Sož byli znojdzienyja taksama rečy 78-hadovaj maci patanułaj. Cieła maci dahetul nia adšukali.
«Sprava patanułaj nie źviazanaja z kryminalnaj spravaj, jakuju zaviali ŭ dačynieńni da jaje byłoj načalnicy», — kazali Svabodzie va ŭpraŭleńni Śledčaha kamitetu Mahiloŭskaj vobłaści.
U apošnim słovie Ała Pastuchova kazała, što «duža pieražyvaje za śmierć Natalli Jalcovaj», bo taja «była bližejšaj, čym chto inšy z kalektyvu».
Pavodle Pastuchovaj, niabožčyca chacieła jaje abaranić, «ale nie zmahła». Zahadčyca zajaviła, što choča atrymać adkaz, čamu jaje nie dapytali pa fakcie śmierci padnačalenaj.
