Šeść tysiač čałaviek na borcie kruiznaha łajniera ŭ Italii nie mohuć syści na bierah, paśla taho jak u adnoj pasažyrki z Makaa vyjavili simptomy virusnaj infiekcyi. Pieršyja vyniki analizaŭ nie paćvierdzili, što ŭ jaje karanavirus, paviedamlaje BBC.
54-hadovaja kitajanka i jaje muž časova izalavanyja na borcie sudna «Kosta Śmieralda», jaki ździajśniaŭ kruiz pa Mižziemnym mory i ciapier pryšvartavaŭsia ŭ porcie Čyvitaviekja niepadalok ad Ryma.
Nikomu z astatnich pasažyraŭ ułady taksama nie dazvolili pakinuć sudna, uklučajučy bolš za 1000 čałaviek, u jakich kruiz skončyŭsia.
Jość na łajniery i biełarusy. Heta Alaksandr Miłašeŭski i jaho žonka Alena, paviedamlaje Tut.by.
23 studzienia na kruiznym łajniery kampanii Costa Crociere para adpraviłasia ŭ padarožža pa Mižziemnym mory. Pabyvali ŭ Italii, Ispanii, Francyi i siońnia ŭ 7.30 ranicy viarnulisia ŭ port horada Čyvitaviekja.
Administratar skazała Alaksandru, što ŭsim zabaroniena pakidać łajnier. I papiaredziła: čakajcie dalejšych instrukcyj, ale kolki čakać — nie patłumačyła.
— Adrazu paviedamlali, što pravierka zaciahniecca dzieści na paŭhadziny. Ludzi sabralisia bližej da vyjściaŭ, ale ŭsio heta ciahniecca dahetul, — apisvaje situacyju turyst. — Pra toje, što heta karanavirus, nie paviedamlajuć. Adzin raz nazvali 2 kitajskija proźviščy i paprasili hetych turystaŭ padyści na resiepšn. Ciapier kažuć, što sanitarnaja pravierka pravodzicca ŭ suviazi ź situacyjaj, jakaja skłałasia ŭ śviecie. Nibyta vyniki probaŭ buduć viadomyja tolki ŭviečary. Heta značyć, da hetaha času my ŭsio jašče budziem znachodzicca na łajniery. Pašpartoŭ u nas usio jašče niama. Masak dla abarony nam taksama nie vydali.
Turbuje biełarusaŭ i toj fakt, što a 16.00 (a 18.00 pa minskim časie) jany pavinny byli vylecieć z Ryma ŭ Vilniu.
— Na samalot my ŭžo spaźnilisia, ale ni pra jakija kampiensacyi nichto nie kaža. Kvitki kaštujuć 300-400 jeŭra, — kaža surazmoŭca.
