Ministerstva pramysłovaści Kitaja razasłała zvarot da kampanij, jakija zajmajucca raspracoŭkami ŭ halinie štučnaha intelektu (ŠI), z zaklikam dapamahčy ŭ baraćbie z uspyškaj novaha karanavirusa, jaki vyklikaje ŭ ludziej ciažkuju pnieŭmaniju. Kitajskija kampanii ŭ adkaz adna za adnoj śpiašajucca pachvalicca novymi technałohijami.

Kampanija Megvii, jakaja śpiecyjalizujecca na technałohijach raspaznavańnia tvaraŭ, u aŭtorak zajaviła, što z dapamohaj ministerstvaŭ pramysłovaści i navuki raspracavała novy mietad vyjaŭleńnia i apaznańnia ludziej z pavyšanaj tempieraturaj. Jaje «ŠI-sistema vymiareńnia tempieratury» rehistruje tempieraturu cieła ludziej ciepłavymi kamierami i adnačasova vykarystoŭvaje mietady apaznańnia čałavieka pa tvary i ciele. Hetuju sistemu ŭžo teścirujuć u adnym z rajonaŭ Piekina, paviedamlaje ahienctva «Rojterz».

Inšaja pieradavaja ŠI-kampanija SenseTime udaskanaliła anałahičnuju sistemu, pryznačanuju dla vykarystańnia na ŭvachodach u budynki. Jaje navatarstva ŭ tym, što jana zdolnaja identyfikavać ludziej, navat kali jany ŭ maskach. (Ciapier u haradach Kitaja ludziam biez masak chadzić nie rekamiendujuć.)

Vytvorca kamier videanazirańnia Zhejiang Dahua harantuje, što jaho infračyrvonyja kamiery zdolnyja rehistravać tempieraturu, pavyšanuju ŭsiaho na 0,3 ºC.

Kitajcy, jakija znachodzilisia ŭ kantakcie z nośbitam chvaroby, raskazvajuć, što im zabaroniena vychodzić z doma. Adzin čałaviek raskazaŭ, što, kali jon vyrašyŭ prahulacca ŭ park, jamu praź niekalki chvilin patelefanavali z palicyi. Sistema abjadnanych videakamier identyfikavała jaho, infarmacyja pra heta adrazu pastupaje ŭ MUS. Paralelna sihnał pra «niapravilny» ŭčynak čałavieka byŭ adpraŭleny na miesca jahonaj pracy.

Ale najbolš kitajski Vialiki Brat siońnia zaniaty cenzuraj «padryŭnych» paviedamleńniaŭ u sacyjalnych sietkach. Zabaroniena «raspaŭsiudžvać čutki», «siejać paniku» i «zamachvacca na asnovy hramadskaha paradku». Trahičnym simvałam novaj epidemii va ŭmovach ličbavaj dyktatury staŭ doktar Li Veńlań.

30 śniežnia mužčyna napisaŭ paviedamleńnie ŭ čacie z byłymi adnahrupnikami z papiaredžańniem, što ŭ jaho balnicu trapili siem čałaviek ź simptomami atypovaj pnieŭmanii.

Na nastupny dzień, 31 śniežnia, miascovyja ŭłady vyklikali Li Veńlania dla tłumačeńniaŭ.

Palicyja abvinavaciła Li ŭ «raspaŭsiudzie čutak» i «surjoznym parušeńni hramadskaha paradku». Jaho i jašče siem daktaroŭ zatrymali. Tolki 20 studzienia ŭłady Kitaja pryznali, što novy karanavirus pieradajecca ad čałavieka da čałavieka. 28 studzienia doktara Veńlania reabilitujuć, ale pozna: ad 12 studzienia ŭ jaho raźvilisia simptomy chvaroby, 7 lutaha jon nie vytrymaŭ. 

Mnohija naziralniki miarkujuć, što praŭdzivaja kolkaść chvorych u Kitai bolšaja, čym aficyjna paviedamlajecca, bolš i pamierłych ad novaj pnieŭmanii.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?