Čatyry zvyšskładanyja apieracyi byli praviedzienyja 7 i 8 lutaha ŭ RNPC dziciačaj chirurhii, paviedamlaje Ministersta achovy zdaroŭja.

Jak raspavioŭ dyrektar centra Kanstancin Drazdoŭski, byli zaprošanyja dzieci z samymi składanymi patałohijami, jakija patrabujuć praviadzieńnia apieracyi Rosa. Umiašańni prajšli pry niepasrednym udziele adnaho z samych viadomych i daśviedčanych kardyjachirurhaŭ śvietu, prafiesara Aŭksiendzijosa Kałanhosa, prezidenta Fondu Kałanhosa (Šviejcaryja).

«Heta redkaja apieracyja dla našaj krainy. Mienavita tamu my zaprasili prafiesara dla navučańnia našych supracoŭnikaŭ. Nieabchodna padniać u nas uzrovień chirurhii hetaha paroku», — skazaŭ Kanstancin Drazdoŭski, dadaŭšy, što padobnyja paroki raźvićcia štohod sustrakajucca ŭ niekalkich biełaruskich dziaciej.

Prafiesar pahadziŭsia pravieści niekalki majstar-kłasaŭ, tamu biełaruskija dziciačyja kardyjachirurhi padabrali samyja składanyja vypadki, adzin ź jakich apynuŭsia ŭnikalnym. Pa słovach prafiesara, takaja anatomija, ź jakoj 7 lutaha sutyknulisia lekary, sustrakajecca vielmi redka.

«U hetaj apieracyi redka, ale sustrakajecca krytyčny momant, jak heta było, naprykład, u adnaho ź dziaciej. Kali pierasiekčy niapravilna, budzie šmat uskładnieńniaŭ, u tym liku išemija. Na ščaście, nam udałosia pravieści apieratyŭnaje ŭmiašańnie biez uskładnieńniaŭ», — adznačyŭ Aŭksiendzijos Kałanhos.

U suśvietnaj praktycy apieracyju Rosa vykonvajuć radziej, čym pierasadku serca. Jana vielmi składanaja i patrabuje kałasalnaha vopytu chirurhaŭ. «U Jeŭropie i ZŠA ŭsiaho niekalki admysłovych centraŭ, jakija robiać apieracyi takoj składanaści. Ja vielmi rady, što my z doktaram Drazdoŭskim pačynajem prahramu pa vykanańni apieracyj Rosa ŭ Biełarusi. Mianie ŭraziła praca doktara Drazdoŭskaha i jaho kaleh», — skazaŭ prafiesar.

«My pracujem z prablemaj patałohii aartalnaha kłapana. Zvyčajna pry naradžeńni pravodzim apieracyju, jakaja robić krychu lahčejšym žyćcio malaniaci, ale istotna dapamahčy dziciaci moža tolki apieracyja Rosa. Jana pravodzicca tolki tady, kali z aartalnym kłapanam užo bolš ničoha niemahčyma zrabić», — adznačyŭ Kanstancin Drazdoŭski. Jon patłumačyŭ, što ŭ hetym vypadku lohačny kłapan ušyvajecca zamiest aartalnaha, a na miesca lohačnaha stavicca admysłovy bijałahičny pratez.

Apieracyi składalisia ź niekalkich častak, daktaram davodziłasia spyniać serca kožnaha małoha. U takich umiašańniach prymaje ŭdzieł kamanda z 15 śpiecyjalistaŭ. Pośpiech šmat u čym zaležyć ad taho, jak buduć praviedzienyja aniestezija, štučny krovazvarot, jakim budzie vychodžvańnie ŭ adździaleńni reanimacyi.

Padobnaja apieracyja ŭ Biełarusi vykonvałasia ŭ 11-miesiačnaha dziciaci, jaje praviali kala 10 hadoŭ tamu. Tady dapamohu akazali amierykanskija kalehi. Druhaja ŭ terminovym režymie była praviedziena biełaruskamu dziciaci ŭ kancy červienia 2019 hoda. Siońnia, darečy, stała viadoma, što ŭ Minsk ź Viciebska budzie dastaŭlenaje jašče adno dzicia, jakoje maje terminovuju patrebu ŭ takoj apieracyi. 9 lutaha pierad adlotam prafiesar i kamanda biełaruskich kardyjachirurhaŭ praapierujuć i jaho.

Siońnia adbyłasia sustreča ministra achovy zdaroŭja Uładzimira Karanika z prafiesaram Aŭksiendzijosam Kałanhosam i Kanstancinam Drazdoŭskim.

Abmiarkoŭvalisia pytańni dalejšaj supracy, u tym liku mahčymaść praviadzieńnia sieryi majstar-kłasaŭ dla biełaruskich dziciačych kardyjachirurhaŭ.

Taksama havorka viałasia pra praviadzieńnie sumiesnych navukovych daśledavańniaŭ i publikacyi u halinie dziciačaj kardyjachirurhii.

Клас
0
Панылы сорам
0
Ха-ха
0
Ого
0
Сумна
0
Абуральна
0