Indyjski fatohraf-amatar Anił Prabchakar sfatahrafavaŭ aranhutana na adnoj ź indaniezijskich vyspaŭ, jon praciahvaŭ ruku čałavieku, jakoha amal pa hrudzi zasmaktała raka. «U toj čas, jak u čałavieku pamiraje čałaviečnaść, niekatoryja žyvioły viartajuć nas da našych vytokaŭ», — padpisaŭ jon zdymak. Za niekalki dzion kadr spadabaŭsia bolš jak 45 000 čałaviek.

U kamientary CNN Prabchakar, hieołah ź indyjskaha štata Kierała, rastłumačyŭ: čałaviek na fota — supracoŭnik Fondu abarony aranhutanaŭ Kalimantana (adnaho z najbujniejšych astravoŭ Indaniezii — red.). Jon šukaŭ u race atrutnych źmiej, jakija źjaŭlajucca pryrodnymi drapiežnikami dla prymataŭ.

U hety momant aranhutan padyšoŭ da supracoŭnika fondu i praciahnuŭ ruku. Pa słovach Prabchakara, zdavałasia, što žyvioła pytajecca: «Dapamahčy?»

Adnak supracoŭnik nie schapiŭ aranhutana za ruku i vyjšaŭ sam z raki. Jon patłumačyŭ, što heta ŭsio ž dzikaja žyvioła, tamu nieviadoma, jak jana mahła b reahavać.

Usia padzieja doŭžyłasia try-čatyry chviliny. «Ja tak rady, što staŭ śviedkam hetaha momantu», — skazaŭ mužčyna ŭ kamientary CNN.

Aranhutan źjaŭlajecca adzinym vialikim prymatam u Azii. Pa dadzienych Fondu abarony aranhutanaŭ Kalimantana, jany pražyvajuć pieravažna na indaniezijskich vyspach Kalimantan i Sumatra.

Za apošnija try pakaleńni papulacyja aranhutanaŭ skaraciłasia bolš čym na 80% z-za pažaraŭ i palavańnia. Akramia taho, jany pavolna razmnažajucca: u naturalnych umovach samka-aranhutan naradžaje tolki kožnyja 6—8 hadoŭ, paviedamlaje fond.

Клас
0
Панылы сорам
0
Ха-ха
0
Ого
0
Сумна
0
Абуральна
0