Piaty prezident Ukrainy Piatro Parašenka nazvaŭ minskija pieramovy 12 lutaha 2015 hoda «najžachliviejšaj nočču» ŭ žyćci. U kałoncy dla «Ukrainskaj praŭdy» palityk zajaviŭ, što pierad pieramovami jon jeździŭ u Kramatorsk Danieckaj vobłaści. 10 lutaha 2015 hoda tam u rakietnaj atacy zahinuli 17 čałaviek, piša «Radyjo Svaboda».

«Stamlalny 19-hadzinny marafon z [prezidentam Rasii] Pucinym, chałodnym, žorstkim i hłyboka varožym da Ukrainy «pieramoŭnikam» — heta ništo ŭ paraŭnańni z uzrušeńniem, jakoje vypała pierad tym pieražyć uschodnieŭkrainskamu horadu», — piša Parašenka.

Jon ličyć, što kramatorskaja trahiedyja «nie kranuła nivodnaj struny» ŭ dušy Pucina.

«Paśla [były prezident Francyi] Fransua Aland napiša, jak «šmat razoŭ Parašenka i Pucin padymali hołas adzin na adnaho». Tak, heta była najžachliviejšaja noč u maim žyćci. Adnak vyrašalnaja dla taho, kab strymać ahresara… Klučavaja zadača Minska-2 palahała ŭ tym, kab spynić nastup rasijskich rehularnych vojskaŭ, praduchilić akružeńnie našych sałdat, vyratavać žyćci tysiač ludziej, vajskoŭcaŭ i cyvilnych asobaŭ», — uspaminaje piaty prezident.

Pavodle jaho, Pucin nastojvaŭ, što 8 tysiač ukrainskich vajskoŭcaŭ — u akružeńni.

«My adnaznačna zajavili, što nijakaha akružeńnia niama, a našy zbroi nie składuć. Ale, kab pierakanać u hetym usich udzielnikaŭ sustrečy, ukrainskaja delehacyja na niejki čas pieramiaściłasia ŭ asobnaje pamiaškańnie. Adtul praź liniju zakrytaj suviazi my kantaktavali z Hienštabam. Urešcie atrymali jasnaje paviedamleńnie, što našy praciahvajuć abaronu pa linii, vyznačanaj u Minsku 19 vieraśnia 2014 hoda, i akružeńnia nie dapuściać», — skazaŭ Parašenka.

Na jaho dumku, Pucin «ciahnuŭ čas», kab ukrainskija vajskoŭcy byli akružanyja i źniščanyja, albo «ŭ najlepšym vypadku» — razzbrojenyja i zachoplenyja ŭ pałon. Niahledziačy na heta, Maskva ŭrešcie pahadziłasia na prypynieńnie ahniu z 15 lutaha.

«Hałoŭnaje, što mienskija pahadnieńni dali Ukrainie — heta kaštoŭny čas. Čas dla sistemnaha raźvićcia armii. Čas zasiarodzicca na pieraadoleńni sacyjalnaha kryzisu, vyklikanaha vajnoj i błakavańniem dostupu ŭkrainskich tavaraŭ na rasiejski rynak. Čas dla taho, kab umacavać mižnarodnuju kaalicyju ŭ padtrymku Ukrainy. Čas, kab stvaryć i ŭtrymlivać sankcyjny miechanizm suprać Rasii», — zajaviŭ były prezident.

Клас
0
Панылы сорам
0
Ха-ха
0
Ого
0
Сумна
0
Абуральна
0