Jak vysokija technałohii pavyšajuć rentabielnaść biełaruskaj pramysłovaści i jakija prajekty buduć zapatrabavanyja ŭ epochu Industryi 4.0? U Parku vysokich technałohij za kruhłym stałom abmierkavali pytańni ličbavizacyi nacyjanalnaj ekanomiki. Udzieł u dyskusii ŭziali dyrektar administracyi PVT Usievaład Jančeŭski, ministr pramysłovaści Pavieł Uciupin i kiraŭniki kampanij-rezidentaŭ PVT.

Siońnia bolš za 200 kampanij Parku vysokich technałohij pracujuć na ŭnutranym rynku ŭ intaresach biełaruskich pradpryjemstvaŭ, i, jak adznačyŭ dyrektar PVT Usievaład Jančeŭski, abjomy hetaj raboty za dva apošnija hady vyraśli amal u try razy: «Park vysokich technałohij prapanuje biełaruskim pradpryjemstvam šyroki śpiektr ličbavych praduktaŭ, nieabchodnych dla pavyšeńnia kankurentnazdolnaści i rentabielnaści pramysłovaj haliny — tut i štučny intelekt, i dapoŭnienaja realnaść, i chmarnyja rašeńni pa intehracyi cełych halin. Abmiarkoŭvać ličbavizacyju pramysłovaści važna nie tolki dla budučyni, ale ŭžo i dla ciapierašniaha času našaj krainy».

U chodzie mierapryjemstva rezidenty PVT prademanstravali svaje raspracoŭki, jakija ŭžo paśpiachova vykarystoŭvajucca ŭ biełaruskaj pramysłovaści. Kampanija Feeling Digital z dapamohaj technałohij virtualnaj realnaści pakazała etapy zborki 450-tonnaha samazvała BiełAZ i praviała ličbavuju ekskursiju pa karjeru. Zasnavalniki prajektu VibroBox raspaviali pra pieravahi «razumnaj» vibradyjahnostyki techničnaha stanu abstalavańnia. Akramia taho, byli prezientavanyja vysokatechnałahičnyja rašeńni, zdolnyja ŭ budučyni pavysić efiektyŭnaść i značna spraścić rabotu pramysłovych pradpryjemstvaŭ.

U svaju čarhu Pavieł Uciupin padkreśliŭ, što supracoŭnictva z Parkam vysokich technałohij — važny napramak dla Ministerstva pramysłovaści: «My abaviazany kiravacca suśvietnymi trendami ŭ vytvorčaści toj techniki, jakuju pradajom. Tamu pradpryjemstvy aktyŭna zajmajucca ličbavizacyjaj».

Клас
0
Панылы сорам
0
Ха-ха
0
Ого
0
Сумна
0
Абуральна
0