Samaja hučnaja kryminalnaja sprava Rasii apošniaha času — tak zvanaja sprava «Sietki». Jana naŭprost nie datyčyć Biełarusi, tamu nie vyklikała vialikaha rezanansu ŭ našaj krainie.
U roznych haradach Rasii ŭ 2017 hodzie aryštavali 11 čałaviek. Spačatku zatrymali chłopca z narkotykami. Kab vyjści na svabodu, jon daŭ pakazańni na siabroŭ-anarchistaŭ, maŭlaŭ, jany stvaryli arhanizacyju «Sietka», chacieli z dapamohaj teraktaŭ destabilizavać abstanoŭku ŭ krainie i zładzić levuju revalucyju. Praŭda, u realnaści nie paśpieli zrabić ničoha, niezrazumieła navat, ci była ŭ hetaj «Sietki» choć niejkaja struktura i choć niejki płan.
Pad katavańniami (u tym liku elektryčnaściu) zatrymanyja pryznali svaju vinu, i choć u sudzie admovilisia ad raniejšych pakazańniaŭ, siamiora ź ich atrymali terminy ad 6 da 18 hadoŭ źniavoleńnia.
Čytajcie. Fihurantam spravy pa tak zvanaj terarystyčnaj hrupie «Sietka» ŭ Rasii dali ahramadnyja terminy — ich pryznali palitviaźniami
U abaronu anarchistaŭ paŭstała ŭsio hramadstva — katavać nielha nikoha. Ich abvieścili palitviaźniami.
Adnak situacyja źmianiłasia, kali libieralnaje vydańnie «Mieduza» apublikavała dadatkovaje rasśledavańnie pa temie. Jaho aŭtar — žurnalist Maksim Sołapaŭ, sam niekali aktyvist anarchisckaha ruchu, stalinist pa pohladach.
Jon zapeŭnivaŭ, što źviazaŭsia ź siabram asudžanych anarchistaŭ, Alaksiejem Pałtaŭcom, jaki paśpieŭ uciačy va Ukrainu.
Pałtaviec pryznaŭsia, što čaćviora fihurantaŭ spravy «Sietki» byli datyčnyja da narkahandlu ŭ Pienzie, a taksama da zabojstva dvuch paplečnikaŭ, zakachanaj pary Arcioma Darafiejeva i Kaciaryny Leŭčanka.
Na «Mieduzu» abrynuŭsia škvał krytyki, bo abvinavačvańnie ŭ zabojstvie nie było padmacavana ničym, aproč manałoha ŭciekača Pałtaŭca. Ale hałoŭnaje, što va ŭdzielnikaŭ «Sietki» sfarmiravaŭsia pazityŭny imidž pakutnikaŭ, jaki raźbivaŭsia hetym artykułam. Vydańnie abvinavacili ŭ suviaziach sa śpiecsłužbami.
Karykatura na «Mieduzu», jakaja źjaviłasia paśla hetaha artykuła
«Mieduza» tym nie mienš praciahvała hnuć svaju liniju i apublikavała jašče adzin manałoh Pałtaŭca, na hety raz z padrabiaznaściami zabojstva.
Sam Pałtaviec, maŭlaŭ, pryvioŭ u vykanańnie śmiarotny prysud Darafiejevu, vyniesieny hramadoj. Jon streliŭ u chłopca, ale niešta pajšło nie tak, tamu paśla pierarezaŭ jamu šyju. A Kaciarynu zadušyli šalikam.
Pryčynaj zabojstva maładzionaŭ stała toje, što jany mahli raskazać palicyi pra datyčnaść astatnich aktyvistaŭ da narkahandlu.
Zabitaja Kaciaryna Leŭčanka.
Cieła Darafiejeva znajšli jašče raniej, a Leŭčanka ŭsio jašče ličyłasia źnikłaj bieź śledu.
Vyhladaje, što infarmacyja Pałtaŭca akazałasia praŭdzivaj. Palicyja pačała pošuki na miescy, ukazanym Pałtaŭcam. Tam znajšli trup zabitaj Kaciaryny Leŭčanka i toj šalik, pra jaki jon zhadvaŭ u svaim manałohu.
