Pieršaja sustreča i pieršaje hałasavańnie pa adzinym kandydacie ad apazicyi adbylisia ŭ nievialikim rajcentry Haradok na poŭnačy Viciebskaj vobłaści.
Vyjezd ź Minska pryznačyli na 13:00 ad handlovaha centra «Manietačka» — heta pobač z Kamaroŭskim rynkam i lehiendarnym punktam prodažu šaŭrmy «Miraž». Ciapier u hetym budynku svaje ofisy zdymajuć i Ruch «Za Svabodu», i BSDP.
Dla pajezdak pa rehijonach apazicyja źniała mikraaŭtobus «Reno» šeraha koleru. Praŭda, tut pačalisia prablemki: admaŭlałasia vyklučacca sihnalizacyja. «Nie možacie spravicca z mašynaj, a chočacie kiravać krainaj», — zaśmiajaŭsia Juraś Hubarevič. Jahonaje siamichvilinnaje spaźnieńnie na fonie prablemaŭ z aŭtamabilem prajšło zusim niezaŭvažna.
Užo na miescy vyśvietliłasia, što jechać adnym mikrykam usie kandydaty nie zachacieli. U pryvatnaści Pavieł Sieviaryniec i Alaksiej Janukievič źjechali raniej, pry hetym navat nikoha nie papiaredzili. Što ž — majuć prava, ale takoje rašeńnie sustreła tolki nieparazumieńnie astatnich udzielnikaŭ prajmieryz.
Mikałaj Kazłoŭ ščyra pryznaŭsia, što nie viedaŭ pra isnavańnie takoha rajcentru, jak Haradok da hetaj pajezdki. «Dumaju, što ja haradoŭ dziesiać sa sta piatnaccaci biełaruskich nie viedaju, mała jeździŭ pa krainie», — kaža pradstaŭnik AHP.
Uvohule Mikałaj Kazłoŭ, zdajecca, najmienš z usich astatnich palitykaŭ, što ŭviazali ŭ prajmieryz, zakłapočany niejkim svaim imidžam, jak jon vyhladaje i što havoryć. Prafiesijnaj «palityki» ŭ Kazłova niamnoha. I niezrazumieła, ci heta budzie ŭsprymacca ŭ plus vybarcami, ci naadvarot u minus.
Volha Kavalkova pryjšła ŭ jarkim čyrvonym palito i biełaśniežnaj sukiency. U Volhi znoŭ novy manikiur, u darozie na zapraŭkach jana paśpiavała farbavać vusny. Z saboj u darohu adzinaja niezaležnaja kandydatka ŭziała smažanych areškaŭ. «Častujciesia, sama hatavała», — zaprašaje jana. Kavalkova ŭpeŭniena i biezapielacyjna sieła na piaredniaje siadzieńnie.
Za styrno aŭtamabila sieŭ lidar Partyi «Zialonyja» Źmicier Kučuk. I choć jahonaja partyja nie biare niepasrednaha ŭdziełu ŭ prajmieryz, tym nie mienš sam Kučuk dapamahaje čym moža. Mienavita jon uziaŭ na siabie mnohija arhanizacyjnyja momanty. Naprykład, arhanizacyju sajta dla internet-hałasavańnia. Abiacaje, što sajt zapracuje ŭžo 12 sakavika.
«Ujavim, što my jedziem, a tam na šašy Sieviaryniec ź Janukievičam stajać z prabitym kołam, prajedziem mima?» — śmiajucca ŭ sałonie.
«Usie, chto moh prabić, tut», — adžartoŭvajecca Kavalkova.
«Jašče Kanapackaja jość, ale Kanapackaja chutčej by koły Kazłovu prabiła».
«A samaje hałoŭnaje, što Kazłoŭ mienš za ŭsio havoryć pra Kanapackuju, ale skažycie mnie choć pra adnu kankretnuju spravu, jakuju jana zrabiła», — aburaŭsia Kazłoŭ.
«Zapłaciła hrošy», — paśmiajałasia Kavalkova. Samaironija — dobry pakazčyk.
Akazałasia, što nie ŭsie kandydaty navat viedali, dzie jany buduć načavać, kali Juraś Hubarevič ahučyŭ hetaje pytańnie, to byŭ ździŭleny, što načavać daviadziecca na niejkaj kvatery, jakuju znajšoŭ Sieviaryniec. Zdajecca, jon raźličvaŭ, što heta ŭsio ž budzie niejki hatelčyk.
U darozie Hubarevič i Kavalkova ŭziralisia ŭ svaje makbuki, Kazłoŭ časam niešta čytaŭ u svaim praściejšym płanšecie, a astatniuju častku darohi praspaŭ.
Darečy, daroha ad Lepiela da Haradka pakidaje žadać lepšaha. Vialikaja kolkaść vyboin, mašyna biaskonca skakała na takich «biełaruskich horkach».
Arhanizataram sustrečy vystupiŭ Leanid Haravy, jaki padziakavaŭ za toje, što mierapryjemstva adbyłosia, «razumieńniu miascovych uładaŭ». Sustreča adbyvałasia ŭ Domie dziciačaj tvorčaści ŭ samym centry Haradka, na scenie stajaŭ rajal, byli raźviešanyja bałoniki. «U nas nie dyktatura, kali prachodziać takija sustrečy, nichto im nie pieraškadžaje», — skazaŭ Haravy. Sapraŭdy, nijakaj cikavaści z boku siłavych orhanaŭ prajmieryz nie vyklikali.
Haradok byŭ dobraŭparadkavany da abłasnych «Dažynak — 2014», ale chutka ŭžo spatrebiacca novyja ŭkładańni. Centr horada pakidaje dobraje ŭražańnie, šmat šyldaŭ na biełaruskaj movie. Nad miascovym muziejem fluhier z Pahoniaj, aryhinalny pomnik Tarasu na Parnasie.
Vialikaj cikavaści sustreča ŭ žycharoŭ Haradka nie vyklikała. Ahułam pryjšło 8 čałaviek — heta ŭsio aktyvisty palityčnych partyj, jakija žyvuć tut. Vioŭ sustreču sustaršynia BCHD Vital Rymašeŭski.
Pra što havaryli kandydaty?
Sieviaryniec: Uładaj źjaŭlajecca narod, nie prezident, nie ludzi ź viertykali. U 2020 hodzie adbudziecca čarhovy śpiektakl, jakija ładziać Łukašenka i Jarmošyna. Za hetyja 26 hadoŭ nasielnictva źmienšyłasia na 800 tysiač čałaviek. Kraina vyjšła na pieršyja miescy ŭ śviecie pa ŭžyvańni ałkaholu, samahubstvach, žančynach u turmach. My bačym, jak miljon biełarusaŭ pracuje ŭ Rasii i na Zachadzie. Linija Stalina jość, a nacyjanalnaha ŭniviersitetu niama. My hatovyja pačynać masavyja mirnyja akcyi pratestu, kali Łukašenka budzie vyłučacca ŭ prezidenty.
Hubarevič: Pamiž nami niama istotnych pryncypovych razychodžańniaŭ. Ja sam z małoha haradka, i viedaju, jak ciažka ŭ małym horadzie znajści pracu, jak lohka atrymać «voŭčy bilet» praz čynoŭnikaŭ.
Kazłoŭ: Ja ŭ palitycy niadaŭna, ale z ambicyjami ŭ mianie ŭsio narmalna, jak i z pryncypami. Ja 17 hadoŭ raskryvaŭ złačynstvy, razboi, kradziažy, karupcyju. Na čym trymajecca Łukašenka? Na karupcyi, jakaja pranizvaje ŭsiu viertykal. Ja sapraŭdy dobry opier, dobry prafiesijanał. AHP na siońnia maje samuju pradumanuju prahramu reformaŭ.
Janukievič: U mianie niama stratehii pieramohi i zamieny Łukašenki ŭ 2020 hodzie. Ale vybary važnyja, bo dla mnohich ludziej jość tolki adna alternatyva Łukašenku — Pucin i Kreml. I nam treba prademanstravać, što isnuje inšaja alternatyva. Ja baču try kirunki dziejnaści: 1) svaboda, nacyjanalnaje adradžeńnie i ruch Biełarusi ŭ NATA i Jeŭrasajuz; 2) važna zavajavać davier internet-supolnaści, jakaja jašče nie da kanca hatovaja padtrymać apazicyju; 3) znajści padtrymku ŭ biznesu.
Kavalkova: Ja samy małady kandydat, mnie 36 hadoŭ. Ułada nas nie čuje, bo my jaje nie abirajem. Kali ŭładu pryznačaje adzin čałaviek, to jana nie adlustroŭvaje nastroi ludziej. 60 tysiač prostych biełarusaŭ siońnia falsifikujuć vybary. Ja zaklikaju ŭsich być siabrami ŭčastkovych kamisij.
Što cikaviła miascovych ludziej? Reforma ŭ siłavym błoku, toje, što ludziam razdajuć pašparty Rasii, ci budzie kankurentam adzinamu Kanapackaja?
«Na pravaachoŭnyja orhany prajadajecca vialikaja častka biudžetu. Pry hetym u krainie mizernyja zarobki, žabrackija piensii. My jak słavianskija niemcy, zakonapasłuchmianyja. My navat kali pratestujem i pierachodzim darohu na zialonaje śviatło», — skazaŭ Sieviaryniec.
«Abjadnać MNS, Pamiežny kamitet i MUS, čamu na Zachadzie čałaviek usio heta moža rabić, a ŭ nas nie? KDK — heta dziaržaŭny rekiet, prosta raspuścić ich. Pavinna być kantrolnaja pałata pry parłamiencie, hetaha dastatkova», — adkaz Hubareviča.
«Milicyi zanadta šmat, ale ja nie zhodny z Hubarevičam, što treba rabić viniehret. Milicyja pavinna być prafiesijnaj i kampaktnaj, a to ŭ nas milicyja ŭ dva razy bolšaja za armiju. My možam pieraraźmierkavać AMAP u vojska i na hetaj asnovie zrabić vojska», — prafiesijny pohlad Kazłova.
«Nielha padychodzić da taho, što milicyja darmajedy. Tam chapaje darmajedaŭ, ale jość prablema ŭčastkovych, jakich nie chapaje, jakija zahružanyja biurakratyčnaj pracaj, zamiest taho, kab šukać złačyncaŭ», — skazaŭ Janukievič.
Ahułam sustreča doŭžyłasia hadzinu dvaccać. Paśla hetaha prysutnyja pryniali ŭdzieł u hałasavańni. Biuleteni kidali ŭ prazrystyja skryni.
Prahałasavała stolki ž, kolki było vydadziena biuleteniaŭ — vosiem čałaviek. Hałasy padličvali adkryta. «Pakažam uładzie, jak pavinien adbyvacca padlik hałasoŭ», — skazaŭ Vital Rymašeŭski.
«Sieviaryniec Pavieł Kanstancinavič, Hubarevič Juryj Ivanavič», — staŭ ahučvać hałasy i demanstravać biuleteni Źmicier Kučuk. U vyniku minimalnaja pieramoha dastałasia Jurasiu Hubareviču, za jaho addali hałasy 4 čałavieki, za Sieviarynca — troje, jašče adzin za Janukieviča. Kazłoŭ i Kavalkova hałasoŭ nie atrymali.
7 sakavika ŭdzielniki prajmieryz pryjeduć u Viciebsk i Navapołack.
