Na pieršaje hałasavańnie pa abrańni adzinaha kandydata ad apazicyi ŭ Haradku (samaja poŭnač Viciebskaj vobłaści) pryjšło ŭsiaho vosiem čałaviek. Heta stała nahodaj dla šmatlikich žartaŭ u internecie. Dy i sami imaviernyja kandydaty byli, zdajecca, zasmučanyja.
Lidar AHP Mikałaj Kazłoŭ pa darozie z Haradka ŭ Viciebsk raskazaŭ pra sprečku, jakaja była ŭnutry partyi, kolki ž čałaviek pryjdzie na pieršaje spatkańnie. Sam Kazłoŭ staviŭ na 25 čałaviek, a pieramoh daśviedčany Leŭ Marholin z Barysava, jaki pastaviŭ na toje, što budzie mienš za 10 čałaviek.
Sam Kazłoŭ prapanoŭvaŭ navat admovicca ad małych haradoŭ na karyść bolšych. Kiraŭnik ruchu «Za svabodu» Juryj Hubarevič supakojvaŭ, što z časam usio pavinna źmianicca i ludziej pavinna pryjści bolš. Z hetkimi dumkami kandydaty i adpravilisia na načoŭku.
«Łožak byŭ žorstki, dy i ŭmovy nahadvali Akreścina», — śmiajaŭsia Hubarevič. A noč na niadzielu kandydaty praviaduć užo ŭ Navapołacku.
U Viciebsku sustreča adbyvałasia ŭ kanfierenc-zale ŭ hateli «Łučosa». Arenda kaštavała 120 rubloŭ, ale jana ŭklučała ŭ siabie i kava-paŭzu na 50 čałaviek. Zrešty, ludziej nabiłasia stolki, što na ŭsich nie chapiła kresłaŭ.
Navat kandydaty vyrašyli addać svaje, a sami vystupać stojačy. «Hladzicie, jakija ŭ nas kandydaty, Alaksandru Łukašenku kresły padnosiać, a našy svaje addajuć», — viaščaŭ Vital Rymašeŭski.
Jon znoŭ byŭ viadučym mierapryjemstva. U svajoj pramovie Rymašeŭski zaznačyŭ, što ŭpieršyniu ludzi sami abirajuć sabie kandydata, a nie padtrymlivajuć ci nie padtrymlivajuć taho, kaho adpravili ź Minska.
Udzielnikaŭ rehistravali až piaciora čałaviek, ale navat jany nie spraŭlalisia z takimi tempami, tamu pačatak sustrečy i zaciahnuŭsia. Bolšaść udzielnikaŭ prajmieryz usio ž byli piensijanierami, ale chapała i maładziejšych.
Volha Kavalkova dla sustrečy ŭ Viciebsku źmianiła adzieńnie: čyrvony pinžak, čornaja spadnica. Mikałaj Kazłoŭ ža apranuŭ na hety raz halštuk. Mienavita Kazłoŭ pavodle losavańnia pačaŭ vystupać pieršym.
Kiraŭnik AHP karotka raskazaŭ pra svaju bijahrafiju, sprava ŭ tym, što pierad mierapryjemstvam da jaho padychodzili ludzi i kazali, što ničoha pra jaho nie viedali.
«Za siamnaccać hadoŭ u milicyi ja raskryŭ bolš za tysiaču spraŭ. U 2008 hodzie ja złaviŭ staršyniu vybarčaj kamisii, jaki nočču ŭkidvaŭ biuleteni. Paśla taho, jak spravu nie zaviali, ja vyrašyŭ syści ź milicyi, choć moh tam pracavać jašče 5-7 hadoŭ. U 2010 hodzie staŭ čałaviekam hoda pavodle haziety «Naša Nivy».
Ja viedaju dakładna, što Łukašenka pavinien syści. I vybary — heta lehitymnaja mahčymaść dla hetaha», — skazaŭ Kazłoŭ.
«Kali my bačym stolki ludziej užo na druhoj sustrečy, to značyć jość zapatrabavanaść novych lidaraŭ», — pačaŭ vystup Juraś Hubarevič.
Cikava, što ŭ hety momant u zale źjavilisia piać sinich płakataŭ, na jakich było napisana «Hałasuju za Hubareviča!» Praŭda, ludzi ničoha nie vykrykvali, viali siabie cicha.
Padčas svajoj pramovy Juraś Hubarevič uručyŭ premiju imia Viktara Syrycy vićbiču Chrystaforu Žalapavu. Mienavita jon byŭ adnym z tych ludziej z płakatami.
Adzin z hledačoŭ na heta zapratestavaŭ, što ahitacyja ŭ dzień hałasavańnia pavinna być zabaronienaja. Hubarevič na heta zmaŭčaŭ.
Alaksiej Janukievič znoŭ skazaŭ, što nie budzie raskazvać pra toje, što apazicyja abaviazkova pieramoža na vybarach—2020. Asnoŭnaje, na što jon zrabiŭ akcent, heta praca paśla vybaraŭ.
«My možam zaniać novy płacdarm, kab dumać, jak u najbližejšyja hady pamianiać režym. Łukašenka hublaje padtrymku, ale papularnaść nabiraje Kreml i Maskva»,— heta tezisy kiraŭnika Partyi BNF.
Rymašeŭski acaniŭ jahonuju pramovu, jak «piesimistyčnuju, ci realistyčnuju, hledziačy ź jakoha boku pahladzieć».
Kali Sieviaryniec zapytaŭsia, chto ličyć vybary ŭ krainie svabodnymi i prapanavaŭ padniać ruki, to ŭ zale razdaŭsia śmiech.
Pramova Sieviarynca ničym nie adroźnivałasia ad taho, što jon havaryŭ u Haradku. Adzinaje, što Sieviaryniec nie prapuściŭ mahčymaści pravieści nievialiki mitynh.
«Davajcie skažam jamu: Łukašenka, sychodź». I ludzi družna adkazvali: «Sychodź». «I kali my z vami, u pieršuju čarhu mužčyny, abaroncy ajčyny, pavinny budziem ryzyknuć i vyjści, chaj atrymajem štraf ci 15 sutak, ale zatoje potym nie budziem žyć pry dyktatury». Paśla hetaha aktyvisty Sieviarynca stali razdavać arkušyki ludziam, kab tyja napisali svaje prapanovy, što treba źmianić u krainie.
«My tut dla taho, kab pačuć, što chvaluje prostych biełarusaŭ. U padjeździe, dzie žyvie moj tata, pałova mužčyn užo pamierli, nie dažyŭšy da 50 hadoŭ. Ja liču, što ŭ mužčyn nie pavinien być piensijny ŭzrost bolš, čym jany žyvuć. A ŭłady cikavić tolki nabivańnie kišeniaŭ i Jeŭrapiejskija hulni», — skazała Volha Kavalkova. Druhi raz zapar vypała, što mienavita adzinaja žančyna siarod kandydataŭ vystupała apošniaj.
Što pytalisia ludzi? Alaksandr Kuźniacoŭ z Partyi BNF spytaŭ, ci płanujucca lustracyi ŭ vyniku prychodu da ŭłady.
Jazep Duleba, były kiraŭnik viciebskaha BNF, spytaŭ u Sieviarynca, što jon robić u takoj kampanii, a ŭ Kazłova spytaŭ, čamu AHP nie raspracavała bolš-mienš prystojnuju prahramu, kali ŭ ich byli takija pytańni.
Vykładčyk Viciebskaha ŭniviersiteta Michajłaŭ padziakavaŭ Sieviaryncu, što pry jaho dapamozie atrymałasia spynić akupacyju.
Spadar, jaki nie pradstaviŭsia, cikaviŭsia, ci vyvodziŭ chto z kandydataŭ ludziej na vulicy. Maryna Vasiljeva kazała, što bolšaść ludziej za sajuz z Rasijaj, jak jany buduć abaraniać ich pravy, a taksama ci buduć kandydaty vystupać suprać čypizacyi ludziej. Iryna Jaskievič z AHP spytała, jakuju prahramu buduć prymać kandydaty ŭ vypadku pieramohi.
Kiraŭnik partyi «Zialonyja» Źmicier Kučuk spytaŭ, ci sartujuć kandydaty śmiećcie i ci treba zabaraniać pakiety. Były žychar vyspy Sachalin spytaŭ pra adnosiny da sajuza z Rasijaj. Pavieł Levinaŭ pytaŭsia pra staŭleńnie da śmiarotnaha pakarańnia.
Mikałaj Kazłoŭ ličyć, što lustracyja pavinna tyčycca ŭsich, chto parušaŭ zakon, ale nie ŭsie čynoŭniki heta rabili. Siarod prykładaŭ jon nazvaŭ milicyjaniera Ihara Jaŭsiejeva, jon, darečy, nie tak daŭno ŭznačalvaŭ UUS Viciebskaha abłvykankama. «My možam łamać scenar, ale tolki nie bajkot, kali my nie pojdziem, to Łukašenka zrobić, što zachoča z Hajdukievičam i Karatkievič», — skazaŭ Kazłoŭ.
Hubarevič prapanoŭvaje, što pryzyŭniki mohuć načavać doma ŭ čas, kali niama zboraŭ. Pra milicyju jon skazaŭ: «Bolš učastkovych, ale mienš hienierałaŭ».
«Ja pryncypova za lustracyju, kab byli zadadzienyja maralnyja normy. Ludzi, jakija falsifikavali vybary, sadžali ludziej za kraty, pavinny być pakaranyja», — ličyć lidar BNF Alaksiej Janukievič.
Pavieł Sieviaryniec havaryŭ, što ŭ vypadku nierehistracyi kandydata treba rychtavać nacyjanalnuju zabastoŭku. «Z Rasijaj my pavinny siabravać, a nie tak, jak kožnaha 31 śniežnia robić Łukašenka», — adznačaje Sieviaryniec.
«Vy nie skazali ničoha, nie skazali ničoha pra ŭžyŭleńnie čypaŭ, ludziam źbirajucca ŭžyŭlać čypy», — zakryčała na vystupie Sieviarynca spadarynia Vasiljeva. Sieviaryniec praihnaravaŭ heta.
«Dziakuj Bohu, ja dobra ažaniŭsia, i maja žonačka navučyła mianie sartavać śmiećcie», — adznačyŭ Sieviaryniec. «My narod hienijaŭ, narod vajaroŭ», — pranikniona kazaŭ kandydat ad BCHD.
«Ja za maratoryj na śmiarotnaje pakarańnie. Rasija ci Jeŭrasajuz — heta ludzi pavinny rašać na refierendumie. Ja hatovaja ŭznačalić siońnia luby pratest, jaki patrebny ludziam», — skazała Volha Kavalkova.
Hałasavańnie doŭžyłasia kala 20 chvilin. Hałasy padličvali ŭ adkrytuju, nijakaha chavańnia biuleteniaŭ. U hałasavańni pryniaŭ ŭdzieł 101 čałaviek. Jašče trynaccać čałaviek zarehistravalisia na mierapryjemstva, ale vyrašyli nie hałasavać.
Vyniki hałasavańnia nastupnyja:
Sieviaryniec — 66 hałasoŭ
Hubarevič — 15
Kazłoŭ — 15
Janukievič — 4
Niesapraŭdny biuleteń — 1
Kavalkova — 0
Taksama 7 sakavika adbudziecca sustreča ŭ Navapołacku.
U niadzielu kandydaty buduć u Miorach, Šarkaŭščynie i Pastavach.
