Lik pamierłych ad karanavirusa ŭ Italii ŭ subotu dasiahnuŭ 233, kolkaść zaražanych ludziej vyrasła za apošni dzień bolš jak na 1200 čałaviek. Heta vymusiła italjanski ŭrad zapłanavać biesprecedentnyja miery, kab spynić epidemiju.

Italjanski ŭrad vydaŭ dekret, zhodna ź jakim spyniajecca ŭjezd i vyjezd biez važnych na toje pryčyn z cełaha rehijona Łambardyja, z centram u Miłanie. A taksama z 14 pravincyj inšych rehijonaŭ, u tym liku Vieniecyi, Parmy, Padui, Rymini, Pezara, Modeny dy inšych, paviedamlaje ahienctva Ansa. 

Heta aznačaje, što tyja, chto znachodzicca ŭ dadzienych pravincyjach, pavinny zastavacca tam da 4 krasavika. Zrešty, premjer Italii paabiacaŭ, što ciahniki i samaloty tudy buduć praciahvać kursiravać. Paviedamlajecca, što dla ŭjezdu i vyjezdu z zony karancinu treba budzie pakazać dakumienty, jakija dakazvajuć nadzvyčajnuju patrebu dla pracy, zdaroŭja i asablivyja abstaviny.

Akramia taho, uvodzicca zabarona na lubyja publičnyja mierapryjemstvy. Zabaraniajecca praviadzieńnie viasiellaŭ i pachavańniaŭ, zabaraniajecca praca damoŭ kultury, muziejaŭ, basiejnaŭ, spartzałaŭ, kurortaŭ. Kramy buduć adkrytyja tolki ŭ pracoŭnyja dni. Ustanovy hramadskaha charčavańnia buduć adkrytyja tolki z 6:00 da 18:00 i pry ŭmovie, kali mohuć zabiaśpiečyć adlehłaść pamiž naviednikami nie mienšuju, čym 1 mietr. Spartovyja matčy mohuć adbyvacca tolki za zakrytymi dźviaryma. Zdajecca, kab zdaryłasia i čuma, Italija nie navažycca spynić śviatoje — futbolny čempijanat.

Da 31 maja spynienaja praca sudoŭ.

Na ŭsioj terytoryi Italii ludziam rekamiendavana nie pakidać damoŭ biez patreby.

Ciažka skazać, ci ŭdasca Italii spynić raspaŭsiud epidemii ciapier, kali jaje nośbity zarehistravanyja ŭžo va ŭsich rehijonach krainy. Śmiarotnaść ad Covid-19 u Italii pieravyšaje 4 %.

Ničoha padobnaha za apošnija dziesiacihodździ ŭ Jeŭropie nie zdarałasia.

Možna čakać, što dalejšy raspaŭsiud karanavirusa pryviadzie da padzieńnia ekanomiki i niepradkazalnych finansavych nastupstvaŭ.

Kamisar pa baraćbie z karanavirusam Hramadzianskaj abarony Italii, jaki staŭ adnoj z samych miedyjnych postaciaŭ krainy za apošnija tydni, 7 sakavika zaklikaŭ italjancaŭ časova źmianić ład žyćcia, kab strymać epidemiju.

U toj ža čas italjanskaja asacyjacyja reanimatołahaŭ i anestezijołahaŭ prapanavała vypracavać dakładnuju hradacyju pryjarytetaŭ dopusku pacyjentaŭ u špitali i ŭ adździaleńni reanimacyi. Hetaja prapanova z 15 punktaŭ zroblenaja na vypadak, kali mahčymaści italjanskich ustanoŭ achovy zdaroŭja buduć vyčarpanyja, piša partał La Repubblica. Prapanujecca ŭvieści praviły nadzvyčajnaj situacyi, jakija b addavali pieravahu pacyjentam 1) z bolšaj imaviernaściu vyžyvańnia i 2) z daŭžejšaj patencyjnaj praciahłaściu ŭratavanaha žyćcia. Zastajecca spadziavacca, što Italii dy inšym jeŭrapiejskim krainam usio ž nie daviadziecca sutyknucca z takoj hraničnaj situacyjaj.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?