Pieršy vyjezd demakratyčnych aktyvistaŭ u rehijony skončany. U šaści haradach Viciebskaj vobłaści ŭdzieł u hałasavańni ŭziali 237 čałaviek. Pakul ŭpeŭnienuju pieravahu trymaje Pavieł Sieviaryniec. Za sustaršyniu BCHD addali hałasy 63% čałaviek. Na druhim miescy lidar Ruchu «Za Svabodu» Juraś Hubarevič. Jaho padtrymka ŭtraja mienšaja: 21% hałasoŭ.
«Naša Niva» spytała Jurasia Hubarevič, ci bačyć jon pierśpiektyvy pieramohi ŭ prajmieryz padčas pajezdak pa rehijonach.
«Naturalna, što płan dahaniać Sieviarynca jość. Pahladzim, što budzie ŭ inšych abłaściach. Viadoma, što Viciebskaja vobłaść — heta radzima Sieviarynca.
Plus da ŭsiaho mienavita Pavieł nastajaŭ na troch haradach ź pieršaj pajezdki, kali farmiravaŭsia hrafik.
U kožnaj struktury była mahčymaść nazvać svoj śpis haradoŭ, a potym usio miksavałasia. I praź losavańnie atrymałasia, što pieršaja pajezdka budzie jakraz u hetyja harady.
Pahladzim, što budzie dalej. U Ruchu «Za Svabodu» jość niakiepskija pazicyi na Brestčynie, u šerahu haradoŭ na Mahiloŭščynie, vialiki raźlik na Minsk.
Ja akcentavaŭ uvahu na inšym momancie. Ja raźličvaju na toje, što na prajmieryz pačnuć prychodzić ludzi pa-za partyjnych struktur, jakija buduć rabić svoj vybar na miescy. Na apošniaj sustrečy ja spytaŭ u ludziej, chto pryjšoŭ, nie zrabiŭšy vybar papiarednie. Ruki padniali čaćviora čałaviek, mienavita da ich ja apielavaŭ padčas sustrečy.
Čamu heta važna dla mianie? Bo ludzi pavinny ŭśviedamlać, što tyja stratehii, za jakija jany hałasujuć, pavinny być ažyćcioŭlenyja. U adnoj sa stratehij [Paŭła Sieviarynca — «NN»] havorycca ab tym, što niekalki miesiacaŭ daviadziecca vyvodzić ludziej na vulicy pad łozunham «Jarmošynu ŭ adstaŭku».
U Navapołacku i ŭ Šarkaŭščynie ja spytaŭ u ludziej, ci zdolnyja jany buduć vyvieści susiedziaŭ na takuju akcyju? U Navapołacku padniali ruki mienš za dziasiatak čałaviek, a ŭ Šarkaŭščynie ŭvohule nichto. Voś i ŭsio. Heta ŭtopija.
Ci buduć niezaanhražavanyja ludzi chadzić na prajmieryz? Zaležyć ad pavodzinaŭ ułady. Bačycie, u Haradku było 8 čałaviek, a potym užo ŭ mienšych haradach nasielnictvam pa 6-8 tysiač prychodziła pa 20 čałaviek. Na samaj pieršaj sustrečy ludzi pryhladalisia, bo z našaj uładaj možna čakać, što ciabie aryštujuć za niesankcyjanavanaje mierapryjemstva. Kali surjoznych pieraškodaŭ nie budzie, to ludzi pavinny padciahnucca», — miarkuje Juraś Hubarevič.
