Hierainia «Undziny» adnačasova i rusałka, i sučasnaja žančyna. Jana znajomicca z novym mužčynam, kali na ich pierakulvajecca akvaryum. Jon vyjaviŭsia pramysłovym vadałazam…
Viadoŭca lehiendarnaj teleprahramy Siarhiej Filimonaŭ pabyvaŭ na jubilejnym «Bierlinale». Fiestyval i paśla źmieny dyrektara zastajecca vielmi levy — u palityčnym sensie hetaha słova.
«Bierlinale» raspačaŭsia ŭ 1950 hodzie. Da novaha tysiačahodździa centralnaj placoŭkaj fiestyvalu byŭ kinateatr «Zoo Palast».
Na pačatak nulavych «Bierlinale» pierajechaŭ u admysłovy Centr na Patsdamierplac.
Ad pačatku nulavych dyrektaram fiestyvalu staŭ Dyter Koźlik, jaki pastupova źmiaściŭ akcenty. Zamiest mejnstrymavych filmaŭ tut stali pakazvać stužki vytvorčaści małych krain ci filmy z palityčnym źmiestam.
Naprykancy 2017-ha niekatoryja hramadskija dziejačy navat napisali adkryty list kancleru i ministru kultury Niamieččyny z patrabavańniem źniać Koźlika z pasady. Urešcie ŭ 2020-m fiestyval uznačaliŭ novy dyrektar — Karła Šatryjan. Što źmianiłasia?
Desant «Vidźmo-nievidźmo» pryjazdžaje na «Bierlinale» čas ad času jašče z kanca 90-ch, a sioleta prysutničaŭ na fiestyvali ciaham čatyroch apošnich dzion jaho pracy. My sustrakalisia sa starymi siabrami, kinaznaŭcami z Maskvy i Pieciarburha, abmiarkoŭvali filmy, štości hladzieli razam.
I ŭsie mocna ździvilisia, što hałoŭny pryz — «Załaty miadźviedź» — žury na čale z Džeremi Ajransam prysudziła iranskamu režysioru Muchamiedu Rasułavu za film-pamflet «Zła nie isnuje!».
Režysior ciapier asudžany, nievyjazny ź Irana.
Žury addało hetaj niebiassprečnaj (kamuści jana pakažacca prymityŭnaj ahitkaj) karcinie pieravahu i pierad skandalnym rasijskim seks-ekśpierymientam («Dau. Nataša» Chržanoŭskaha), i pierad «kitajskimi kotačkami» («Žančyna, jakaja źbiehła» režysiora Chon San Su, Paŭdniovaja Kareja).
Karaciej, iznoŭ na hetym fiestyvali pieramahła palityka.
A voś jakija filmy stali favarytami krytykaŭ.
«Žančyna, jakaja źbiehła» (Paŭdniovaja Kareja, rež. Chon San Su)
Ščyryja razmovy siabrovak-ałkahaličak na temu: dzie adšukać dobraha mužyka? Moža, kociki bolš pryvabnyja za tych mužykoŭ?
«Nikoli, redka, čas ad času, zaŭždy» (ZŠA, rež. Eliza Kitmen)
Film, jaki pieramoh na fiestyvali amierykanskaha niezaležnaha kino «Sandens». Heta historyja pra siabrovak, jakija pajechali z hłybinki, dzie aborty zabaronienyja, u Ńju-Jork z metaj ažyćciavić svoj płan. Jany ŭsiudy ciahajuć za saboj vielizarnuju valizku, jakaja niby simvalizuje ichnuju prablemu.
Skandał Bierlinale: «Dau. Nataša» (Illa Chržanoŭski)
Zdymki DAU-prajekta doŭžylisia 3 hady, źniali materyjał na 700 hadzin, mantaž — 8 hadoŭ. Zmantavali niekalki filmaŭ z roznymi siužetami. U Rasii ŭsio heta zabaroniena. Dla «Bierlinale» abrali dźvie stužki. Žury adznačyła pracu apieratara Jurhiena Jurhiesa. Žorstkaść, seks, pakuty piersanažaŭ za stalinskimi kratami, inšyja ryzykoŭnyja materyjały. Mahčyma, što hety režysior zmantuje sa svajoj syraviny jašče niekalki novych filmaŭ.
Što spadabałasia jašče? «Undzina»
Heta zahadkavaja i simvaličnaja drama, jakuju źniaŭ patryjarch niamieckaha art-chausnaha kino Kryścijan Petcald. Hierainia stužki adnačasova i niby rusałka, i sučasnaja žančyna. Vada dla jaje źjaŭlajecca niejkim simvałam. Jana znajomicca z novym mužčynam, kali na ich pierakulvajecca akvaryum. Jon vyjaviŭsia pramysłovym vadałazam. Ale ŭ vyniku niaščasnaha padvodnaha zdareńnia jon nie patanuŭ, ale zrabiŭsia amal raślinaj.
Zabłytany dramatyčny malunak, ekśpierymienty, fłešbeki — usio heta robić «Undzinu» niezvyčajnaj. Moj favaryt ź liku taho, što atrymałasia pahladzieć.
Biełaruskija hrošy, pavodle śćvierdžańniaŭ šerahu admysłoŭcaŭ, udzielničali ŭ zdymkach mižnarodnaha kinaprajekta «Uroki farsi» (rež. Vadzim Pierelman). Adzin habrej vydaje siabie ŭ kancłahiery za piersa. Da jaho źviartajucca z prapanovaj navučyć kahości movie farsi. Jon vymušany vydumać movu, jakoj nie isnuje…
I heta jašče nie ŭsio cikavaje z roznych prahram fiestyvalu.
