Ni adzin z čatyroch abvinavačanych pa spravie ab katastrofie «Boinha» «Małajzijskich avijalinij» nad Danbasam nie źjaviŭsia ŭ sudzie Niderłandaŭ. Heta kanstatavaŭ na pracesie, jaki adkryŭsia 9 sakavika, hałoŭny sudździa Chiendryk Stenchiojs. Pra chod spravy infarmuje «Radyjo Svaboda».
Abvinavačańni pa spravie ab katastrofie «Boinha», achviarami jakoj 17 lipienia 2014 hoda stali 298 čałaviek, pradjaŭlenyja trom hramadzianam Rasii — heta Ihar Hirkin (Strałkoŭ), Siarhiej Dubinski (pazyŭny Chmurny), Aleh Pułataŭ (pazyŭny Hiurza) i adnamu hramadzianinu Ukrainy — Leanidu Charčanku (pazyŭny Krot). Usie jany mieli dačynieńnie da sieparatystaŭ na Danbasie, jakich padtrymlivaje Rasija.
Jak kanstatavaŭ sudździa, na pracesie pradstaŭleny tolki Pułataŭ. Jaho pradstaŭlajuć dvoje advakataŭ ź Niderłandaŭ, a taksama rasijski juryst Alena Kucina, jakaja pa niderłandskim zakanadaŭstvie nie maje prava vystupać u sudzie.
Astatnija troje abvinavačanych nie pradstaŭleny advakatami i nie źjavilisia ŭ sud asabista. Sudździa padrabiazna apisaŭ, jakija sproby pradprymalisia dla taho, kab dastavić abvinavačanym pozvy ŭ sud. Pavodle jaho słoŭ, im adpraŭlalisia jak aficyjnyja pozvy, tak i paviedamleńni z dapamohaj sacsietak i elektronnaj pošty. Abvinavačanyja, adnak, admovilisia źjavicca ŭ sud ci nie vyjšli z sudom na suviaź.
Mižnarodnaja śledčaja hrupa, jakaja rasśledavała katastrofu «Boinha», pryjšła da vysnovy, što jon byŭ źbity z ustanoŭki «Buk», jakaja prybyła na ŭschod Ukrainy z rasijskaj vajskovaj častki. Strałkoŭ u momant katastrofy byŭ kamandujučym siłami sieparatystaŭ. Dubinski byŭ jaho padnačalenym i ŭznačalvaŭ raźviedku. Śledstva ličyć, što mienavita jon zapytvaŭ dastaŭku «Buka». Pułataŭ i Charčanka, jak ličyć śledstva, majuć dačynieńnie da pierapraŭki «Buka» ŭ Danbas.
U abvinavaŭčym zaklučeńni, abnarodavanym na sajcie niderłandskaj prakuratury, źmiaščajucca dva abvinavačańni — va ŭłasna źniščeńni samalota i ŭ zabojstvie. U dakumiencie źmiaščajecca śćvierdžańnie pra toje, što abvinavačanyja (asabista abo apasrodkavana) spryjali tamu, što va Ukrainu byŭ dastaŭleny rasijski «Buk» ź piersanałam, jaki jaho absłuhoŭvaŭ. Pry hetym imiony ludziej, jakija składali kamandu «Buka», nie nazvanyja.
Vystupajučy ŭ sudzie, pradstaŭnik abvinavačvańnia zajaviŭ, što rasśledavańnie praciahvajecca i śledčyja sprabujuć vyśvietlić asoby ekipaža «Buka».
Čaćviora abvinavačanych, na dumku śledstva, adyhrali klučavuju rolu ŭ apieracyi z «Bukam», choć, jak zajaviŭ prakuror, «kpopku naciskali nie jany, a ekipaž».
Prakuror taksama zajaviŭ, što śviedki abvinavačvańnia zastanucca zasakrečanymi, pakolki aścierahajucca pieraśledu z boku Rasii i sieparatystaŭ.
Troje z čaćviarych abvinavačanych, z kim udałosia źviazacca žurnalistam, — Strałkoŭ, Dubinski i Pułataŭ — admaŭlajuć svaju vinu. Rasijskija ŭłady admaŭlajuć dačynieńnie Rasii da źbićcia «Boinha», u toj čas jak Niderłandy i Aŭstralija raniej zaklikali Maskvu pryznać svaju adkaznaść.
