5 sakavika supracoŭniki Śvietłahorskaj mižrajonnaj inśpiekcyi achovy žyviolnaha i raślinnaha śvietu zatrymali mužčynu, jaki łaviŭ rybu sietkami. Paźniej akazałasia, što ŭ jaho doma ceły skład zbroi, paviedamlaje «Ranak».

Łaviŭ rybu mužčyna niezakonna, tamu ŭvieś ułoŭ kanfiskavali.

Doma ŭ zatrymanaha, u vioscy Parečča Akciabrskaha rajona, inśpiektary razam ź milicyjanierami vyrašyli pravieści ahlad. Pavodle apieratyŭnaj infarmacyi, tut mahli znachodzicca sietki i inšyja niezakonnyja pryłady łoŭli.

Na padvorku znajšli mnostva staŭnych pastak i 10 sietak daŭžynioj 293 mietry.

Na nastupny dzień pry ahladzie znajšli vialikuju kolkaść bojeprypasaŭ jak časoŭ vajny, tak i vintovačnyja patrony 1986-87 hadoŭ vypusku. Akramia hetaha, šeść stvałoŭ ahniastrelnaj zbroi: vintoŭka Mosina ŭ cełym vyhladzie, abrez vintoŭki Mosina, dźvie niezarehistravanyja strelby, sihnalny pistalet. Jašče byŭ samapał, niezrazumieła dla čaho zrobleny.

Supracoŭniki inśpiekcyi vyjavili taksama try hranaty, kala trochsot patronaŭ, vybuchoŭniki, vohniepravodny šnur. Tak, niečakana inśpiektary vyjšli na ŭładalnika składa zbroi, u dačynieńni da jakoha budzie vieścisia kryminalnaja sprava.

U 55-hadovaha padazravanaha, darečy, byłoha supracoŭnika milicyi, byŭ šaniec paźbiehnuć adkaznaści, ale jon im nie skarystaŭsia.

Hramadzianinu nieadnarazova prapanoŭvali dobraachvotna zdać zbroju, bo było zrazumieła: pakolki jość bojeprypasy, jość i ahniastrelnaja zbroja. Mužčyna śćviardžaŭ, što ŭ jaho ničoha niama. A kali b zdaŭ adrazu, to da kryminalnaj adkaznaści nie pryciahvaŭsia b. Ciapier jamu pahražaje pazbaŭleńnie voli da siami hadoŭ.

Клас
0
Панылы сорам
0
Ха-ха
0
Ого
0
Сумна
0
Абуральна
0