U Biełarusi śpiecyjalisty raspracoŭvajuć dla škoł słoŭnik moładzievaha słenhu ŭ internecie. Pra heta padčas kruhłaha stała «Prafiłaktyka narkamanii ŭ moładzievym asiarodździ» ŭ pres-centry BIEŁTA paviedamiŭ načalnik adździeła arhanizacyi pracy inśpiekcyj pa spravach niepaŭnaletnich upraŭleńnia prafiłaktyki hałoŭnaha ŭpraŭleńnia achovy pravaparadku i prafiłaktyki milicyi hramadskaj biaśpieki MUS Siarhiej Jankoŭski.

Pa słovach Siarhieja Jankoŭskaha, pravaachoŭnyja orhany i ŭstanovy adukacyi ciesna ŭzajemadziejničajuć u prafiłaktycy złačynnaści siarod dziaciej i padletkaŭ. Pravodziacca sumiesnyja mierapryjemstvy, milicyja raspracoŭvaje kompleksna-mietadyčnyja rekamiendacyi, jakija zatym mohuć vykarystoŭvać piedahohi. «Zaraz my pracujem nad słoŭnikam słenhu terminaŭ, jakija ŭžyvajuć niepaŭnaletnija ŭ sietcy», — raspavioŭ pradstaŭnik MUS. Słoŭnik taksama nakirujuć u škoły. Raźlik zrobleny na toje, kab roznyja pakaleńni lepš razumieli adno adnaho.

Inśpiekcyi pa spravach niepaŭnaletnich uličvajuć toje, što sučasnyja dzieci daŭno syšli z vulic u handlovyja centry i inšyja miescy, dzie jość biaspłatny wi-fi, adznačyŭ Siarhiej Jankoŭski. Praca z padletkami idzie praz sacsietki, da ich imknucca danosić infarmacyju pra niehatyŭnyja nastupstvy ŭžyvańnia narkotykaŭ, ab adkaznaści za pravaparušeńni, źviazanyja ź ich niezakonnym abarotam. U takim ža klučy viadziecca prafiłaktyka inšych złačynstvaŭ. «Jość dzieci, jakija nie razumiejuć, što ździajśniajuć niešta drennaje. Asabliva heta tyčycca złačynstvaŭ, źviazanych ź internetam, kradziažoŭ z dapamohaj kampjutarnaj techniki, uniasieńnia niejkich danych na staronki svaich siabroŭ u sacyjalnych sietkach».

Клас
0
Панылы сорам
0
Ха-ха
0
Ого
0
Сумна
0
Абуральна
0