Alaksandr Łukašenka papraknuŭ rasijskija ŚMI ŭ praduziatym aśviatleńni zachadaŭ, jakija robiacca ŭ Biełarusi pa baraćbie z karanavirusam. Pra heta jon zajaviŭ siońnia na naradzie ŭ Minsku, paviedamlaje BiełTA.
«Chacieŭ by jašče raz zakranuć pytańnie ŚMI. Niadrenna pačali pracavać narešcie i biełaruskija ŚMI. Ja ŭčora hladzieŭ vynikovyja prahramy pa ŭsich kanałach. Vielmi abjomna. Navat va Uładzimira Ściapanaviča (Karanika) zabrali pracu. Užo tak patłumačyli ŭsio i pra maski, i pra bachiły, i lačeńnie, što tolki siadzi doma i lačysia, — skazaŭ kiraŭnik dziaržavy. — Mnie šmat kažuć, što my tam prajhrajem telehram-kanałam dy inšaje. Tak, napeŭna, tam brudu bolš, čym našych hałasoŭ — aficyjnych uładaŭ. Choć infarmacyi nie skažaš, što nie chapaje. Ale ja tak padumaŭ, nu što nam, pijarycca i pačać stvarać niejkija telehram-kanały i tam niejkuju pažaŭciełuju infarmacyju ukidvać, kab tam prysutničać… Napeŭna, heta nie naš šlach».
Alaksandr Łukašenka padkreśliŭ, što dla tych, chto choča pačuć prafiesijny punkt hledžańnia, infarmacyi dastatkova: «Kožny dzień my, ničoha nie chavajučy, vydajem u efir. Vystupajuć miedyki, śpiecyjalisty, prafiesijanały. Dajšli da taho, što ŭžo daktary-pulmanołahi vystupajuć».
Razam z hetym jon u niehatyŭnym klučy vykazaŭsia pra toje, jak aśviatlajuć padziei ŭ Biełarusi ŭ rasijskich miedyja, prytym nie tolki ŭ ananimnych telehram-kanałach, ale i ŭ ahulnarasijskich ŚMI. «Dajuć takuju ahidnuju infarmacyju. A, baćka tam lečyć svaich traktaram, harełkaj, łaźniaj… Viedajecie, kaliści ja na chadu pažartavaŭ. Ale ŭ kožnym žarcie jość dola žartu», — zaŭvažyŭ kiraŭnik dziaržavy.
«Rasijanam chacieŭ by skazać — hetym, jakija «plavuzhajuć»: nie čapajcie nas! My ž u ich ničoha nie prosim. My ratujemsia, abaraniajemsia sami. Pryjazdžajcie da nas, pahladzicie samastojna. Ale navošta ž vy nas u Rasii robicie durniami? Navošta ruskamu čałavieku zabivać u hałavu, što tam, na Zachadzie, našy hetyja biełarusy, jany niejkija nienarmalnyja?» — pastaviŭ pytańnie Alaksandr Łukašenka.
«Prytym tut užo nie adbrykaješsia, što heta niekiravalnyja kanały. Voś mnie niadaŭna pakazali ŭ čarhovy raz niejkaha Klajmionava [viadučy «Pieršaha kanała» — NN], jaki tam na Rasiju vydavaŭ, što ŭ nas i zachvorvańni, i chavajuć infarmacyju… Nu i našy pačali padchaplać. My zaprasili Suśvietnuju arhanizacyju achovy zdaroŭja. A słabo ŭsim paklikać śpiecyjalistaŭ u krainu? Rasijanaŭ, amierykancaŭ (ad suśvietnaj arhanizacyi). I voś tak by mović: idzicie i pahladzicie, jak u nas jany byli. I što jany (SAAZ) skazali — pretenzij da biełarusaŭ niama», — padkreśliŭ kiraŭnik dziaržavy.
«Tak, jość rekamiendacyi: nie chadzicie natoŭpami, nie trycisia adno ab adnaho, nie całujciesia, nie abdymajciesia i inšaje. My ŭsprymajem hetyja rekamiendacyi. Ale što my robim niapravilna i dzie my chłusili? Publična skazali, što ni Ministerstva achovy zdaroŭja, ni ŭłady tut nie chłusili. My adkrytyja — prychodźcie i hladzicie. My robim heta dla svaich ludziej. Ale rasijanie nam nie čužyja. My hatovyja ź imi mieć znosiny, raicca», — zajaviŭ Alaksandr Łukašenka.
Jon adznačyŭ, što kali ŭ Rasii sapraŭdy chočuć jak-niebudź dapamahčy Biełarusi, to mahli b źnizić da suśvietnaj canu na pryrodny haz: «Kali chočacie dapamahčy, zrabicie nam suśvietnuju canu pa pryrodnym hazie. Siońnia ŭ Jeŭropie pryrodny haz Rasija pradaje pa $80, nie vyšej za $90 za 1 tys. kub. m. A my płacim $127. Dzie takaja cana siońnia jość? Voś chočacie dapamahčy, dapamažycie. Ni hrošaj, ničoha nie prosim. Navošta z nas škuru drać?»
«Ale pra heta ŭ Rasii nichto nie skaža. Hetaja praŭda kamuści tam nie patrebna. Zdahadajciesia z troch razoŭ kamu. Tamu jašče raz paŭtaraju: vy nas nie čapajcie! Skončycca heta ŭsio, potym my pahladzim, chto maje racyju, a chto nie», — dadaŭ biełaruski lider.
Alaksandr Łukašenka taksama nahadaŭ kiraŭniku Administracyi Prezidenta pra zadaču spyniać u Biełarusi ŭsiakija sproby chajpavać na temie karanavirusa.
«I svaich treba kantralavać. I Kamitetu dziaržbiaśpieki bolš žorstka tut, i milicyi, i Mininfarm niachaj hladzić za ŭsimi. Kali pabyvali tut mižnarodnyja ekśpierty, ich pamienšyła — takich śmiełych, jakija chajpavali ŭ internecie na hetaj biadzie. Ale jašče jany jość. Ich treba stavić na miesca. I nie bajacca, što nas abvinavaciać u niejkaj niedemakratyčnaści. Projdzie heta ŭsio, i my pahladzim, chto nahniataŭ psichoz», — skazaŭ jon.
Jon adznačyŭ, što jość u śviecie ŚMI i palityki, jakija chajpujuć na hetaj temie, i papiaredziŭ, što ŭ Biełarusi tak nie robiać. «My heta nie rabili. I ja vas zaŭsiody papiaredžvaŭ, što nie treba hetaha rabić. Tamu što potym soramna budzie svaim ludziam hladzieć u vočy. Palityka, jakaja zychodzić ad ziamli, ad ludziej, i my hetaj palityki pavinny prytrymlivacca, — zajaviŭ kiraŭnik dziaržavy. — My vypracavali svaju taktyku baraćby z hetymi infiekcyjnymi zachvorvańniami. My, nie razvaliŭšy sistemu, majem infiekcyjnyja balnicy ad rajonaŭ da Minska, navukova-praktyčnyja centry. Jany abstalavanyja. Heta nas siońnia ratuje».
«Davajcie budziem spakojna žyć, zajmacca svajoj spravaj, vychoŭvać dziaciej i dumać pra budučyniu. A my zrobim usio dziela taho, kab kožny čałaviek zachavaŭ svajo žyćcio. Asabliva ciapier, kab dakazać, što my možam zmahacca za čałavieka i pieramahać hetuju zarazu. Jak ja skazaŭ, pryhoža pieramahać», — padkreśliŭ Alaksandr Łukašenka.
Jon dadaŭ, što ŭ liku pytańniaŭ, jakija abmiarkoŭvajucca na naradzie, nie tolki pytańni, źviazanyja z chvarobami, ale i pierśpiektyŭnyja temy, jakija treba vyrašać. Akramia taho, u krainie nabiraje abaroty pasiaŭnaja kampanija. «Ludzi pracujuć tak, jak treba. Małajcy. Ale, tym nie mienš, my pavinny bačyć pierśpiektyvy, što budzie zaŭtra-paślazaŭtra, kali heta ŭsio skončycca», — reziumavaŭ Łukašenka.
