U toj čas jak prezident Biełarusi i aficyjnyja ŚMI ŭvieś čas havorać, što karanavirus nie ŭjaŭlaje vialikaj niebiaśpieki, mnohija biełarusy sami pieraścierahajucca i sychodziać u samaizalacyju, nie čakajučy zahadu źvierchu. Ale kali pandemija zaciahniecca, «taktyka admaŭleńnia», pryniataja ŭładami Biełarusi, moža mocna ŭdaryć pa ich samich, piša «Vašynhton post».
«Bolšaść karanavirusnych mier u Biełarusi zastajucca rekamiendavanymi, ale nie abaviazkovymi. Va ŭsioj krainie, uklučajučy Minsk, škoły, restarany, spartzały zastajucca adkrytymi, ludzi praciahvajuć jeździć na pracu», — piša amierykanskaje vydańnie.
«Čamu ŭłady Biełarusi tak uparta admaŭlajuć pahrozu karanavirusa? Ekanamičnyja resursy Biełarusi abmiežavanyja, a pry hetym nabližajucca prezidenckija vybary — voś dva čyńniki, jakija tłumačać, čamu ŭłady zaniali pazicyju «nijakaha karancinu».
Pry takim padychodzie ŭłady nie abaviazanyja padtrymlivać ludziej i pradpryjemstvy, jakija ciarpiać ad kryzisu — epidemii ž nibyta niama.
«Niahledziačy na toje, što aficyjnaja reakcyja była abmiežavanaja, biełaruskija miedyki dałučylisia da suśvietnaha fłešmobu #ZastańciesiaDoma i zaklikajuć ludziej zastavacca doma čaściej i minimizavać svaju kamunikacyju, — adznačaje amierykanskaje vydańnie. — Biełaruskaja apazicyja i lidary hramadzianskaj supolnaści zaklikali da «narodnaha karancinu» z 23 sakavika da 30 krasavika. Jany prosiać ludziej zastavacca doma, nie pasyłać dziaciej u škoły i minimizavać kamunikacyju ŭžyvuju».
«U toj čas jak aficyjnyja ŚMI ŭvieś čas havorać, što karanavirus nie ŭjaŭlaje vialikaj niebiaśpieki, mnohija biełarusy sami pieraścierahajucca i sychodziać u samaizalacyju, nie čakajučy zahadu źvierchu. Abjom transpartnaha patoku ŭ Minsku, naprykład, u budnija dni źniziŭsia na 37,5% z pačatku sakavika», — źviartaje ŭvahu vydańnie.
«Akcentujučy ŭłasnuju siłu i zdolnaść pieramahčy karanavirus, Łukašenka, zdajecca, advodzić uvahu ludziej ad ułasnaj biazdarnaści ŭ kiravańni ekanomikaj», — piša «Vašynhton post».
«Aficyjna admaŭlajučy niebiaśpieku COVID-19 i ŭ toj ža čas atrymlivajučy vyhady ad adkazu inšych krain na karanavirus — a pry hetym biełarusy trymajuć sacyjalnuju dystancyju niahledziačy na ŭsie zajavy Łukašenki — ułady Biełarusi źmianšajuć uvahu da taho, što jany niazdolnyja akazać finansavuju dapamohu tym, kamu jana treba ciapier», — piša «Vašynhton post».
U vyniku, padsumoŭvaje aŭtarka — Taćciana Kułakievič, vykładčyca ŭniviersiteta Paŭdniovaj Fłarydy, «kali pahroza pandemii sama sydzie da prezidenckich vybaraŭ, ułady zmohuć kazyrać tym, što ich padychod da baraćby z pandemijaj byŭ pravilny. Kali ž pandemija zaciahniecca, taki padychod moža ŭdaryć pa ich samich, bo vykliča narodnyja pratesty ŭ krainie i pastavić pad pahrozu adnosiny Biełarusi z Zachadam».
