Mahčyma, kamuści vielmi chaciełasia b zavaryć śmiećciepravod u svaim domie, ale pazbavicca ad krynicy niepryjemnaha pachu i lišniaha śmiećcia ŭ padjeździe nie zaŭsiody tak prosta, jak moža zdavacca na pieršy pohlad. Zrabić heta možna tolki ŭ tym vypadku, kali vam prapanujuć budaŭnictva kantejniernaj placoŭki. Adnak i tut moža čakać siurpryz — daloka nie ŭsiudy haradskaja zabudova i padziemnyja kamunikacyi dazvalajuć heta zrabić. Dakładniej skazać, nie dazvalali, bo śpiecyjalisty instytuta «Biełžyłprajekt» znajšli alternatyvu, piša «Źviazda».
Kab pabudavać zvyčajnuju kantejniernuju placoŭku, nieabchodna vykonvać peŭnyja narmatyŭnyja patrabavańni. Naprykład, zbor śmiećcia pavinien być arhanizavany nie bližej čym za 15 mietraŭ ad voknaŭ žyłoha doma ci za 20 mietraŭ ad dziciačych placovak dla hulni i navučalnych ustanoŭ. Pry hetym treba, kab da ŭvachodu ŭ žyły dom pavinna być nie bolej za sto mietraŭ i kab da miesca zboru adchodaŭ bieź vialikich namahańniaŭ zmoh prajechać śmiećciavoz. Z-za ščylnaj haradskoj zabudovy padobnyja normy nie zaŭsiody mahčyma vytrymać, i śmiećciepravod zastajecca adzinym varyjantam dla zboru śmiećcia, nie dajučy žycharam mahčymaści adbirać druhasnyja materyjalnyja resursy.
Bolš za toje, budaŭnictva placoŭki — heta vialikija zatraty dla kamunalnikaŭ (i, jak vynik, dla spažyŭcoŭ pasłuh) i peŭnyja niazručnaści dla žycharoŭ damoŭ. Bo treba vykanać peŭnyja ziemlanyja raboty, zrabić padušku ź bietonu, ustanavić bardziury — usio heta zajmaje čas. I treba ž uličvać, što ŭ horadzie znachodzicca šmat padziemnych inžyniernych kamunikacyj, jakija rana ci pozna spatrebicca ramantavać. Taksama vielmi važna nie začapić ich, kali buduć vieścisia raskopki padčas budaŭnictva placoŭki.
Adnak śpiecyjalisty Instytuta «Biełžyłprajekt» znajšli rašeńnie hetaj prablemy i raspracavali mabilnuju kanstrukcyju na bietonnaj asnovie, jakuju možna budzie pieramiaścić z dapamohaj śpiecyjalnaj techniki.
— Kali my raspracoŭvali prajekt, to ŭ pieršuju čarhu ŭličvali niekalki aśpiektaŭ: našy placoŭki pavinny być niedarahija i zručnyja dla isnujučych prydamavych terytoryj, i treba, kab ich možna było chutka ŭstanavić, — kaža dyrektar RUP «Instytut «Biełžyłprajekt» Dzianis Žejma. — Taksama jany pavinny pryhoža vyhladać i ŭpisvacca ŭ žyłuju zabudovu. Mienavita tamu my stvaryli try roznyja varyjanty, kab kamunalniki mahli vybrać najlepšy dla siabie.
Jak tłumačyć Dzianis Alehavič, dla ŭstanoŭki takich placovak nie treba pravodzić darahich padrychtoŭčych rabot, a ŭstanavić padobnuju placoŭku bieź vialikich namahańniaŭ zmohuć try śpiecyjalisty za try dni — im spatrebicca prosta sabrać kanstrukcyju. Pry hetym abjekt možna budzie raźmiaščać, nie chvalujučysia za padziemnyja inžyniernyja sietki, — u lubym razie na praciahu adnoj hadziny placoŭku možna budzie pierastavić na novaje miesca z dapamohaj krana.
— Pa sutnaści, takija placoŭki — heta małyja architekturnyja formy, i tamu, na naš pohlad, praces uzhadnieńnia z roznymi haradskimi słužbami ŭstanoŭki takich abjektaŭ možna budzie značna spraścić, bo ciapier heta zajmaje šmat času, — ličyć Dzianis Žejma.
Na pohlad śpiecyjalistaŭ, dla hetaha budzie dastatkova rašeńnia rajonnaj administracyi z peŭnymi rezalucyjami ad adździeła pa nadzvyčajnych situacyjach, sanitarnych słužbaŭ i finansistaŭ. U takim razie vyjhrajuć usie, i samaje hałoŭnaje — ludzi.
Pieršy mabilny abjekt ustanavili ŭ Zavodskim rajonie Minska na vulicy Taškienckaj: tam nie znajšłosia miesca dla budaŭnictva zvyčajnaj placoŭki. Adzin błok z troch kantejnieraŭ pryznačany dla zboru ćviordych kamunalnych adchodaŭ, druhi (taksama z troch bakaŭ) — dla zboru druhasnych materyjalnych resursaŭ, a treci — dla bujnahabarytnych adchodaŭ. Vykinuć adchody ŭ peŭny kantejnier žychary mohuć praź śpiecyjalnaje akienca z humavaj štorkaj na dźviarach placoŭki (za vyklučeńniem błoka dla bujnahabarytnych adchodaŭ). Darečy, dźviery dvuch błokaŭ (dla CKA i DMR) zamykajuć na ŭniviersalny kluč, a na samoj placoŭcy raźmieščany hrafik vyvazu ŭsich vidaŭ adchodaŭ.
* * *
Prajekciroŭščyki adznačajuć, što zatraty na ŭstanoŭku mabilnaj placoŭki mienšyja ŭ 5-8 razoŭ, i roŭna nastolki skaračajecca i čas, jaki raniej tracili na budaŭnictva zvyčajnaj placoŭki. I chto viedaje: mahčyma, zusim chutka nie tolki sprościać praces uzhadnieńnia, ale i sanitarnyja normy stanuć mienš surovyja — vidavočna ž, što novy varyjant placoŭki vyhladaje kudy bolš estetyčna.
