Abmiežavańni pačali dziejničać ź siaredziny krasavika. U klinikach spasyłajucca na zahad ministerstva, piša «Radyjo Svaboda».
Z 10 krasavika dziaržaŭnyja stamatalahičnyja palikliniki pačali paviedamlać pacyjentam, što zmohuć absłuhoŭvać ich tolki ŭ vypadku vostraha bolu. Planavy pryjom pacyjentaŭ moža adnavicca ŭ siaredzinie traŭnia, ale heta nie dakładna.
«Pavažanyja pacyjenty. Z 10 krasavika 2020 našaj paliklinikaj akazvajecca tolki ekstranaja medycynskaja dapamoha, — havorycca ŭ abviestcy na sajcie 12-j stamatalahičnaj palikliniki Miensku. — Planavaja stamatalahičnaja dapamoha prypynienaja da asobaha rasparadžeńnia. Padstava: zahad Ministerstva achovy zdaroŭja Respubliki Biełaruś ad 16 sakavika 2020 h. №296 «Ab mierach pa arhanizacyi akazańnia medycynskaj dapamohi pacyjentam z prykmietami reśpiratornaj infekcyi i pryniaćcia dadatkovych mier u arhanizacyjach achovy zdaroŭja».
U rehistratury palikliniki kažuć, što pryjom adnovicca nie raniej za 15 traŭnia. Pryčynaj abmiežavańniaŭ nazyvajuć karanavirus.
U stamatalahičnym adździaleńni 10-j mienskaj palikliniki «Svabodzie» paćvierdzili, što taksama pierastali prymać planavych pacyjentaŭ.
«Pakul niemahčyma skazać, kali adnovicca pryjom, — kažuć u stamatalohii. — Našyja supracoŭniki ciapier pieraraźmiarkoŭvajuć adpačynki, sychodziać na travień. Prykładna da kanca traŭnia, vierahodna, my nia budziem zapisvać na pryjom».
Razam z tym u pryvatnych stamatalohijach «Svabodzie» paviedamili, što praciahvajuć pracavać u zvyčajnym režymie. Zapisacca na pryjom pakul možna biez abmiežavańniaŭ.
