Daśledavańni pakazali, što novaja RNK-vakcyna paśpiachova vyklikaje imunnuju reakcyju ŭ myšej i «vučyć» ich kletki raspaznavać adzin z klučavych białkoŭ abałonki SARS-CoV-2. Papiarednija vyniki ekśpierymientaŭ bijołahaŭ ź Vialikabrytanii apublikavała elektronnaja navukovaja biblijateka bioRxiv, piša tass.ru.
«Dźvie injekcyi vakcyny prymusili arhanizm hryzunoŭ vypracoŭvać prykmietna bolš antyciełaŭ, jakija mohuć niejtralizavać SARS-CoV-2, čym heta robić arhanizm nośbitaŭ virusa. U hetych adnosinach RNK-vakcyna značna pieraŭzyšła jaje anałah na asnovie DNK. Heta vielmi karysna z praktyčnaha punktu hledžańnia, bo dla taho, kab uvodzić RNK, nie treba stvarać pary ŭ kletkach», — pišuć navukoŭcy.
Za apošnija miesiacy navukoŭcy z ZŠA, Aŭstralii, Kitaja i šerahu inšych krain raspaviali pra pačatak vyprabavańniaŭ roznych typaŭ vakcyn ad karanavirusa novaha typu. Častku ź ich praviarajuć na žyviołach, inšyja — na dobraachvotnikach. Pieršyja vyniki padobnych ekśpierymientaŭ, jak čakajuć navukoŭcy, stanuć viadomyja tolki prykładna praz paŭtara hoda, kali mietodyka testavańnia vakcyn nie źmienicca.
Mnohija z hetych preparataŭ zasnavanyja na niepravieranaj technałohii, zhodna ź jakoj u čałaviečyja kletki treba ŭvodzić frahmienty RNK i prymušać ich takim čynam vypracoŭvać mnostva białkoŭ virusa. Miedyki pracujuć i nad kłasičnymi inaktyvavanymi i rekambinantnymi vakcynami na asnovie asłablenych virusnych čaścic i hatovych frahmientaŭ abałonki virusa. I ŭ tym, i ŭ inšym vypadku stvarać padobnyja preparaty i ŭvodzić ich u masavuju vytvorčaść budzie vielmi składana, a harantyj pośpiechu pakul niama.
Adnu ź pieršych ekśpierymientalnych vakcyn na asnovie RNK raspracoŭvajuć navukoŭcy ź Impierskaha kaledža Łondana (Vialikabrytanija) pad kiraŭnictvam prafiesara Robina Šetaka. Hetaja vakcyna ŭjaŭlaje saboj frahmient RNK karanavirusa, jaki kiruje vypracoŭkaj šypavidnaha białku (S-białku abo spike-białku) — klučavoj častki abałonki SARS-CoV-2. Mienavita hety białok dapamahaje virusu pranikać u zaražanyja kletki.
Navukoŭcy apracavali hetuju častku hienomu virusa takim čynam, što pry traplańni ŭ kletku jana pačynaje kapijavać samu siabie. Dublikaty hetaha frahmienta prymušajuć kletku vypracoŭvać mnostva malekuł šypavidnaha białku. Častka ich traplaje ŭ navakolnaje asiarodździe i maje rolu razdražnialnika dla imunitetu, u vyniku čaho arhanizm farmuje mocnuju imunnuju reakcyju, to bok vypracoŭvaje mnostva antyciełaŭ.
Dla taho, kab vakcyna mahła vykanać hetuju zadaču, bijołahi spakavali jaje ŭ śpiecyjalnuju abałonku z tłuščavych malekuł. Jana abaraniaje RNK ad napadaŭ imunitetu i dazvalaje joj pranikać u peŭnyja typy čałaviečych i žyviolnych kletak. Pracu preparata Šetak i jaho kamanda pravieryli na niekalkich dziasiatkach myšej, u cieła jakich navukoŭcy ŭvodzili roznyja dozy vakcyny.
Dośviedy pakazali, što navat minimalnyja kolkaści RNK-vakcyny prymušali cieła hryzunoŭ vypracoŭvać vialikuju kolkaść antyciełaŭ, jakija mohuć niejtralizavać karanavirus. Pryčym ich kolkaść pavialičvałasia razam z dozaj vakcyny. Što cikava, dola i aktyŭnaść hetych antyciełaŭ była prykmietna vyšejšaj, čym u anałahičnych malekuł z kryvi pacyjentaŭ, jakija pieranieśli karanavirusnuju infiekcyju. Heta śviedčyć ab vysokaj efiektyŭnaści preparata.
Jak padkreślivajuć navukoŭcy, pakul nieviadoma, ci jość u hetaj vakcyny jakija-niebudź pabočnyja efiekty, padobnyja da tych, što byli zafiksavanyja padčas vyprabavańniaŭ pryščepak ad atypovaj pnieŭmanii SARS, a taksama šerahu inšych chvarob. Kali dalejšyja dakliničnyja vyprabavańni dakažuć, što padobnych efiektaŭ niama, Šetak i jaho kalehi płanujuć pačać kliničnyja vyprabavańni RNK-vakcyny ŭ najbližejšy čas.
