Abiezhałoŭlenaje cieła 13-hadovaj dziaŭčynki znajšoŭ jaje rodny dziadźka.

U čaćvier, 30 krasavika, kala 6-j ranicy na ŭskrainie Charkava zaŭvažyli hołuju skryvaŭlenuju žančynu ŭ nieadekvatnym stanie z nažom i pakietam, u jakim była čałaviečaja hałava, piša TSN.ua.

Patrulnyja palicyjanty, jakija zatrymlivali žycharku vioski Padvorki, raspaviali, što, kali pryjechali na miesca zdareńnia, žančyna kidałasia na ich i sprabavała ŭciačy. Jaje supravadžała kareta chutkaj miedycynskaj dapamohi.

Havaryć z pravaachoŭnikami žančyna admoviłasia, tamu była zatrymanaja dla vyśviatleńnia abstavinaŭ.

Praź niekalki hadzin u palicyju źviarnuŭsia mužčyna, jaki paviedamiŭ, što žyvie razam ź siastroj i jaje 13-hadovaj dačkoj, i siońnia ranicaj vyjaviŭ abiezhałoŭlenaje cieła plamieńnicy.

Jak stała viadoma TSN z ułasnych krynic, žančyna raniej nie stajała na ŭliku ŭ psichijatryčnaj balnicy i nie mieła daviedak ab prablemach ź psichičnym zdaroŭjem. Susiedzi taksama nie zaŭvažali, kab u jaje byli prablemy z ałkaholem ci narkotykami.

Susiedzi zapeŭnili, što siamja žyła ŭ hetym domie jak minimum 10 hadoŭ — spakojna, ale biedna. Žančyna pracavała prybiralščycaj, a dziaŭčynka vučyłasia ŭ škole. Baćki ŭ siamji nie było. U noč trahiedyi ŭ domie taksama było cicha, napiaredadni maci i dziaŭčynku bačyli ŭ dvary, jany štości prybirali. A ŭnačy ŭ ich doma doŭha hareła śviatło.

U toj ža čas inšaja znajomaja žančyny zajaviła, što ŭ jaje byli prablemy ź psichikaj, a taksama što jana pravodziła abrady.

Vyśvietliłasia, što žančyna sa šmatdzietnaj siamji, a brat, ź jakim jana žyła ŭ adnym domie, hłuchaniamy. Palicyja dapytvała jaho z dapamohaj surdapierakładčyka. Jašče adzin brat žančyny byŭ zabity niekalki hadoŭ tamu.

Adna z žycharak vioski pryhadała, što da naradžeńnia dziciaci žančyna mocna vypivała, adnak u apošni čas za joj takoha nie zaŭvažali.

Śledčyja adkryli kryminalnuju vytvorčaść. Sud adpraviŭ žančynu ŭ SIZA na dva miesiacy biez prava na zakład.

Клас
0
Панылы сорам
0
Ха-ха
0
Ого
0
Сумна
0
Абуральна
0