Zachad, uschod ci centr Biełarusi — taja samaja karcina. Na fota, dasłanym našym čytačom Juryjem z Žodzina, subota, 30 maja, sotni ludziej pad daždžom stajać u čarzie, kab padpisacca za Śviatłanu Cichanoŭskuju, a faktyčna — suprać Alaksandra Łukašenki.

Ničoha padobnaha 65-tysiačny BiełAZaŭski haradok u Minskaj vobłaści nikoli nie bačyŭ.

Taja samaja karcina nazirałasia siońnia ŭ inšych haradach krainy, niahledziačy na ŭčarašniaje — čarhovaje — zatrymańnie videabłohiera Siarhieja Cichanoŭskaha.

Nikoli ŭ historyi takija čerhi nie stajali ŭ Lidzie:

Minsk:

Maładziečna:

Orša:

Hrodna, miesca ŭčarašniaha zatrymańnia:

U čerhach stajać ludzi roznych uzrostaŭ, pieravažna ŭ maskach, što śviedčyć pra ich sacyjalnuju adkaznaść.

Žonka Siarhieja Cichanoŭskaha, nastaŭnica, jakaja ciapier siadzić doma z małymi dziećmi, padała dakumienty na rehistracyju, kab stać kandydatkaj u prezidenty. Heta adbyłosia paśla taho, jak jaje muža aryštavali na 15 sutak pierad abviaščeńniem prezidenckich vybaraŭ, kab nie dać jamu mahčymaści bałatavacca.

Cichanoŭski zaklikaje da vuličnych akcyj pratestu suprać režymu Alaksandra Łukašenki. Jahony błoh u jutubie staŭ adnym z samych papularnych u krainie. 

Žodzina — pramysłovy centr niedaloka ad Minska, dzie vypuskajuć znakamityja BiełAZy. Ekanamičnaja situacyja ŭ horadzie ciažkaja ŭ suviazi sa źnižeńniem popytu na hetyja samazvały.

Učora Siarhieja Cichanoŭskaha zatrymali ŭ Hrodnie. Ale pravakacyja, jakaja papiaredničała zatrymańniu, trapiła na videa, i za noč karystalniki internetu identyfikavali žančynu, jakaja adyhrała ŭ joj centralnuju rolu.

Čytajcie taksama: «Pryjemnaja dziaŭčyna pyšnych form». Identyfikavali pravakatarku z sustrečy ź Cichanoŭskim

Ludzi ŭ čerhach nastrojenyja radykalna. «Kolki možna? Kolki ŭžo možna? Voś čamu ja tut!» — adkazała karespandentu «Našaj Nivy» žančyna ŭ čarzie da punkta zboru podpisaŭ za Śviatłanu Cichanoŭskuju ŭ Minsku. Jana skazała, što źbirajecca «pastavić podpis i za Babaryku, i za Capkału. Chto zaŭhodna, tolki nie jon [Alaksandr Łukašenka]».

Prychilniki Alaksandra Łukašenki sprabujuć pierajści ŭ infarmacyjny kontrnastup, ale heta pakul nie nadta ŭdajecca. Pad videa BT pra ŭčarašniaje zatrymańnie Cichanoŭskaha — tysiačy niehatyŭnych kamientaroŭ i dyzłajkaŭ. Tysiačy hnieŭnych vodhukaŭ źjavilisia ŭ fejsbuku sienatarki ź Minska Maryny Iljinoj, jakaja apublikavała ŭ fb dopis, u jakim aburajecca pikietam Siarhieja Cichanoŭskaha ŭ Hrodnie. 

Zatrymańnie Siarhieja Cichanoŭskaha dało taksama impuls abjadnańniu alternatyŭnych kandydataŭ.

Valeryj Capkała z žonkaj siońnia publična addali svaje podpisy Śviatłanie Cichanoŭskaj.

Papularny lidar chryścijanskich demakrataŭ Pavieł Sieviaryniec zaklikaŭ ludziej pa ŭsioj krainie ŭ niadzielu a 12-j hadzinie sabracca na pikietach pa zbory podpisaŭ za Śviatłanu Cichanoŭskuju.

A bankir i miecenat Viktar Babaryka, jaki, pavodle źviestak internet-apytańniaŭ, vyrvaŭsia ŭ lidary prezidenckaj kampanii, nazvaŭ zatrymańnie Cichanoŭskaha «niezakonnym» i paabiacaŭ jurydyčnuju i finansavuju padtrymku ŭsim, kaho začepiać represii ci na kaho buduć cisnuć.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?