Valer Capkała sustreŭsia z žycharami Horadni na Savieckaj płoščy 5 červienia. Jon adkazaŭ na pytańni haradziencaŭ pra AES, biełaruskuju movu i vojska, paviedamlaje Svaboda.
Na sustreču z patencyjnym kandydatam u prezydenty pryjšło bolš za sotniu čałaviek. Na pytańnie, jak jon stavicca da biełaruskaj movy, Capkała ŭ adkazie ŭžyŭ tolki adzin vyraz pa-biełarusku — «matčyna mova», astatniaje było pa-rasiejsku. Jon adznačyŭ, što ŭ škole pa biełaruskaj movie mieŭ «5» pa 5-balnaj systemie, a pa rasiejskaj movie — «4».
«Ja, kaniečnie, abiacaju, što budu padciahvać. Ja kryšku saromiejusia pakul razmaŭlać, ale mnie treba hety niedachop… Ja ŭračysta abiacaju, što ja jaho vielmi-vielmi chutka likviduju. Prosta nie było nieabchodnaści ŭ pracy. Ja ciapier razumieju, što nieabchodna budzie ŭ budučyni pakazvać prykład vykarystoŭvańnia nacyjanalnaj movy», — paabiacaŭ vyłučeniec u kandydaty ŭ prezydenty.
Na pytańnie, čamu jon nie adkazaŭ, kali jaho abraziŭ Alaksandar Łukašenka, Capkała skazaŭ, što nia choča karystacca takimi metadami dyskusii.
«Ja chaču pakazvać uzor narmalnych pavodzin, narmalnaj dyskusii. Ja nie chaču skočvacca da takoha ž uzroŭniu i adkazvać takim ža čynam», — padkreśliŭ jon.
Capkała ličyć, što vojska pavinna być prafesijnym.
«Pavinien być konkurs u vojska. Siońnia, ja ŭpeŭnieny, čałaviek, jaki kiruje dronam, bolš efektyŭny za 10 tysiač čałaviek z aŭtamatam Kałašnikava», — skazaŭ Capkała.
Na jahonuju dumku, mužčynam varta pryśviacić niekalki dzion, kab navučycca źbirać i raźbirać aŭtamat, stralać pa mišeniach na palihonie — i hetaha dastatkova ŭ planie vajskovaj padrychtoŭki.
Na dumku Capkały, Biełaruś nia zdoleje supraćstajać NATO abo Rasiei, navat kali b addavała ŭsie srodki na ŭzbrajeńnie.
BiełAES Capkała nazvaŭ surjoznaj prablemaj.
«Ja miarkuju, heta było kalasalnaj pamyłkaj — pazyčać hrošy ŭ Rasiei, dzie ŭ nas niama ni technalohij, ni syraviny», — skazaŭ vystupoŭca.
Jon hatovy jaje zakryć, kali vydatki voźmie na siabie Eŭraźviaz.
«Kali heta surjoznaja zakłapočanaść z boku Litvy, krain Eŭraźviazu… Chłopcy, dajcie nam 10 miljardaŭ, my zakryjem atamnuju elektrastancyju, my raspłacimsia z Rasiejaj i zakryjem hetuju atamnuju elektrastancyju», — zajaviŭ Capkała i vyklikaŭ vopleski.
