9 kastryčnika zatrymali šeść z 19 čałaviek, jakija znachodzilisia ŭ ahulnym čacie dla administrataraŭ rajonnych čataŭ, paviedamiła blizkaja da zatrymanych krynica Hrodna.life.
Jany prachodziać padazravanymi pa spravie, zaviedzienaj pa art. 342 KK — Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich. Z 9 kastryčnika jany znachodziacca ŭ izalatary časovaha ŭtrymańnia ŭ Hrodnie.
Kala 10.00 9 kastryčnika ŭ Hrodnie pa darozie na pracu zatrymali administratarku adnaho z rajonnych čataŭ u Telegram Jaŭhieniju. Jaŭhieniju pavieźli spačatku ŭ Hałoŭnaje ŭpraŭleńnie pa baraćbie suarhanizavanaj złačynnaściu i karupcyjaj, zatym — u Śledčy kamitet, i dapytvali da poźniaha viečara. Pra heta Hrodna.life paviedamiŭ Alaksandr — administratar adnaho z rajonnych čataŭ, jakomu dziaŭčyna patelefanavała paśla dopytu.
Pavodle infarmacyi Hrodna.life, čat uzłamali i zatrymali ŭdzielnikaŭ, jakich identyfikavali. Zaraz šeść čałaviek znachodziacca ŭ IČU. Jany pad padpiskaj ab nierazhałošvańni. Abstaviny spravy, zaviedzienaj pa art. 342 KK, nieviadomyja. Atrymać kamientar u pres-słužbie ŭpraŭleńnia Śledčaha kamiteta Respubliki Biełaruś pa Hrodzienskaj vobłaści na 10 kastryčnika Hrodna.life nie ŭdałosia.