2 listapada prajšło pasiedžańnie sudu Partyzanskaha rajona Mienska pa skarzie advakata Ihara Łosika na ŭtrymańnie pad vartaj, piša Radyjo Svaboda.
13 kastryčnika błohieru i kansultantu Radyjo Svaboda Iharu Łosiku, jakoha pryznali palatviaźniem, praciahnuli termin utrymańnia pad vartaj jašče na dva miesiacy. Pavodle rašeńnia śledčych Ihar pavinien znachodzicca va ŭmovach Žodzinskaj turmy da 25 śniežnia 2020 hodu.
Siońnia adbyłosia sudovaje pasiedžańnie pa skarzie Iharavaha advakata na padaŭžeńnie terminu ŭtrymańnia pad vartaj. Skarhu razhladaŭ sud Partyzanskaha rajonu Miensku. Sudździa Taciana Alejnikava adchiliła dovady abarony i admoviłasia vyzvalić Ihara z-pad varty.
Ciaham sutak advakat źbirajecca abskardzić hetaje rašeńnie ŭ Mienskim haradzkim sudzie.
Ihar Łosik raniej skardziŭsia na choład i kiepskija pabytovyja ŭmovy ŭ žodzinskim izalatary i blakavańnie pierapiski z kalehami i siabrami.
Pabytovyja ŭmovy ŭ jaho ciapier krychu palepšylisia, prynamsi ŭ turmie ŭklučyli aciapleńnie, lepiej stała i ź pierapiskaj, da Ihara pačali dachodzić listy, u tym liku ad siabroŭ i kalehaŭ. Na ŭsie listy i paštoŭki jon starajecca adkazvać.
Na administratara supołki «RB hołovnoho mozha» i fryłansera-kansultanta Radyjo Svaboda Ihara Łosika zaviali kryminalnuju spravu pavodle artykuła za arhanizacyju masavych biesparadkaŭ.
Łosika zatrymali 25 červienia paśla pieratrusu doma ŭ Baranavičach. Na jahony telehram-kanał «RB hołovnoho mozha» ŭ toj momant byli padpisanyja 167 tysiač čałaviek (ciapier — zvyš 400 tysiač).
Ihar Łosik aktyŭna aśviatlaŭ padziei vakoł sioletnich vybaraŭ prezydenta Biełarusi. Pravaabaroncy pryznali Ihara Łosika palitviaźniem.
Kankretnych skarhaŭ pa zdaroŭi ŭ Ihara Łosika niama, jon prymaje medykamenty, jakija jamu patrebnyja, ale ahułam znachodžańnie pad vartaj kiepska paŭpłyvała na stan jahonaha zdaroŭja.
Doma Ihara čakajuć žonka i dvuchhadovaja dačka.
