Nie mienš jak 323 čałavieki byli zatrymanyja ŭ Biełarusi ad minułaha paniadziełka da niadzieli pa palityčnych matyvach. Stolki imionaŭ viedajuć pravaabaroncy. (Na papiarednim tydni byŭ zatrymany 381 čałaviek, dva tydni tamu — 433 čałavieki.)
Takim čynam, jak padličyła «Naša Niva», ahulnaja ličba zatrymańniaŭ za čas pratestaŭ dasiahnuła jak minimum 32 018.
Varta adznačyć, što hetaja ličba daloka nie poŭnaja. Zatrymanych stolki, što ŭličyć usich niemahčyma. Navat ahulnaja kolkaść ludziej, aryštavanych pa kryminalnych spravach, pakul dakładna nieviadomaja, bo ich vielmi šmat.
Na hety momant viadoma 585 čałaviek (hety śpis pa spasyłcy niapoŭny, pravaabaroncam viadomyja imiony tolki tych ludziej, čyje svajaki paviedamili), jakija prachodziać pa kryminalnych artykułach. Ź ich, pa padlikach, «Našaj Nivy», 271 abo znachodzicca pad vartaj u SIZA i IČU, abo asudžany da pazbaŭleńnia ci abmiežavańnia voli.
— ad Siarhieja Cichanoŭskaha i Viktara Babaryki da žurnalistak Kaciaryny Barysievič i Kaciaryny Andrejevaj i rabočych Žłobinskaha mietałurhičnaha zavoda, dzie kryminalnuju spravu zaviali za zabastoŭku.
Ahułam viadomych kryminalnych spraŭ bolš za 900. Nie mienš za 320 pradpryjemstvaŭ i biznesaŭ trapili pad ekanamičnyja represii za padtrymku pratestaŭ.
Na minułym tydni, akramia Minska, zatrymlivali ludziej taksama ŭ Śmiłavičach Červieńskaha rajona (7 čałaviek), Navapołacku (5 čałaviek na dziciačym śviacie), Breście, Mahilovie, Maładziečnie, Babrujsku, Hrodnie, Baranavičach, Salihorsku, Mazyry, Ratamcy, Radaškovičach, Viciebsku, Baraŭlanach, Barysavie.
U Breście 20 śniežnia zatrymali chłopca, jaki vyjšaŭ na piešachodnuju vulicu z dreŭkam bieź ściaha.
A ŭ Minsku, paviedamlaje Spring96.org, z pracy zabrali i advieźli ŭ Pieršamajskaje RUUS 68-hadovuju Śviatłanu Staradubiec. U pastarunku na žančynu skłali pratakoł pa art. 23.34 KoAP za vyviešany hierb «Pahonia» pamieram farmatu A4 ŭ aknie jaje kvatery na čaćviortym paviersie. U toj ža i dzień adbyŭsia i «sud». Sudździa Taćciana Lińnik pryznała Śviatłanu Staradubiec vinavataj i pakarała štrafam 10 bazavych vieličyń (270 rubloŭ).
Možna z dakładnaściu skazać, što heta samyja masavyja palityčnyja represii ŭ Jeŭropie za apošnija 40 hadoŭ.
Dla paraŭnańnia: kali b u praporcyi na dušu nasielnictva stolki ž ludziej zatrymali ŭ Rasii, heta skłała b 480 000. Kali b va Ukrainie ci Polščy — 130 tysiač.
Voś jašče fakty z chroniki pravaabaroncaŭ.
Žycharu Hłybokaha Alaksandru Šarabajku za ściah nad domam prysudzili štraf u pamiery 40 bazavych vieličyniaŭ. Pa słovach Alaksandra, sudździa spytaŭ u jaho, kolki času ŭ jaho visieŭ ściah. Jon adkazaŭ, što ŭ sakaviku było b piać hadoŭ.
17 śniežnia ŭ Minsku supracoŭniki SACHR zatrymali Dzianisa Nasoviča. Spačatku jaho dastavili ŭ Śledčy kamitet Savieckaha rajona stalicy ŭ jakaści padazravanaha pa kryminalnaj spravie pavodle art. 346 Kryminalnaha kodeksa («Ździek nad historyka-kulturnymi kaštoŭnaściami»), a paśla advieźli ŭ IČU na Akreścina.
Da bastujučych Salihorska i ich rodnych prychodzili z vobšukami supracoŭniki HUBAZiK. Pra heta paviedamlaje telehram-kanał stačkama AAT «Biełaruśkalij». Na padstavie baraćby z «ekstremisckimi zaklikami» ŭ rabočych kanfiskoŭvajuć kampjutary i noŭtbuki, telefony, płanšety dy inšuju elektronnuju techniku, ahladajuć abstanoŭku ŭ kvaterach i pravodziać apieratyŭnyja videazdymki.
Siem žycharoŭ Minskaj vobłaści padazrajucca ŭ abrazie pradstaŭnika ŭłady, kryminalnaja sprava raspačataja pavodle art. 369 Kryminalnaha kodeksa. Adzin ź fihurantaŭ znachodzicca ŭ Niamieččynie. Astatnija pražyvajuć na terytoryi Minskaj vobłaści, ich dapytali i jany dajuć pryznalnyja pakazańni, kažuć u milicyi.
«U vieraśni, pad vydumanymi niknejmami fihuranty raźmiaščali abraźlivyja kamientary ŭ adras supracoŭnika Žodzinskaha HAUS. U jakaści placoŭki dla vykazvańnia svaich dumak vybrali sacyjalnuju sietku «Adnakłaśniki» i telehram-kanał «Žodzina dla žyćcia», - adznačajecca ŭ pres-relizie UUS.
U Minsku 21-hadovaja dziaŭčyna raźmiaściła abraźlivy kamientar u telehram-kanale «Karniki Biełarusi» pad apublikavanaj tam fatahrafijaj z asabistymi dadzienymi pracaŭnika adnaho sa staličnych RUUS. Pa hetym fakcie była raspačataja kryminalnaja sprava pavodle art. 369 Kryminalnaha kodeksa. Dziaŭčyna zatrymanaja i źmieščanaja ŭ IČU.
Pa infarmacyi «Biełsata», u Pastavach za BČB-ściah na dvary zatrymali fiermiera Paŭła Marozava. Jahonaja žonka Śniažana Marozava ŭ hety čas była ŭ Hłybokim. Doma zastavaŭsia muž ź dziećmi 7 i 11 hadoŭ. Kali baćku zatrymlivali i zdymali ściah, adzinaccacihadovaja dziaŭčynka sprabavała źniać heta na mabilny telefon. Ale milicyjanty zapužali jaje i nie dali zdymać, choć jana znachodziłasia ŭ svaim dvary. Paŭła Marozava zabrali ŭ pastarunak, pakinuŭšy dziaciej, jakija byli vielmi spužanyja, adnych. Žoncy paviedamili, što da suda jaho buduć utrymlivać pad aryštam z toj pryčyny, što jon užo niekalki razoŭ pryciahvaŭsia da adkaznaści pa artykułu 23.34 KoAP.
Nočču ŭ Minsku paśla pieratrusu byŭ zatrymany ŭ miežach kryminalnaj spravy Siarhiej Zialinski. Jaho dastavili ŭ Zavodskaje RUUS.
Kryminalnuju spravu zaviali suprać aktyvista štaba Viktara Babaryki, vałanciora «Sumlennych ludziej» 38-hadovaha Viktara Łosika. Jaho zatrymali na «Maršy voli» 6 śniežnia i asudzili pa art. 23.34 KoAP na 8 sutak. Ciapier stała viadoma, što na jaho zaviali dźvie kryminalnyja spravy pa dvuch artykułach Kryminalnaha kodeksa: 339 (chulihanstva) i 341 (apahańvańnie zbudavańniaŭ i psavańnie majomaści). Što mienavita jamu staviać u vinu — pakul nieviadoma.
Supracoŭniki Maskoŭskaha RUUS zatrymlivali žančynu za bčb-ściah na łodžyi. Niahledziačy na toje, što ŭ žančyny doma niepaŭnaletniaje dzicia, jaje adpravili da suda pa art. 23.34 KoAP na Akreścina.
U Skidzieli byŭ zatrymany indyvidualny pradprymalnik za pahrozy milicyjantam u telehram-čacie, paviedamiŭ tielehram-kanał pres-słužby MUS. Jak śćviardžaje pres-słužba, 38-hadovy skidzielec sa žniŭnia da śniežnia raźmiaščaŭ u rehijanalnych telehram-čatach zakliki da hvałtu ŭ dačynieńni da milicyjantaŭ. Suprać jaho raspačali kryminalnuju spravu. Viedamstva raźmiaściła pakajannaje videa z žycharom Skidziela, jaki staić u pamiaškańni ź dziaržaŭnym ściaham i płakatam HUBAZiKa i kaža, što zatrymany za ŭdzieł u telehram-kanałach.
U Minsku ŭ Frunzienskim rajonie za BČB-ściah na aknie byŭ zatrymany Andrej Račałoŭski. Jaho źmiaścili ŭ IČU na Akreścina da suda.
U Maładziečnie siońnia byŭ zatrymany 19-hadovy Alaksiej Krenć. Supracoŭniki milicyi zabrali z domu jaho i kampjutar. Paźniej stała viadoma, što chłopcu inkryminujuć artykuł 369 Kryminalnaha kodeksa (abraza pradstaŭnika ŭłady).
Kala svajho doma ŭ Połacku byŭ zatrymany staršynia KRK Svabodnaha prafsajuza Biełaruskaha Viktar Stukaŭ. Padstavaj staŭ nibyta niapravilny pierachod vulicy. Praz 3 hadziny ŭ milicyi skazali, što jaho nie adpuściać. Viktar źjaŭlajecca taksama staršynioj pieršasnaj prafsajuznaj arhanizacyi rabotnikaŭ AAT «Połack-Škłovałakno» SPB.
U Minsku 19 śniežnia za BČB-firanki na bałkonie zatrymali šmatdzietnuju maci Kaciarynu Byčko. U Partyzanskim RUUS blizkim Kaciaryny paviedamili, što jana zatrymanaja da suda, to-bok minimum da paniadziełka.
U sudzie Śvietłahorskaha rajona siońnia byŭ ahučany prysud pa spravie Siarhieja Mirajeŭskaha za dopisy ŭ telehram-kanale «Śvietłahorsk dla žyćcia». Jaho vinavacili pa č. 1 art. 342 Kryminalnaha kodeksa - «Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich». Sudździa Alaksandr Vałodźkin pryznaŭ Siarhieja Mirajeŭskaha vinavatym i pakaraŭ jaho 2,5 hadami abmiežavańnia voli z nakiravańniem u papraŭčuju ŭstanovu adkrytaha typu. Telefon Mirajeŭskaha, zhodna z pastanovaj suda, kanfiskavali jak srodak ździajśnieńnia złačynstva.
Zatrymany administratar kanała «Karniki Maładziečna», — śćviardžaje MUS. «Supracoŭniki HUBAZiK MUS vyjšli na 18-hadovaha studenta z Maładziečna, jaki kiravaŭ telehram-kanałam «Karniki Maładziečna». Chłopiec nie tolki raźmiaščaŭ u čatach piersanalnyja źviestki supracoŭnikaŭ pravaachoŭnych orhanaŭ, ale i ahitavaŭ za ŭdzieł u masavych biesparadkach na terytoryi Minskaj vobłaści», — paviedamlaje pres-słužba viedamstva.
Mužčynu, jaki chadziŭ na akcyi pratestu z rasijskim ściaham u Minsku, asudzili za supraciŭ milicyi. Sud Pieršamajskaha rajona Minska 21 śniežnia asudziŭ pa č. 1 art. 363 Kryminalnaha kodeksa (supraciŭ supracoŭniku orhanaŭ unutranych spraŭ) 46-hadovaha indyvidualnaha pradprymalnika Śviatasłava Zajcava. Mužčynu abvinavacili ŭ tym, što jon supraciŭlaŭsia pry zatrymańni 17 vieraśnia paśla Łancuha salidarnaści va Uruččy.
U toj viečar Zajcaŭ chacieŭ dałučycca da akcyi z rasijskim ściaham, ale byŭ zatrymany i źbity supracoŭnikami AMAPa ŭ aliŭkavaj formie. Z RUUS Pieršamajskaha rajona z čerapna-mazhavoj traŭmaj jaho dastavili ŭ reanimacyju, a potym u chirurhičnaje adździaleńnie, kudy pryjšli supracoŭniki milicyi i zaklučyli jaho pad vartu, prykavaŭšy kajdankami da balničnaha łožku na 72 hadziny.
Paciarpiełyja supracoŭniki AMAPa, źviestki jakich u materyjałach spravy byli źmienienyja, a sami ŭ sud pryjšli ŭ bałakłavach i kiepkach, na sudzie skazali, što Zajcaŭ užyvaŭ da ich hvałt, padčas śledstva jany hetaha nie zajaŭlali. Adnak pieršapačatkova dziejańni mužčyny byli kvalifikavanyja pavodle č. 2 art. 363 KK — supraciŭ supracoŭniku orhanaŭ unutranych spraŭ z užyvańniem hvałtu.
Sudździa Śviatłana Čarapovič pryznała Śviatasłava Zajcava vinavatym pavodle č. 1 art. 363 KK, vyklučyŭšy z abvinavačvańnia «hvałt» u dačynieńni da supracoŭnikaŭ milicyi, i pakarała mužčynu 2 hadami abmiežavańnia voli biez nakiravańnia va ŭstanovu adkrytaha typu («chatniaja chimija»).
Čytajcie taksama: Tatalny kantrol za aŭtazakami: jak adzin ź minskich rajonaŭ patruluje terytoryju padčas niadzielnych maršaŭ
