Čytačy TUT.BY, jakija pražyvajuć u Zialonym Łuzie, praciahvajuć skardzicca na jakaść vady z-pad krana. Voś tak 27 śniežnia a 10 ranicy vyhladała vada ŭ domie minčanki Natalli, jakaja žyvie na vulicy Cikockaha, što adnosicca da Pieršamajskaha rajona Minska.
Pa słovach čytački, voś takaja vada ciakła ŭ jaje z krana a 10 ranicy 27 śniežnia. Fota: čytačy TUT.BY
Pa słovach čytački, vada karyčnievaha koleru źjaviłasia ŭ ich kranie ŭčora kala poŭdnia. Da viečara situacyja krychu palepšyłasia, ale da 10 ranicy niadzieli koler vady znoŭ staŭ niepryjemnym.
— Pachu ŭ hetaj vady niama, ale, kali jaje nabrać u niejki posud, adrazu ž źjaŭlajecca asadak — raspaviadaje Natalla. — Ranicaj my datelefanavalisia ŭ «115». Tam adkazali, što prablema paŭstała z-za zboju technałahičnaha abstalavańnia. Papiaredzili: takaja situacyja budzie da 8 ranicy 28-ha i, mahčyma, u nastupnyja sutki.
Učora, praciahvaje Natalla, da ich damoŭ padjazdžali cysterny z vadoj. Siońnia jana taksama pakinuła zajaŭku na padvoz pitnoj vady.
Nahadajem, u subotu, 26 śniežnia, u žycharoŭ Savieckaha i Centralnaha rajonaŭ Minska paŭstali prablemy ź jakaściu vady. Pryčyna — zboj u pracy pompavaha abstalavańnia. Da viečara ŭ aficyjnym Telegram-kanale Minharvykankama źjaviłasia infarmacyja ab tym, što ŭ krany spažyŭcoŭ paciarpiełych rajonaŭ pačała viartacca narmalnaja vada. Pry hetym adznačałasia, što pramyvańnie sietak praciahvajecca.
Paralelna z hetym, havaryłasia ŭ paviedamleńni, aŭtacysterny buduć pastaŭlać pitnuju vadu ŭ paciarpiełyja rajony da poŭnaj likvidacyi prablemy. Adnačasova praciahniecca dadatkovy łabaratorny kantrol jakaści vadapravodnaj vady ŭ hetych kvartałach.
