fota z Ukantakcie
35-hadovy minčuk Pavieł Bańkoŭski padpaliŭ siabie na płoščy Niezaležnaści ŭ Minsku. Jaho advieźli ŭ Respublikanski apiokavy centr, u jaho bolš za 50% apiokaŭ.
Čytajcie: Na płoščy Niezaležnaści čałaviek ździejśniŭ samapadpał
Što heta za čałaviek? Cacyjalnyja sietki Paŭła abnaŭlalisia niačasta, na staroncy «Ukantakcie» niekalki repostaŭ z «Našaj Nivy» i «Radyjo Svaboda» za 2015 hod. Niekatoryja kamienty pisaŭ pa-rusku, niekatoryja pa-biełarusku.
Šmat zdymkaŭ ź siamjoj — z žonkaj, dziećmi. Na mory, u lesie, na šašłykach… Asobny płast fota — z rycarskich festaŭ. U 2000-ja Pavieł aktyŭna prymaŭ u ich udzieł.
«Naša Niva» pahavaryła z Kaciarynaj Bańkoŭskaj. Jak akazałasia, byłoj žonkaj.
«Ja nie razumieju, što adbyvajecca, zaraz pajedu ŭ balnicu. Ale tam mnie skazali, što dakumientaŭ pry im nie było», — kaža žančyna. Jana jašče trochi spadziajecca, što heta pamyłka.
Ale kali spaliŭ siabie sapraŭdy jaje były muž, to što mahło być pryčynaj?
«Apošnim časam u jaho byŭ ciažki pieryjad. My ŭ razvodzie sa žniŭnia — nie z palityčnych pryčyn.
Usio heta jašče mahło zdarycca tamu, što jon pieražyvaŭ, što siamju padvodzić. Bo pje i nie moža spravicca z hetym.
Ale čamu jon pajšoŭ na płošču — ja nie razumieju ŭvohule».
Pavieł pracavaŭ kiroŭcam. Apošnim časam, pa słovach byłoj žonki, žyŭ to ŭ siabroŭ, to ŭ svajoj maci, to jašče niedzie.
«Z mamaj Paŭła ja havaryła — jana taksama ničoha nie viedaje», — kaža žančyna.
