Sioleta da šeścia dałučylisia i biełarusy, jakija vymušana źjechali va Ŭkrainu ź Biełarusi ad represij i pad pahrozaj kryminalnaha pieraśledu, piša «Radyjo Svaboda».
Šeście prachodziła tym ža maršrutam, što i siem hadoŭ tamu, kali 26 studzienia 2014 hodu ŭ apošni šlach pravodzili hramadzianina Biełarusi Michasia Žyźnieŭskaha, jaki zahinuŭ ad kuli snajpera ŭ časie masavych akcyj pratestu ŭ Kijevie ŭ 2013-2014 hadach.
Udzielniki prajšli šeściem ad Michajłaŭskaj da Safijskaj płoščy, Chraščacikam i nakiravalisia da vulicy Hrušeŭskaha, dzie na miescy zabojstva Michasia Žyźnieŭskaha staić pamiatny znak.
U časie maršu aktyvisty nieśli vialiki ściah, u jakim abjadnalisia bieł-čyrvona-biełaje i žoŭta-błakitnaje pałotniščy. Udzielniki akcyi skandavali «Słava Ŭkrainie!», «Žyvie Biełaruś!», «Hieroi nie pamirajuć», «Vierym, možam, pieramožam», «Michaś Žyźnieŭski — hieroj Ukrainy i Biełarusi», «Za našu i vašu svabodu», «Razam pieramožam!».
