Žychar vioski Chorsk Stolinskaha rajona Michaił Pryko ličyć śpiektaklem budučy VI Usiebiełaruski narodny schod. Ale, kab pradstavić tam punkt hledžańnia, alternatyŭny aficyjnamu, pažadaŭ uziać u im udzieł. I nakiravaŭ u Stolinski rajvykankam zvarot z prośbaj rastłumačyć jamu paradak abrańnia delehataŭ, piša media-polesye.by.
Prasiŭ adkazać jamu na praciahu 5 dzion, pakolki da daty praviadzieńnia forumu zastavałasia zusim niašmat času.
Adkaz pryjšoŭ praz 2 tydni.
U im havorycca, što pavodle kvoty Bresckaha abłasnoha arhanizacyjnaha kamiteta, Stolinski rajon na Usiebiełaruskim narodnym schodzie buduć pradstaŭlać 16 čałaviek.
Śpis kandydataŭ ź liku deputataŭ miascovych savietaŭ vyznačyli na sumiesnym pasiadžeńni arhkamiteta i Prezidyuma Stolinskaha rajonnaha Savieta deputataŭ 28 śniežnia 2020 hoda, a 5 studzienia 2021 hoda zaćvierdzili na siesii rajsavieta.
Na pasiadžeńni arhkamiteta, havorycca ŭ adkazie, taksama abmierkavali kandydatury, jakija vystaŭlajucca ad hramadskich abjadnańniaŭ kolkaściu nie mienš za 100 tysiač siabroŭ. Jany pradstaŭlenyja na zaćviardžeńnie na pasiadžeńniach kirujučych orhanaŭ respublikanskaha ŭzroŭniu.
Takim čynam, delehavać Michaiła Pryko na Usiebiełaruski narodny schod nie ŭjaŭlajecca mahčymym.
Stolinski rajvykankam rekamiendavaŭ Michaiłu ŭziać udzieł u pracy dyjałohavych placovak i hramadskich pryjomnych, čytać rajonnuju hazietu, a za aktualnaj infarmacyjaj ab schodzie sačyć na aficyjnym sajcie i ŭ sacyjalnych sietkach.
— Biehli napieradzie paravoza, — prakamientavaŭ Michaił Pryko dziejańni Stolinskaha rajvykankama i Savieta deputataŭ. — Ukaz Łukašenki ab sklikańni Usiebiełaruskaha schodu padpisany 28 śniežnia 2020 hoda. I ŭ hety ž dzień u Stolinie vyznačylisia z kandydatami ŭ delehaty. Pryčym, poŭny śpis delehataŭ da hetaha času nie apublikavany. Viadomyja tolki niekalki proźviščaŭ.
