Biełaruskaja i rasijskaja prapahanda z dnia ŭ dzień nyje ab «dvajnych standartach» kryvadušnaha Zachadu, ab tym, što zachodnija krainy nibyta sparadzili masavyja pratesty ŭ Biełarusi. Asabliva dastajecca ZŠA, Litvie i Polščy. Apošniaja nibyta naohuł pahražaje zachapić Biełaruś ci jaje častku, piša ŭ fejsbuku palitołah Andrej Jelisiejeŭ.
Ujavicie na chvilinu takuju situacyju.
Pry polskaj ambasadzie ŭ Minsku dziejničaje tak zvanaja Asacyjacyja polskich suajčyńnikaŭ u Biełarusi. Jaje sajt rehularna raźmiaščaje publikacyi pra toje, što biełaruskaha naroda nibyta nie isnuje, i pra toje, što biełarusy — heta nibyta raznavidnaść polskaha naroda. Kiraŭnik hetaj asacyjacyi dakazvaje, što Biełarusi treba chutčej admovicca ad svajho suvierenitetu na karyść Polščy.
Ujavicie taksama, što hety sajt dajšoŭ až da taho, što pačaŭ publikavać vinšavańni ad imia ŭsiakich aktyvistaŭ, jakija zyčać Polščy viarnucca ŭ miežy 1939 hoda i zaviaršajuć svaje pažadańni słovami «ciarpieńnia, vajna tolki pačynajecca».
Kali b heta adbyłosia, to prapahandysty kštałtu Azaronka i Sałaŭjova narešcie atrymali b hruntoŭnuju padstavu apantana kryčać ab polskim impieryjaliźmie. Biełaruski i rasiejski MZS i inšyja ministerstvy vydali b dziasiatak prakłamacyj ab zachodniaj pahrozie. A to i arhanizavali b pazačarhovyja vajskovyja vučeńni. Pravakacyja ž nie na žart!
Dyk voś, ničoha z hetaha, zrazumieła, niama. Niama takoj asacyjacyi i niama takoha sajta pry polskaj ambasadzie, niama takich vajaŭničych publikacyj, jakija pahražajuć biełaruskamu suvierenitetu i terytaryjalnaj cełasnaści.
Zatoje ŭsio heta jość pry rasijskim pasolstvie.
Jość sajt «Razam z Rasijaj», damien jakoha naležyć rasijskamu pasolstvu. Hety sajt reprezientuje Kaardynacyjnuju radu kiraŭnikoŭ biełaruskich hramadskich abjadnańniaŭ rasijskich suajčyńnikaŭ (KRARS).
Kiraŭnik KSARS i redaktar sajta Andrej Hieraščanka i jahonyja adnadumcy klapajuć niebylicy pra varožy, a to i «nacyscki» Zachad, «tryadziny rasiejski narod», usiakuju kanśpirałohiju pra pratesty, prasoŭvajuć «pahłyblenuju intehracyju» (ci to z Rasiejaj, ci to ŭžo ŭ Rasieju), jakaja pahražaje biełaruskamu suvierenitetu.
Narešcie, adno z navahodnich vinšavańniaŭ sajta «Razam z Rasiejaj» ad imia Uładzimira Ryžankova, kiraŭnika biełaruskaha adhalinavańnia tak zvanaha «nacyjanalna-vyzvolnaha ruchu», zyčyć «pieramohi Pucina i poŭnaha adnaŭleńnia suvierenitetu Rasiei … u miežach 1945 hoda».
I šmatznačna dadaje ŭ kancy: «ciarpieńnia, vajna tolki pačynajecca».
I što ž biełaruski MZS, usie vialikija i małyja «haranty i abaroncy» biełaruskaha suvierenitetu i zmahary z padvojnymi standartami? Moža być, choć chto-niebudź ź ich skazaŭ z hetaj nahody choć adno słova?
Cišynia…
