Pieršy taki forum adbyvaŭsia šeść hadoŭ tamu. Staršynia BSDP Ihar Barysaŭ kaža, što adnoj z metaŭ hetaha mierapryjemstva — pakazać, što dziaržaŭnamu «levamu papulizmu» isnuje «levaja demakratyčnaja alternatyva». Apošnim časam šmat uvahi nadajecca palityčnym pytańniam, a voś sacyjalnyja dastatkova časta zabyvajucca. Tamu jašče adna zadača — pryciahnuć uvahu da sacyjalnych prablem u hramadstvie.
Ihar Barysaŭ. Fota left.by.
U forumie voźmie ŭdzieł kala 200 delehataŭ. Buduć praviedziena try panielnyja pasiedžańni: pa palityčnych pytańniach, sacyjalna-ekanamičnych i ekałahičnych.
Naprykancy foruma buduć pryniatyja dva manifiesty — palityčny i sacyjalny. Praŭładnyja telehram-kanały kažuć, što manifiesty ŭžo daŭno napisanyja. Barysaŭ havoryć, što rychtavać papiaredni prajekt — heta narmalnaja praktyka, ale ŭdzielniki foruma mohuć unieści svaje praŭki ŭ dakumienty, kali jany buduć padtrymanyja astatnimi ŭdzielnikami.
Admietna, što Biełaruskaja sacyjał-demakratyčnaja Hramada, jakuju ŭznačalvaje Siarhiej Čeračań u pracy forumu ŭdzieł brać nie budzie. Čamu?
«U nas histaryčna skłałasia supracoŭnictva sa «Spraviadlivym śvietam», a taksama Biełaruskaj partyjaj «Zialonyja». Što tyčycca BSDH, to raniej na adnym sa svaich źjezdaŭ jany sprabavali źmianić nazvu partyi, vykinuŭšy ź jaje spałučeńnie słoŭ «sacyjał-demakratyčnaja», adnak vyrašyli pakinuć, bo jość ŭ Partuhalii prykład, kali partyja nazyvajecca sacyjał-demakratyčnaj, adnak jana pravaja pa prahramie i ideałohii.
BSDH u našym parazumieńni naležyć, pa svajoj sutnaści i prahramie, chutčej da pravaha centru, čym da levaha», — tłumačyć Barysaŭ.
Doŭhi čas praviadzieńnie forumu trymałasia kali nie ŭ sakrecie, to asabliva nie afišavałasia. Ihar Barysaŭ kaža, što faktyčna heta pieršaje bujnoje palityčnaje mierapryjemstva paśla vybaraŭ, tamu nie chaciełasia pryciahvać asablivaj uvahi, tym bolš što pamiaškańnie dla forumu vielmi doŭha ŭzhadniałasia.