Kadr ź filma «Ma Rejni: maci bluza»
Paśla pačatku pandemii i zakryćcia kinateatraŭ va ŭsim śviecie prahlady sieryjałaŭ i filmaŭ ad Netflix imkliva pajšli ŭvierch, a prapanovy Netflix ad «Ma Rejni: maci bluza» da «Suda nad čykahskaj siamiorkaj» byli vielmi paśpiachovymi kamiercyjna, a taksama atrymali stanoŭčuju acenku ad kinakrytykaŭ, piša DW.
Aktorki Vioła Devis i Andra Dej abiedźvie byli naminavanyja za vykanańnie rolaŭ śpiavačak. Devis vykanała hałoŭnuju rolu ŭ bijahrafičnaj dramie Netflix «Ma Rejni: maci bluza» pra ŭpłyvovuju bluzavuju śpiavačku, a Dej naminavali za hałoŭnuju rolu ŭ filmie «Złučanyja Štaty suprać Bili Cholidej», jaki raspaviadaje pra baraćbu džazavaj śpiavački z narkatyčnaj zaležnaściu. Premjera filma adbudziecca 25 lutaha.
Za ŭsiu historyju hetaj premii jaje atrymlivali tolki 5 režysiorak-žančyn. A voś sioleta ź piaci naminantaŭ za najlepšuju režysuru try žančyny. Siarod ich Chłoja Čžaa za film «Ziamla vandroŭnikaŭ», Redžyna Kinh za «Adnu noč u Majami» i Emirald Fieneł za film «Dziaŭčyna padaje nadziei».
Naminacyju za najlepšuju žanočuju rolu atrymała Frensis Makdormend, dvuchrazovaja ŭładalnica «Oskara». U filmie «Ziamla vandroŭnikaŭ» jana hraje biespracoŭnuju, jakaja vybiraje vandroŭny ład žyćcia i pačynaje padarožničać u furhonie pa Amierycy.
U čaćviortym siezonie sieryjała Netflix «Karona» dadalisia dva kultavyja piersanažy: pryncesa Dyjana, rolu jakoj vykanała Ema Koryn, i Marharet Tetčer u vykanańni Džylijan Andersan. Koryn i Alivija Kołman, jakaja hraje karalevu Jelizavietu, naminavanyja ŭ katehoryi «Najlepšaja žanočaja rola», a Andersan naminavali za rolu druhoha płanu.
Saša Baron Koen i jaho film «Borat-2» atrymali naminacyi adpaviedna za najlepšuju mužčynskuju rolu i najlepšuju kamiedyju. Koena taksama naminavali na najlepšuju mužčynskuju rolu druhoha płanu ŭ filmie «Sud nad čykahskaj siamiorkaj».
Čedvik Boŭzman byŭ paśmiarotna naminavany za svaju rolu ambicyjnaha trubača ŭ filmie «Ma Rejni: maci bluza». Čedvik Boŭzman pamior u žniŭni 2020 hoda paśla trochhadovaj baraćby z rakam.
