Fota z tvitara Žazepa Barela.
Žazep Barel adpraviŭsia ŭ Maskvu ŭ toj samy čas, kali ŭ Jeŭraźviazie abmiarkoŭvajuć novyja sankcyi suprać rasijskich najvyšejšych čynoŭnikaŭ i mahnataŭ jak adkaz na pieraśled Alaksieja Navalnaha i padaŭleńnie mirnych akcyj pratestu.
Sam kiraŭnik Słužby zamiežnych dziejańniaŭ Jeŭraźviazu tłumačyć, što pajechaŭ u Rasiju, bo, z adnaho boku, upeŭnieny, što kantakty ź joj treba padtrymlivać, niahledziačy na roznahałośsi, a z druhoha — paličyŭ nieabchodnym sabrać infarmacyju pierad samitam ES u kancy sakavika, na jakim budzie abmiarkoŭvacca palityka ŭ dačynieńni da Rasii.
Ale, na dumku krytykaŭ Barela, toje, jak jon vystupiŭ u Maskvie i što kazaŭ, dazvalaje nazvać jahony vizit katastrafičnym pravałam.
«Jon pryznaŭ, što ES nie zrabiŭ nijakich krokaŭ u bok pryniaćcia novych sankcyj u dačynieńni da Rasii ŭ suviazi sa spravaj Navalnaha. Zatym Barel, były ministr zamiežnych spraŭ Ispanii, stajaŭ i maŭčaŭ z uśmieškaj na tvary, kali [kiraŭnik MZS Rasii Siarhiej] Łaŭroŭ u zaklučnym słovie abłajaŭ ES, nazvaŭšy jaho «nienadziejnym partnioram», — piša jeŭrapiejskaja viersija mižnarodnaha vydańni Politico.
«Barel skazaŭ, što jon pieradaŭ niezadavolenaść ES aryštam Navalnaha, — praciahvaje Politico, — ale jahonyja słovy apynulisia ŭ cieni naporystaha adkazu Łaŭrova, jaki znoŭ zajaviŭ ab sumnievach u vysnovach Zachadu ab atručvańni Navalnaha bajavym niervova-paralityčnym rečyvam — vysnovach, jakija kanclerka Niamieččyny Anhieła Mierkiel asabista abviaściła ŭ Bierlinie, dzie lačyli Navalnaha. Łabaratoryi ŭ Francyi i Šviecyi, jak i arhanizacyja pa zabaronie chimičnaj zbroi, paćvierdzili vysnovy niemcaŭ».
Ad imia najbujniejšaj frakcyi ŭ Jeŭraparłamiencie, frakcyi Jeŭrapiejskaj narodnaj partyi, vizit Barela žorstka raskrytykavała jaje vice-staršynia, były ministr zamiežnych spraŭ Łatvii Sandra Kałnijete.
«Vystupać na sumiesnaj pres-kanfierencyi z rasijskim ministram zamiežnych spraŭ Siarhiejem Łaŭrovym u toj čas, kali viadučy apazicyjny palityk Alaksiej Navalny znoŭ pad sudom pa palityčna matyvavanych abvinavačvańniach, nie dapamahaje jaho spravie. Heta — aplavucha ŭsim, chto abaraniaje demakratyju», — zajaviła Kałnijete.
«Vizit […] mieŭ by sens tolki ŭ tym vypadku, kali b jon naviedaŭ Alaksieja Navalnaha i pravioŭ hruntoŭnuju hutarku z tymi, chto staić za demakratyju. U realnaści Barel navat nie pasprabavaŭ sustrecca z Navalnym. I navat nie pasprabavaŭ nahadać pra Krym. My čakali ad Viarchoŭnaha pradstaŭnika JEZ u zamiežnych spravach, što jon budzie abaraniać jeŭrapiejskija kaštoŭnaści, a nie stanie instrumientam kramloŭskaj prapahandy», — aburanaja Kałnijete, jakaja adkazvaje ŭ frakcyi JENP za zamiežnapalityčny paradak dnia.
Palitołah i śpiecyjalist pa Rasii i Uschodniaj Jeŭropie Mark Haleoci ŭ artykule ŭ brytanskim časopisie Spectator nahadvaje, što mnohija zaklikali Barela admianić vizit. Barel, z punktu hledžańnia Haleoci, daremna nie pasłuchaŭsia.
«Heta byŭ majstar-kłas ŭsiaho najhoršaha ŭ dypłamatyi Jeŭrasajuza. Sprečny vizit Barela ŭ Maskvu staŭ tryumfam. Praŭda, na žal, tryumfam dla ruskich», — piša Haleoci.
Haleoci, jak i mnohija inšyja kamientatary, adznačaje, što Barel nie pasprabavaŭ sustrecca ni z Navalnym, ni choć by ź jaho paplečnikami, što paradavaŭ rasijcaŭ zajavami ab adsutnaści (pakul) kankretnych płanaŭ nakont novych sankcyj, ale ŭ adkaz pačuŭ ad Łaŭrova abvinavačvańni ŭ «nienadziejnaści», i što ŭ dadatak Rasija ŭ dzień vizitu abviaściła ab vysyłcy dypłamataŭ troch krain ES, abvinavaciŭšy ich va ŭdziele ŭ akcyjach pratestu.
«Kreml choča dakazać, što jaho nie zapałochać i što jon nie budzie z-za sancyj mianiać svaju palityku. Uličvajučy, što rasijcy, zdajecca, aścierahajucca leźci ŭ bojku z administracyjaj Bajdena, mahčyma, jany adčuli, što možna biespakarana pakuražycca nad Barelem i ES. Pahladzim, ci jany majuć racyju», — piša Mark Haleoci.
Pieršaja mahčymaść «pahladzieć» budzie 22 lutaha na čarhovaj naradzie ministraŭ zamiežnych spraŭ Jeŭrasajuza.
Kiraŭnik ruskaj redakcyi «Niamieckaj chvali» Kryścijan Trype miarkuje, što vyniki vizitu Barela abaviazkova paŭpłyvajuć i na dyskusiju kiraŭnikoŭ MZS krain Jeŭrasajuza, i na rašeńni samitu ŭ kancy sakavika.
«Ruku, jakuju Barel hetak vidavočna praciahnuŭ Maskvie, taja hetak ža demanstratyŭna adšturchnuła. Urady niekatorych krain JEZ spačatku prajavili nierašučaść, kali razhladałasia pytańnie ab uviadzieńni novych sankcyj suprać Rasii ŭ suviazi ź niespraviadlivym sudovym prysudam Navalnamu. Ciapier, kali Barel viartajecca z Maskvy abražany i z pustymi rukami, dalejšyja sankcyi niepaźbiežnyja», — piša Trype.
Kiraŭnik kamiteta pa zamiežnaj palitycy parłamienta Estonii Marka Michkielson ličyć, što ŭsia atmaśfiera ŭ adnosinach ES i Rasii z ulikam sudoŭ nad Navalnym i inšych padziej ciapier vielmi niaŭdałaja dla vizitu ŭ Maskvu.
«Pajechać u Maskvu i słuchać tam lekcyju Łaŭrova pra toje, jaki Jeŭraźviaz niekanstruktyŭny i nienadziejny partnior, i jak u Jeŭraźviazie abychodziacca z demanstrantami jašče bolš žorstka, čym u Rasii, i jak Rasija abaraniaje mižnarodnaje prava — heta ŭsio byli vielmi ahresiŭnyja zajavy. Ja b navat skazaŭ, niavartyja z boku Łaŭrova ŭ dačynieńni da Barela, jaki ŭsio ž prylacieŭ u Maskvu šukać choć niejkija mahčymaści dyjałohu», — cytuje Michkielsona estonskaja teleradyjokampanija ERR.
Brytanskaja hazieta Telegraph nazvała vizit Barela «źnievažalnym» i pracytavała byłoha vysokapastaŭlenaha čynoŭnika administracyi ZŠA, jaki pažadaŭ zastacca nienazvanym (pry prezidencie Baraku Abamu), jaki skazaŭ, što Barelu nie varta było jechać u Maskvu, nie zabiaśpiečyŭšy zahadzia choć jaki-niebudź adčuvalny vynik vizitu.
«Nie vielmi dobraje vystupleńnie Barela. Jon akazaŭsia niepadrychtavanym. Łaŭroŭ hulaŭ pa svaich praviłach i atrymaŭ usio, što chacieŭ», — skazaŭ haziecie jeŭrapiejski dypłamat, jaki taksama pažadaŭ zastacca nienazvanym.
A adzin z bujnych i rašučych brytanskich jeŭraskieptykaŭ, były lidar Kansiervatyŭnaj partyi Ien Dankan Śmit vykazaŭsia koratka i biez dypłamatyčnych abarotaŭ.
«Heta prykład taho, jak ES całuje Rasiju z tylnaha boku», — zajaviŭ brekziter.
