Vadzim Dzienisienka
Pieršym na druhi dzień sudu dapytali kamandzira źviana bieraściejskaha AMAPu Antona Prakurata. Jon u zalu sudu asabista nie źjaviŭsia, dopyt pravodziŭsia pa aŭdyjosuviazi.
Prakurat raskazaŭ, što ŭdzień 11 žniŭnia 2020 hodu atrymaŭ u svajo rasparadžeńnie vajskoŭcaŭ Haŭryłava i Halicyna. Ich nakiravali ŭ horad, dzie jany spačatku nazirali za padziejami ŭ rajonie vulicy Savieckaj, a potym nakiravalisia na vulicu Maskoŭskuju. Pa Bieraści pieraapranutyja vajskoŭcy i amapaŭcy pieramiaščalisia na tralejbusach.
Pa słovach Prakurata, usie bajcy AMAPu i vajskoŭcy ŭ toj dzień byli ŭzbrojenyja ahniastrelnaj zbrojaj, nazirańnie za padziejami viali ŭ cyvilnaj vopratcy. Pry hetym Haŭryłaŭ i Halicyn atrymali zahad źmiašacca z natoŭpam, jany išli ŭ natoŭpie i plaskali ŭ ładki.
Pozna ŭviečary 11 žniŭnia Prakurat atrymaŭ ad Haŭryłava i Halicyna zvanok na mabilny telefon, jany raskazali jamu ab prymianieńni ahniastrelnaj zbroi. Paśla hetaha kamandzir AMAP sam pryjechaŭ na miesca. Tam jon pabačyŭ paranienaha i «chutkuju».
Na sudzie taksama vyśvietliłasia, što kamandzir AMAPu asabista viedaŭ abvinavačanych Kardziukova i Šutava.
«My dalokija znajomyja z Šutavym i Kardziukovym, — paviedamiŭ na dopycie ŭ sudzie Prakurat (hetyja słovy vyklikali reakcyju ŭ zali siarod blizkich abvinavačanych: jany śćviardžajuć, što kamandzir AMAPu i Hienadź Šutaŭ byli vielmi blizka znajomyja i nieadnarazova adpačyvali razam). — Apošni raz ja bačyŭ Hienadzia Šutava ŭ parku voinaŭ-internacyjanalistaŭ, kali ŭ Bieraście pryjaždžała Śviatłana Cichanoŭskaja. Jon byŭ zahornuty ŭ bieła-čyrvony-bieły ściah. Padyšoŭ da mianie pahavaryć».
Chto addaŭ zahad vykarystać uzbrojenych vajskoŭcaŭ padčas pratestaŭ
Zahad vykarystać uzbrojenych vajskoŭcaŭ padčas pratestaŭ addaŭ kamandujučy vojskami Siłaŭ specyjalnych aperacyj Biełarusi hienerał-major Vadzim Dzienisienka. Pra heta stała viadoma z pakazańniaŭ śviedki Łabkoviča, majora častki № 89417 i niepasrednaha kiraŭnika Halicyna i Haŭryłava. Łabkovič na sud taksama nie źjaviŭsia, bo zachvareŭ. Jaho pakazańni začytvali pavodle materyjałaŭ spravy.
Z pakazańniaŭ vynikaje, što ŭ Bieraści 11 žniŭnia ŭ padparadkavańni kamandziraŭ AMAPu było kala 20 vajskovych specnazaŭcaŭ. Jany byli padzielenyja na hrupy pa 5-6 čałaviek i dziejničali ŭ horadzie ŭ cyvilnym. Usie byli z ahniastrelnaj zbrojaj, pieramovy pamiž imi i kamandzirami ažyćciaŭlalisia praz mabilnyja telefony, srodki specsuviazi vykarystoŭvać było zabaroniena.
Łabkovič asabista zabiraŭ pistalety Makarava ŭ Haŭryłava i Halicyna paśla incydentu z Kardziukovym i Šutavym.
Raman Haŭryłaŭ (źleva) i Arsień Halicyn na sudzie 16 lutaha. Fota: Biełsat
Pavodle jaho pakazańniaŭ, u abojmach adsutničała pa dva patrony. Pavodle pakazańniaŭ Łabkoviča, vajskovyja specnazaŭcy znachodzilisia ŭ Bieraści z červienia 2020 hodu. Jany ŭdzielničali ŭ vajskovych hulniach.
Hienerał-majora Dzienisienku taksama musili dapytać na sudzie ŭ jakaści śviedki, adnak u sud jon nie pryjechaŭ z pryčyny chvaroby. Sudździa paviedamiła, što na balničnym jon znachodzicca z 6 pa 20 lutaha.
U sudzie začytali jaho pakazańni, dadzienyja śledztvu 19 žniŭnia 2020.
«Mahu patłumačyć, što niepasredna padparadkoŭvajusia pa rodzie słužby ministru abarony Respubliki Biełaruś, zahady jakoha dla mianie źjaŭlajucca abaviazkovymi dla vykanańnia, — raskazvaŭ hienerał-major Vadzim Dzienisienka. — Sapraŭdy paćviardžaju, što mienavita mnoj u toj dzień (11 žniŭnia 2020. — RS) była pastaŭlena zadača namieśniku kamandzira atrada Łabkoviču, kab jon razam ź inšymi vajskoŭcami dadzienaj častki pastupiŭ u rasparadžeńnie kamandzira AMAP UUS Bresckaha abłvykankama dla niasieńnia słužby pa achovie hramadzkaha paradku, — havorycca ŭ pakazańniach Dzienisienka. Takoje rašeńnie było pryniata ŭ suviazi z «abvastreńniem sytuacyi… Rašeńnie ab uzbrajeńni abumoŭlena tym, što niemahčyma było praličyć varyjanty raźvićcia padziej na toj momant času».
«Nia bačyŭ, kab abvinavačany biŭ metaličnaj truboj paciarpiełaha»
U druhi dzień pracesu taksama dapytali śviedku Ŭładzimiera Lesika. Heta indyvidualny pradprymalnik, jaki ŭviečary 11 žniŭnia byŭ pobač ź miescam zabojstva Hienadzia Šutava. Jon raskazaŭ, što bačyŭ kanflikt pamiž vajskoŭcami i Kardziukovym i Šutavym uskosna. Spačatku navat padumaŭ, što heta kampanija znajomych.
«Ja byŭ kala hetaha doma, prachodziŭ la parapeta, — raskazaŭ Lesik. — Było ci to 22 hadziny, ci to 23. Ja prajšoŭ la dvuch čałaviek, jakija siadzieli na łavie, pajšoŭ dalej, tam spyniŭsia. Zaŭvažyŭ, jak da tych dvaich padyšli jašče dvoje. Zatym adzin ź ich upaŭ. Ja adviarnuŭsia i pabačyŭ, što toj, chto ŭpaŭ, padymajecca, i ŭ jahonaj ruce pradmiet z metaličnym blaskam. Ja nia bačyŭ, kab jon nanosiŭ im niejkija ŭdary. Zatym pačulisia streły, adzin ź ludziej la łavački pačaŭ uciakać. Toj, chto hnaŭsia za im, stralaŭ uśled».
Pa słovach śviedki, jon nia moža pryhadać, kab čuŭ kryki «Stoj, stralać budu!». Čuŭ tolki łajanku z boku ŭzbrojenych ludziej. Jaho słovy paćvierdzili prademanstravanyja ŭ sudzie videazapisy, zroblenyja inšym vidavočcam. Na ich čuvać kryki «Lažać! Mordaj u doł, urod!» Paciarpieły specnazaviec Halicyn pryznaŭ, što heta kryčyć jon.
Na pracesie pačałosia vyvučeńnie materyjałaŭ spravy. Prakuror i paciarpiełyja vajskoŭcy padali chadajnictva ab vyvučeńni ich u zakrytym režymie. Sudździa chadajnictva zadavoliła častkova. Zakrytym budzie tolki taja častka pracesu, dzie buduć vyvučać «sakretny» tom materyjałaŭ spravy. Što ŭ im znachodzicca, nieviadoma.
«Chacieŭ strelić u pieradplečča». Vajskoviec, jaki 11 žniŭnia zabiŭ Hienadzia Šutava, daŭ pakazańni
«Pastupajuć pahrozy na mabilny numar». Vajskoŭcy sa «spravy Šutava» ŭ Breście patrabujuć zakryć praces
