Hetaje abjadnańnie ŭtvaryli byłyja supracoŭniki roznych siłavych viedamstvaŭ, jakija syšli z pracy paśla žnivieńskich padziej. «Naša Niva» pasprabavała razabracca, što ciapier robicca ŭnutry hetaj supołki.
Sustreča Śviatłany Cichanoŭskaj u Varšavie z byłymi siłavikami, jakija zasnavali BYPOL. Druhi źleva — Andrej Astapovič.
«Bajpoł» byŭ zasnavany naprykancy kastryčnika 2020 hoda, kali lidar apazicyi Śviatłana Cichanoŭskaja ŭ Varšavie sustrełasia z byłymi siłavikami. Utvareńnie prasłaviłasia vydatnymi rasśledavańniami, jak było sa śmierciu Ramana Bandarenki, a taksama mnohimi źlitymi telefonnymi razmovami vysokich čynoŭnikaŭ i ekskluziŭnymi videa.
Uvieś hety čas miedyjnym tvaram kampanii byŭ 27-hadovy eks-śledčy Andrej Astapovič, jaki mieŭ piacihadovy dośvied pracy ŭ SK. Kali pačalisia vybary, to Astapovič spačatku ŭdzielničaŭ u akcyjach pratestu, a paśla napisaŭ rapart ab zvalnieńni z orhanaŭ.
U niadaŭnim intervju «Mieduzie» Astapovič raskazvaŭ, jak vyjechaŭ u Rasiju ŭ spadziavańni adtul adpravicca ŭ Łatviju. Adnak u Pskovie jaho zatrymali rasijskija siłaviki i ź miaškom na hałavie advieźli da miažy ź Biełaruśsiu, dzie vypuścili. Astapovič zapeŭnivaje, što paśla hetaha na praciahu dvuch tydniach chavaŭsia ŭ lasach, a miažu z adnoj z krain ES pierasiakaŭ, pierapłyvajučy raku.
Andrej Astapovič. Fota «Nastojaŝieje vriemia».
Aproč svajoj pracy ŭ «Bajpole», Astapovič zajmaŭ pasadu ŭ NAU Paŭła Łatuški, adkazvaŭ za supracoŭnictva hetych utvareńniaŭ. Adnak niekalki dzion tamu imia Astapoviča źnikła sa śpisu pradstaŭnikoŭ NAU. Heta i stała nahodaj pacikavicca, što za hetym staić.
Atrymać aficyjnyja kamientary choć ad adnaho z bakoŭ nie atrymałasia. Kožny abiacaŭ patłumačyć situacyju na praciahu paniadziełka, ale na stan 12:00 aŭtorka nichto tak i nie pažadaŭ vykazacca. Zdavałasia b, NAU, «Bajpoł» i sam Andrej Astapovič vystupajuć za pryncypy prazrystaści i hałosnaści, adnak u kryzisnych situacyjach pavodziać siabie padobna da łukašenkaŭskich biurakrataŭ. I heta, viadoma, zasmučaje.
«Naša Niva» ź niekalkich krynic usio ž zmahła vyśvietlić padrabiaznaści. Akazvajecca, prykładna tydzień tamu Andrej Astapovič byŭ vyklučany z šerahaŭ «Bajpoła». Paśla hetaha kiraŭnictva «Bajpoła» zapatrabavała vydaleńnia byłoha śledčaha z sajta NAU. Maŭlaŭ, jon užo nikoha nie pradstaŭlaje.
«My nie źjaŭlajemsia častkaj niejkaj palityčnaj siły. I znachodžańnie na sajcie NAU našaha pradstaŭnika ŭvodziła ludziej u zman, bo my nie źjaŭlalisia častkaj NAU», — ścisła adkazali «Našaj Nivie» ŭ «Bajpole». Pytańni ab vyklučeńni Astapoviča z šerahaŭ arhanizacyi byli pakinutyja biez adkazu.
Nakolki viadoma «NN», supiarečnaści miž Astapovičam i «Bajpołam» adbylisia na hlebie dalejšaj budučyni abjadnańnia. Nie tak daŭno Śviatłana Cichanoŭskaja abviaściła ab stvareńni Situacyjna-analityčnaha centra na bazie «Bajpoła». U zadačach hetaha centra budzie stratehičnaje płanavańnie i raspracoŭka taktyčnych dziejańniaŭ pa ŭznaŭleńni ŭ Biełarusi zakonnaści i pravaparadku, zbor i analiz apieratyŭna-značnaj infarmacyi, u tym liku ab pratesnaj aktyŭnaści; kaardynacyja dziejańniaŭ aktyŭnych hrup.
«My nie stvarajem novuju arhanizacyju, a chočam abjadnać usich nas u adzinuju zhurtavanuju kamandu, praca ŭ jakoj budzie budavacca na asnovie najaŭnaha ŭ siabraŭ «Bajpoła» prafiesijnaha dośviedu i śpiecyjalnych viedaŭ. Naša zadača — pravieści svajho rodu pierakličku našych šerahaŭ, strukturavać ahulnyja namahańni i pavysić efiektyŭnaść našych dziejańniaŭ pa viartańni ŭłady ŭ Biełarusi jaje narodu», — havorycca ŭ aficyjnaj zajavie «Bajpoła».
Nibyta mienavita Astapovič byŭ suprać taho, kab «Bajpoł» pieratvaraŭsia ŭ palityčnuju arhanizacyju i dałučaŭsia ŭ pracy da štaba Cichanoŭskaj. Heta i stała pryčynaj kanfliktu.
Što tyčycca supracy z NAU, to Astapovič jaje praciahnie. U bližejšyja dni budzie abvieščana ab jaho novym prajekcie. Chutčej za ŭsio, heta budzie novaje ŭtvareńnie siłavikoŭ, jakija pakinuli pracu i źjechali z krainy paśla vybaraŭ.
Paźniej «Bajpoł» u svaim telehram-kanale adreahavaŭ na publikacyju.
— raskołu ŭ «Bajpoł» nie było i niama, inicyjatyva pracuje ŭ štatnym režymie;
— udzielniki «Bajpoł» źviazany piśmovymi dahavornymi abaviazacielstvami ab nievydavańni danych, što vyklučaje mahčymaść jakich-niebudź kamientaroŭ adnosna ŭnutranaha ŭstrojstva inicyjatyvy;
— hetymi ž dahavornymi abaviazacielstvami členam inicyjatyvy zabaroniena być udzielnikami jakich-niebudź prajektaŭ, prama ci ŭskosna dublujučych dziejnaść «Bajpoł», u tym liku ŭ vypadku vychadu z šerahaŭ Bajpoł».
Arhanizacyja zajaŭlaje, što metaj ukidu źjaŭlajecca raźjadnańnie i demaralizacyja biełarusaŭ i zaklikaje nie paddavajca na pravakacyi.
