Voś, što pišuć arhanizatary ŭ zvarocie da tych, chto płanavaŭ naviedać fiestyval:
«Nam vielmi-vielmi ciažka kazać pra heta. Choć, zdajecca, čas užo zvyknuć, što zaŭtra moža adbycca ŭsio, što zaŭhodna. My vymušanyja pieranieści fest na dva tydni.
Z paniadziełka pa peŭnych niezaležnych ad nas pryčynach uładalnik placoŭki abmiežavaŭ nam dostup da pamiaškańnia. Niahledziačy na heta, my praciahvali padrychtoŭku da fiestyvalu i paralelna vyrašali pytańnie z dostupam. Da piatnicy my byli ŭžo całkam hatovyja sustrakać haściej, ale dźviery ŭ MAF nam tak i nie adčynili.
I navat u takich umovach žorstkaha cisku my znajšli rašeńnie našaha kanfliktu ŭ pravavym poli. Nam treba dva tydni na pieranos fiestyvalu. Tak vyhladaje kašmar luboha arhanizatara.
Moving Art Festival — prajekt, jakomu my pryśviacili šmat miesiacaŭ. Usia naša kamanda rupliva źbirała jaho pa kavałačkach štodzień z ranicy i da samaj nočy. I my nie možam prosta tak jaho kinuć».
Arhanizatary spadziajucca, što fiestyval udasca pravieści 20, 27 sakavika, 3, 9 krasavika. Jany prosiać nie zdavać kvitki, ale nahadvajuć, što takaja mahčymaść jość i zastaniecca.
Što zapłanavana ŭ miežach Moving Art Festival?
- Karcinnaja i fotahalereja sučasnych biełaruskich mastakoŭ
- Art-instalacyi
- Kinapakazy
- Teatr
- Tancavalnyja i tvorčyja majstar-kłasy
- Lekcyi i sustrečy ź viadomymi dziejačami mastactva
- Muzyčnyja vystupy
- Načnyja dj-sety