Fota Nadziei Bužan
Rytejlery paćviardžajuć: kvietki sapraŭdy padaraželi na 20-30%. Sprava ŭ kursie valut, jaki ŭtvaryŭsia padčas pandemii, deficycie zamiežnaj pradukcyi i zatrymkach fur na miažy ź Biełaruśsiu ŭ pieryjad pikavaha popytu. Pra apošniuju prablemu kryčać biełaruskija kvietkavody (dakładniej, kvietkavozy), ale kateharyčna admaŭlaje rasijskaja mytnia.
U kancy lutaha imparciory paskardzilisia, što rasijskaja mytnia na doŭhi čas zatrymlivaje fury z kvietkami na miažy ź Biełaruśsiu, što ŭ vypadku z praduktam, jaki chutka psujecca, pryvodzić da strat i moža vyklikać deficyt.
Fiederalnaja mytnaja słužba nie pryznała zatrymak pry afarmleńni kvietak i zajaviła ab rekordnych abjomach partyj, jakija pastupajuć.
«Infarmacyja ab zatrymkach, jakija nibyta majuć miesca ŭ mytnym afarmleńni kvietkavaj pradukcyi, i, jak śledstva, mahčymym deficycie kvietak, jakaja raspaŭsiudžvajecca šeraham ŚMI, nie adpaviadaje rečaisnaści, — skazana ŭ apublikavanym 21 lutaha paviedamleńni FMS Rasii. — Dobrasumlennyja imparciory kvietkavaj pradukcyi ciažkaściaŭ na rasijskim rynku ŭ ciapierašni momant nie adčuvajuć. Niepravieranaja infarmacyja ŭ šerahu ŚMI mahła być inicyjavanaja napiaredadni śviata 8 Sakavika intarasantami «šerych schiem» pa ŭvozie kvietak».
Rasijskaja mytnia paličyła, što z 15 lutaha da 3 sakavika na miažy aformili blizu 9,15 tysiačy ton zrezanych kvietak i butonaŭ, što ŭdvaja bolš, čym za toj ža pieryjad 2020 hoda, i ŭ 1,7 raza bolš, čym u 2019 hodzie.
Za toj ža čas praz punkt propusku «Burački» ŭ Pskoŭskaj vobłaści prajšło ŭ try razy bolš mašyn z kvietkami, čym hodam raniej. Ź ich na miescy zadekłaravali tolki małuju častku, astatniaja pradukcyja nakiravałasia ŭ bok Maskvy.
Adnak uładalniki kvietkavych kram apisvajuć karcinu zusim inakš. Jak raspaviała hienieralny dyrektar kampanii «Maory rus» Hanna Mielničuk, zatrymlivać hruzy dla praciahłaha nadhladu pačali jašče pierad 14 lutaha, u samy siezon. Tak, u jaje kampanii na miažy zachraśli 11 fur, ź jakich na momant razmovy z «Fantankaj» vypuścili ŭsiaho adnu, i toje praz dva tydni.
«Kvietki ŭ hetaj mašynie nieprydatnyja dla realizacyi. Našy klijenty admaŭlajucca ad tavaru. Adpaviedna, kvietki ciapier tolki pad utylizacyju», — skazała Mielničuk. Jana śćviardžaje, što pa vynikach nadhladu nijakaha dakumienta pradstaŭniki kampanii nie atrymali, a pryčyny takoj uvahi da ich pradukcyi mytniki nie raskryli. Pahutaryŭšy z partniorami i kankurentami, pradprymalnica zrabiła vysnovu, što heta prablema masavaja. Razam z hruzavikami «Maory rus» jana znajšła śviedčańni ab zatrymcy jašče 60-70 mašyn z kvietkami.
«My da hetaha času nie ŭbačyli svaje kvietki na 14 lutaha. U fury, jakuju my čakali, było pradukcyi na miljon rubloŭ (prykładna $13 450)», — paćvierdziła «Fantancy» ŭładalnica inšaj kampanii «Miljon kvietak» Iryna Nurułajeva. Pavodle jaje słoŭ, na 8 Sakavika joj daviałosia pierakuplać kvietki ŭ tych, kamu ŭsio ž taki ŭdałosia ich pryvieźci.
Pavodle acenki Mielničuk, košt adnoj fury ŭ siarednim składaje 20 tysiač dalaraŭ, plus transpartnyja vydatki — jašče 1 tysiača jeŭra, plus treba zapłacić na miažy 20% PDV. Navat biez uliku padatku atrymlivajecca, što 11 jaje zatrymanych fur z praterminavanym tavaram kaštavali kampanii bolš za 200 tysiač dalaraŭ strat. A zaraz pryjdziecca vydatkavać srodki jašče i na ŭtylizacyju.
Kiraŭnica «Maory rus» ličyć, što na rynku pierad 8 Sakavika moža paŭstać całkam realny deficyt, pakolki zakazčyki albo nie atrymajuć tavar, albo pieraaryjentujucca na bolš darahija anałahi.
«Hałandski ciulpan, jaki my zavozim, kaštuje kala 20 rubloŭ (0.70 BYN). Miascovy rasijski ciulpan tolki ŭ zakupcy kaštuje kala 80 rubloŭ (2.80 BYN). Tyja, chto ciapier sprabuje chutka pieraaryjentavacca, mohuć dzieści jašče znajści kvietki, ale ich ceńnik budzie našmat vyšej», — tłumačyć jana. Kali kvietki projduć praz usie źviony dystrybucyi, jaho razdrobny košt moža vyraści na 30-50%, apisvaje aryfmietyku hetaha biznesu pradprymalnica.
Pavodle acenki apytanych «Fantankaj» rytejleraŭ kvietki na pryłaŭkach u siarednim užo padaraželi na 20-30% u paraŭnańni ź minułym hodam, pryčym niekatoryja pazicyi — na 10%, inšyja — na 50%. Tradycyjny śviatočny rost koštaŭ da 8 Sakavika sioleta nadźmuŭsia da takich maštabaŭ, u tym liku z-za situacyi na miažy ź Biełaruśsiu, jakuju rytejlery nazyvajuć biesprecedentnaj.
«Usio praz toje, što transpart padaražeŭ: na miažy spynili dziasiatki fur z dakumientami i nie vypuskali ich. Aŭtamatyčna spyniłasia adhruzka ŭ Hałandyi. Jany ŭvieś łahistyčny łancužok nachilili. Zatrymak ciapier niama, ale transpart budzie svaje straty kampiensavać», — adznačaje zasnavalnik «Lenćviettorh Nekst» i «Lenćviettorh Vintaž» Andrej Dabralubaŭ.
Siarod inšych pryčyn rostu koštaŭ hulcy rynku adznačajuć pasłableńnie rubla i rost koštaŭ na suśvietnym rynku. U pandemiju vytvorcy istotna skaracili vytvorčaść i nie paśpieli jaje naraścić, tamu, sutyknuŭšysia ź vielizarnym popytam, mocna padniali canu.
