Jan Rudzik ź Minska, jamu 27 hod. Vučyŭsia ŭ Minskim inavacyjnym univiersitecie na psichołaha. Ale pa śpiecyjalnaści nikoli nie pracavaŭ, kaža, pastupiŭ dziela korački. Niejki čas chłopiec pracavaŭ na ANT — na techničnaj pasadzie ŭ prahramie «Naša ranica».
U 2019 hodzie jon pierajechaŭ u Polšču i pajšoŭ pracavać u naviny «Biełsata».
«U peŭny momant ja stamiŭsia ad Minska, i Minsk stamiŭsia ad mianie, i ja vyrašyŭ, što čas źjazdžać. Stamiŭsia i ŭ sacyjalnym, i ŭ palityčnym sensie. Tam davoli sumnavata, mała sacyjalnych liftoŭ, niama asabliva varyjantaŭ dla dalejšaha raźvićcia, asabliva kali ty cikavišsia roznymi žurnalisckimi aśpiektami i nie zusim chočaš supracoŭničać ź dziaržavaj», — raskazvaŭ chłopiec.
Na «Biełsacie» Jan paznajomiŭsia z Puciłam. A da kamandy telehram-kanała dałučyŭsia minułaj viasnoj.
Dziaŭčyna-viadučaja ŭ kadry — Ajłar Tataranka.
Fota ź instahrama
«Ja našu turkmienskaje imia. Vybaram zajmaŭsia tata i maja ciotka, u dasłoŭnym pierakładzie jano značyć «šmat miesiacaŭ». Babula mianie nazyvała Ksiušaj. Ja ŭ školnym uzroście chavała, što mianie zavuć Ajłar, i mianiała na svajo skaročanaje imia — Aja», — raspaviadała pra siabie dziaŭčyna ŭ intervju.
Ajłar 24 hady. Z Puciłam pačała supracoŭničać ź vieraśnia minułaha hoda. Dahetul niekalki hadoŭ jana žyła ŭ Krakavie. Vučyłasia ŭ polskim univiersitecie, padpracoŭvała aficyjantkaj. Zajmajecca muzykaj.