U svaim liście ad 24 lutaha bieraściejskaja aktyvistka Palina Šarenda-Panasiuk piša pra dadatak №1 da zahadu №55 načalnika SIZA №7 Bieraścia, jaki vyjšaŭ u vieraśni minułaha hodu. Palina akcentavała ŭvahu na źmienach u rasparadku dnia. Zhodna z punktam 31.2 źniavolenych vymušajuć zastavacca ŭ siadziačym stanoviščy 16 hadzin (z 6:00 da 22:00). Za sproby prylehčy pahražajuć karcaram.
Palina zaznačyła, što navat u zdarovych praź niekalki dzion źjaŭlajucca prablemy sa straŭnikam, boli chrybietnika, pačynaje skakać cisk. Medyčnuju dapamohu ŭ hetych vypadkach u SIZA ŭ poŭnaj miery nie akazvajuć. Pa słovach Paliny, charčavańnie źniavolenych amal na 100% vuhlavodnaje, što nehatyŭna adbivajecca na stanie zdaroŭja.
Andrej Šarenda kaža, što list z hetym zvarotam mieŭ doŭhi šlach. Ale dziakujučy ahulnym namahańniam nieabyjakavych ludziej jon usio ž taki trapiŭ na volu.
«Atrymałasia, što ad svajho imia Palina pieradała kalektyŭny zvarot usich źniavolenych. Heta vielmi surjozny krok. Treba razumieć, jakija buduć nastupstvy. Jasna, što ciapier u bieraściejskim SIZA jaje buduć vielmi «rady» bačyć. Zrazumieła, što psychalahičny i fizyčny cisk patroicca. Systema, adnaznačna, budzie pomścić», — kaža Andrej Šarenda.
Jon dadaje, što ŭžo pieradaŭ zvarot Paliny dakładčykam AAN. Źviazaŭsia i z pravaabaroncami.
«Nie idzie na supracoŭnictva sa śledztvam»
Bieraściejskaja aktyvistka Palina Šarenda-Panasiuk pad vartaj z 3 studzienia. Joj vystavili abvinavačańnie pavodle artykułu 364 («Hvałt albo pahroza ŭžyvańnia hvałtu ŭ dačynieńni da supracoŭnika orhanaŭ unutranych spraŭ»). 23 lutaha ź bieraściejskaha SIZA aktyvistku nakiravali na medyčnuju ekspertyzu ŭ psychijatryčnuju lakarniu ŭ Navinkach. Tady na praciahu 9-dzionnaha «etapu» žančyna praviała niekalki dzion u baranavickim SIZA №6 i ŭ mienskim SIZA №1.
«Palina nie idzie na pieramovy sa śledztvam, ad słova «zusim». Jana taksama nie dała nijakich pakazańniaŭ. Treba było niečym dapoŭnić jaje spravu. Ciapier z novaha ŭ ich tolki rašeńnie sudova-medyčnaj ekspertyzy, — kaža Andrej. — Tamu Palinu i adpravili jaje prachodzić».
Na pačatku minułaha tydnia bieraściejskuju aktyvistku naviedaŭ advakat. Praź jaho Palina padziakavała ŭsim ludziam, jakija jaje padtrymlivali — adpraŭlali listy i vinšavalnyja paštoŭki z dniom naradžeńnia.
Palina taksama raskazała advakatu ab psychalahičnym cisku i pahrozach, jakija raniej atrymlivała ad supracoŭnikaŭ «Vaładarki».
«Palina kazała, što byŭ niejki zahad — stvarać dla jaje žorstkija ŭmovy. Śćviardžała, što ŭsio moža skončycca karcaram. Tak urešcie i zdaryłasia», — dadaje surazmoŭca.
Andrej kaža, što paśla «Navinak» Palinu pavinny byli advieźci ŭ Bieraście, ale etapavali znoŭ na «Vaładarku». Kali siabry pryvieźli joj pieradaču, daviedalisia, što Palinu z 24 sakavika źmiaścili ŭ karcar na 10 sutak.
«Za što — nia viedaju. Jasna tolki, što ŭsio heta ŭkładvajecca ŭ šerah psychalahičnaha i fizyčnaha cisku dyktatarskaha režymu ŭ jaje bok», — kaža Andrej.
«Pazycyja pravaabaroncaŭ niezrazumiełaja»
Maci dvaich niepaŭnaletnich dziaciej Palinu Šarendu-Panasiuk dahetul nie pryznali palitźniavolennaj. Jaje muž ličyć, što takim čynam Palinie admaŭlajuć u pravie na samaabaronu.
«Vielmi prykra i kryŭdna, što tak adbyvajecca. Na ciapierašni momant z boku miascovaha kiraŭnictva ŭ dačynieńni da Paliny ruki raźviazanyja. Kali ŭ Miensku ŭ pracaŭnikoŭ turemnych ustanovaŭ adnosiny da palitźniavolenych mohuć być roznymi, to ŭ rehijonach niekatoryja hetyja «ludzi systemy» bajacca za svaju budučyniu. Jany viedajuć, što znachodziacca pad pilnym vokam susiedziaŭ. Tamu staviacca da palitviaźniaŭ karektna. Heta ja dakładna mahu skazać», — kaža Andrej Šarenda.
Jon padkreślivaje: kab pryznać Palinu palitviaźniem, pravaabaroncam patrebnyja aficyjnyja dakumenty abvinavačvańnia. I supraciŭ supracoŭnikam pravaachoŭnych orhanaŭ pavinien być niehvałtoŭny.
«Siońnia sprava Paliny całkam zasakrečanaja. Jana admaŭlajecca davać pakazańni. A dakument, jaki nieabchodny pravaabaroncam, my atrymajem tolki tady, kali budzie kančatkovy prysud. Ale da hetaha treba čakać miesiacy, a moža, navat i hod, — padkreślivaje surazmoŭca. — Tamu dla mianie pazycyja pravaabaroncaŭ niezrazumiełaja».