Mužčyna abvinavačvaŭsia adrazu ŭ niekalkich złačynstvach. Pa sukupnaści złačynstvaŭ sud pryhavaryŭ mužčynu da pažyćciovaha źniavoleńnia z adbyvańniem pakarańnia ŭ papraŭčaj kałonii va ŭmovach asobaha režymu.
Heta adbyłosia 25 śniežnia 2019 hoda. 37-hadovy žychar Lidskaha rajona i jaho 49-hadovy siabar paklikali ŭ hości 42-hadovuju žančynu z susiedniaj vioski. U domie abvinavačanaha na chutary kampanija raśpivała śpirtnoje. Haspadar doma nieadnarazova ŭžyvaŭ fizičny hvałt u dačynieńni da viaskoŭki i siabra.
«Abvinavačany uziaŭ u ruki mietaličny šuflik i nanios žančynie ŭdar pa hałavie. Pad pahrozaj zabojstva jon prymušaŭ siabra zadušyć žančynu provadam, kab zrabić taho saŭdzielnikam svaich dziej, ale ŭ vyniku zrabiŭ heta samastojna. Kab schavać ślady złačynstva, abvinavačany raździaliŭ cieła žančyny i niekatoryja častki spaliŭ u samarobnaj piečy, a tułava vykinuŭ u mielijaracyjny kanał, dzie jano paśla i było vyjaŭlena», — raspaviadali padrabiaznaści spravy ŭ SK.
Zaniepakojenyja svajaki i znajomyja žančyny źviarnulisia ŭ milicyju z zajavaj ab jaje źniknieńni. Nieŭzabavie milicyjanieram stała zrazumieła, što źniknieńnie moža nasić kryminalny charaktar. U dalejšym milicyja zatrymała 49-hadovaha ŭdzielnika zastolla, jaki raspavioŭ pra zdareńnie i pakazaŭ miescaznachodžańnie cieła. Pa padazreńni ŭ złačynstvie byŭ zatrymany haspadar doma, jaki pryznaŭsia ŭ zroblenym. Jon nie chavaŭsia, žyŭ jak raniej i navat sam telefanavaŭ učastkovamu z prośbaj uładkavacca na pracu.
Hety mužčyna byŭ sudzimy za zachop zakładnika i zhon aŭtobusa ŭ Kapylskim rajonie ŭ 2003 hodzie. U momant złačynstva pieramovy ź im vioŭ asabista ministr unutranych spraŭ, a zakładnika (kasira) u aŭtobusie zamianiŭ saboj prakuror rajona.
