Złamyśnik uhavaryŭ pažyłuju minčanku pieravieści 236 tysiač rubloŭ u inšy bank, stvaryć kart-rachunak i dać jamu dostup da internet-bankinhu, paviedamlaje «Minsk-Naviny».
Dniom 22 sakavika 67-hadovaj minčancy patelefanavaŭ na Viber nieviadomy, jaki pradstaviŭsia supracoŭnikam banka. Jon paviedamiŭ, što prosta ciapier ź jaje bankaŭskaj kartki ašukancy pieravodziać hrošy na inšy rachunak. Kab spynić kradziež, joj nieabchodna ŭstalavać prahramu dystancyjnaha dostupu. Pažyłaja žančyna adrazu papraviła taho, chto telefanavaŭ, patłumačyŭšy, što ŭ jaje jość bankaŭski rachunak, a nie karta. Na što nibyta pradstaŭnik banka pačaŭ pierakonvać, što zafiksavanyja niesankcyjanavanyja apieracyi i što ŭ chutkim časie ź joj źviažucca supracoŭniki milicyi.
I sapraŭdy, praź niekalki dzion piensijaniercy znoŭ na Viber pačaŭ telefanavać nibyta pradstaŭnik pravaachoŭnych orhanaŭ. Jon paćvierdziŭ słovy čałavieka, jaki raniej telefanavaŭ, i paraiŭ, kab žančyna źniała z rachunku hrošy i zaličyła ich na kart-rachunak inšaha banka.
«Pravaachoŭnik» zmoh pierakanać žančynu, i jana, kirujučysia jaho instrukcyjam, u niekalki etapaŭ źniała z rachunku hrošy i zaličyła na rachunak, jaki joj paraili złamyśniki. Bolš za toje, jana pieradała im danyja dla ŭvachodu ŭ prahramu. Dystancyjny dostup dazvoliŭ ašukancam daviedacca rekvizity bankaŭskaj karty, aŭtaryzavacca ad imia minčanki ŭ asabistym kabiniecie internet-bankinhu i dystancyjna rasparadžacca hrašyma. U vyniku z kart-rachunku piensijanierki vykradziena bolš za 236 tysiač rubloŭ. Akazvajecca, niadaŭna žančyna pradała kvateru i pakłała ŭsiu sumu na rachunak.
