Pa jakim kryminalnym artykule jaje padazrajuć, pakul zastajecca nieviadomym, piša «Svaboda».
Pra toje, što 9 krasavika pravaabaroncu Tacianu Hacuru-Javorskuju pieraviali ŭ SIZA №1 na vulicy Vaładarskaha, «Svabodzie» paviedamiŭ jaje muž Uładzimier.
Zasnavalnicu hramadzkaha abjadnańnia «Źviano» i adnu z arhanizatarak vystavy «Mašyna dychaje, a ja — nie» Tacianu Hacuru-Javorskuju zatrymali 6 krasavika. Napiaredadni supracoŭniki Departamentu finansavych raśśledavańniaŭ praviali pieratrusy ŭ ofisie arhanizacyi, a taksama ŭ kvatery i na leciščy Taciany.
Śledčyja dziejańni pravodzilisia ŭ miežach spravy pa artykule 293 Kryminalnaha kodeksu — finansavańnie abo materyjalnaje zabieśpiačeńnie biesparadkaŭ. Za dzień da zatrymańnia Taciany Hacury-Javorskaj siłaviki praviali pieratrusy jašče ŭ dźviuch arhanizatarak vystavy «Mašyna dychaje, a ja — nie» — Natalli Treninaj i Julii Siamienčanki.
8 krasavika ŭsich zatrymanych aktyvistak «Źviana» (ahułam było zatrymana piać čałaviek. — RS) sudzili pa administratyŭnych artykułach za niepadparadkavańnie supracoŭnikam milicyi.
Taciana Hacura-Javorskaja atrymała štraf pamieram 50 bazavych vieličyń, adnak na volu tak i nia vyjšła. Pozna ŭviečary supracoŭniki IČU na zavułku Akreścina paviedamili, što jana prachodzić pa kryminalnaj spravie. Status Taciany Hacury-Javorskaj zastajecca nieviadomym.
Taciana Hacura-Javorskaja — maci čatyroch dziaciej. Jana arhanizatarka vialikaj kolkaści kulturnych inicyjatyvaŭ, u tym liku WATCH DOCS Belarus — mižnarodnaha festyvalu dakumentalnaha kino ab pravach čałavieka, jaki pravodzicca z 2015 hodu.
Zasnavanaje joju abjadnańnie «Źviano» vystupiła inicyjataram vystavy «Mašyna dychaje, a ja — nie», pryśviečanaj addanaj pracy medykaŭ, jakija zmahajucca z karanavirusam.
