Volha Załatar. Fota ź siamiejnaha archiva
Pra svaje abvinavačvańni: Artykuł nie maje vialikaha značeńnia, bo heta ŭsio — pustoje
Volha ŭ listach padćvierdžaje, što jaje abvinavačvajuć pa artykule 361-1 Kryminalnaha kodeksa — stvareńnie ekstremisckaha farmiravańnia, jaki praduhledžvaje pakarańnie da siami hod pazbaŭleńnia voli. Sama Volha kamientuje heta radkami ź pieśni «Krasnaj zieleni»:
«Kali ty čuła pieśniu Marharyty Laŭčuk «…Nas nie čapajcie. A tolki… Matolku». Tak heta moj vypadak! [Vierahodna, hutarka idzie pra radok ź pieśni #PamahiMatolka: «Darahija SK, dzieł našyli vy stolki, no nie dziełajcie nas ekstremistami tolki»].
Ja tolki škaduju, što na voli nie brała ŭroki vakała. Dziaŭčynkam piesieńki ŭ maim vykanańni nie padabajucca, bo śpiavaju ja mima not. Pry hetym adnosiny ŭ kamiery ŭ nas dobryja, padtrymlivajem adna adnu, dzielimsia tym, što majem».
«Mnie inkryminujuć art. 361-1, a nie 361 Kryminalnaha kodeksa. U lubym vypadku artykuł nie maje vialikaha značeńnia, bo heta ŭsio — pustoje. Akt zastrašeńnia. Papiera ŭsio ścierpić. Napisać možna luby artykuł. U lubym vypadku ja zaraz u źniavoleńni, pravilniej kazać, pad vartaj padčas śledstva. Moj advakat nie abnadziejvaje mianie, kažučy, što, čym mieniej dokazaŭ viny, tym daŭžej viadziecca śledstva. Tym nie mienš, ja praciahvaju maryć, što budu doma na 5-hodździe syna».
Pra pobyt: Lubyja pobytavyja niazručnaści lahčej pieražyć, kali kampanija dobraja
«Ja navat nie mahu ŭjavić, jak moj muž pieražyŭ usiu hetu historyju [paśla zatrymańnia Volhi i pieratrusu doma jaje muža Siarhieja aryštavali pa art. 24.23 KaAP na 10 sutak nibyta za vyviešany ściah na aknie]. Ja pryhadała, što było šmat asudžanych u NB [Novaj Baravoj], a tamu ŭ jaho pavinna była być dobraja kampanija na IČU. Pa svajmu dośviedu viedaju, što lubyja pobytavyja niazručnaści lahčej pieražyć, kali kampanija dobraja.
Jak ni dziŭna, dni tut pralatajuć chutka. My šmat razmaŭlajem ź dziaŭčatami, pišam listy, čytajem knihi ź biblijateki, vyvučajem kryminalny kodeks i kryminalna-pracesualny kodeks. Z krasavika mnie pačała prychodzić hazieta «Novy Čas». I ŭ pieršym ž numary była zamietka pra mianie».
Pra susiedak: U kamiery jość ciažarnaja
«U mianie ŭ kamiery jość ciažarnaja dziaŭčyna. I jašče 19-hadovaja dziaŭčynka Kasia. Dla mianie heta cudoŭnaja kampanija, bo jość ab kim kłapacicca».
Pra spravu suprać Hierasimieni: Usie hetyja kryminalnyja spravy horš za ŭsio padryvajuć imidž krainy
«Tut zusim mała infarmacyi. Čytajem haziety. Mianie šakavała navina, što na Hierasimieniu ŭzbudzili kryminalnuju spravu za padryvańnie imidžu krainy. Ja dziŭlusia, niaŭžo tolki mnie vidavočna, što ŭsie hetyja kryminalnyja spravy horš za ŭsio padryvajuć imidž krainy».
Pra status palitźniavolenaj: Mianie zasmuciła, što maja historyja vyhladaje strašyłkaj dla biełarusaŭ
«Mianie zasmuciła, što maja historyja vyhladaje strašyłkaj dla biełarusaŭ. Ja zusim nie chaču, kab ja stała krynicaj strachu, nianaviści i bolu. Unutry mianie haryć luboŭ. Luboŭ da majoj siamji, a taksama da ŭsich ludziej, uklučajučy maich kryŭdzicielaŭ. Mianie vielmi padtrymlivajuć paviedamleńni, što za mianie i maju siamju molacca šmat ludziej.
Advakat pieradaŭ mnie, što na vychadnych mianie pryznali viaźniem sumleńnia. Mnie stała sumna. Pa sutnaści, ja atrymała hety status praź dziejańni ŭładaŭ. Sama ja sabie i ŭ strašnym śnie jaho nie chacieła».
Pra źniavoleńnie: Tut jość svaje nahody dla radaści, viesiałości, dabryni, salidarnaści
«Pa majmu dośviedu, kali znachodzišsia na voli, padajecca, što za murami turmy zmročna i sumna. Adnak, apynuŭšysia tut, ja ŭśviedamlaju, što tut jość svaje nahody dla radaści, viesiałości, dabryni, salidarnaści.
U nas, jak ni dziŭna, nie byvaje dnia surka. Kožny dzień niejkija padziei, jakija nie dajuć nam zasumavać. Učora ŭ sanvuźle zamianiali truby, siadzieli paŭdnia biez vady. Zatoje paśla zamieny trub my nie pakutujem ad kanalizacyjnaha smurodu».
«Ja chacieła ŭ hetym liście pakazać, što ŭ źniavoleńni žyćcio praciahvajecca, dobryja ludzi zastajucca dobrymi ludźmi, a inšych ja tut i nie sustrakała».
Pra Vialikdzień: Och, jak ža my abjelisia!
«U niadzielu ź dziaŭčatami my śviatkavali Vialikdzień. Napiaredadni ŭ piatnicu mnie prynieśli pa zajavie ź biblijateki Novy Zapaviet. Ja padrychtavała frahmient ź Jevanhiella ad Maćvieja. My nakryli paśla prahułki śviatočny stoł z taho, što nam pieradali rodnyja ŭ subotu. Pierad tym, jak prystupić da ježy, ja pračytała malitvy i frahmienty ź Jevanhiella, a potym — karotkaje pažadańnie Božaj miłasernaści, abdymki i ŭračystaje zastolle. Och, jak ža my abjelisia!»
Pra Bibliju ŭ SIZA: Novy Zapaviet na biełaruskaj movie prynieśli pa pieršaj prośbie
«Źmianiać mieru strymańnia mnie nie źbirajucca. Zaprašać śviatara dla praviadzieńnia nabaženstva na Vialikdzień, niehledziačy na maje zvaroty, vyhladaje na toje, taksama nie buduć. Chacia, adznaču, Novy Zapaviet na biełaruskaj movie prynieśli pa pieršaj prośbie!»
Čytajcie taksama: «Publičnyja zakliki da zachopu dziaržaŭnaj ułady». Maci piaciarych dziaciej Volzie Załatar vystavili abvinavačańnie
Maci piaci dziaciej dasłała z Vaładarki svoj partret, namalavany sukamiernicaj
