U Dzień Voli Iryna išła pa svaich spravach — u čyrvonych botach, palito i bierecie, — kali pobač ź joj spyniŭsia bus.
«Zatrymali, ničoha nie tłumačačy, pasadzili ŭ aŭtobus, advieźli ŭ RUUS. Dla mianie heta było niečakana. Nakolki razumieju, usio praz adzieńnie niepadychodziačaha, pa mierkavańni milicyi, koleru. Choć ja vielmi lublu bieły i čyrvony i daŭno ich našu — i ŭ pobycie, i na pracy. Pytańniaŭ da adzieńnia raniej nie ŭźnikała. Ciapier užo apasajusia, — uśmichajecca žančyna. —
Paśla ŭ RUUS skazali, što ja zanadta pryhoža apranutaja, kab spakojna chadzić pa vulicach. Skłali pratakoł, napisali, što ja prymała ŭdzieł u niedazvolenym mitynhu z metaj vykazvańnia svaich palityčnych pohladaŭ. Adpuścili ŭnočy, bo ŭ mianie dačka niepaŭnahadovaja».
Kadr ź videa zatrymańnia
Sud adbyŭsia 12 krasavika. Spravu viała sudździa Kastryčnickaha rajona Volha Niaborskaja. Śviedkam vystupaŭ supracoŭnik pad kodavym proźviščam Mazanik. Pakazańni jon davaŭ pa skajpie, nieviadoma, ci ŭ bałakłavie: ekran pastavili tak, kab nie było vidać. Pa słovach Iryny, i pry zatrymańni, i na sudzie było šmat pracesualnych parušeńniaŭ, ale heta nie pieraškodziła pryznać jaje vinavataj i vypisać 90 bazavych (2610 rubloŭ) štrafu.
«Dumaju, taki vialiki štraf dali, tamu što ja nie pryznała vinu, dobra abaraniałasia, ich ža zakony pryvodziła ŭ jakaści arhumientaŭ. Sudździa niervavałasia, niekalki razoŭ pytałasia navat, ci nie chaču ja advod joj zajavić. Ja źbirajusia iści dalej, abskardžvać rašeńnie. Spadziajusia, što atrymajecca. Dla miedyka hety štraf — vialikija hrošy».
U Iryny 15 hadoŭ doktarskaha stažu. Adnym ź miescaŭ pracy była 37-ja haradskaja paliklinika, jana ŭładkavałasia tudy pa sumiaščalnictvie čatyry hady tamu. Paśla zatrymańnia 25 sakavika pačalisia prablemy. Siońnia byŭ jaje apošni pracoŭny dzień u paliklinicy.
«Mianie zvolnili z 14 krasavika nibyta pa pahadnieńni bakoŭ, ale nasamreč byli vyraznyja ŭkazańni — telefanavali z kamiteta pa achovie zdaroŭja i pytalisia, jakija miery pryniatyja pa mnie», — raskazvaje doktar, jak chutka ź joj raźvitalisia.
